ការ​នាំ​ចេញ​ស្បែក​ជើង​របស់ឥណ្ឌូណេស៊ី​ កើនដល់ ៣,៧ ប៊ី​លាន​ដុល្លារ​

ឥណ្ឌូណេស៊ី​កា្លយជា​ប្រទេសនាំចេញស្បែកជើងធំជាងគេទី ៦ នៅលើពិភពលោក ដោយ​តម្លៃនៃការនាំចេញបាន​កើនដល់ ៣,៧៧ ប៊ីលាន​ដុល្លារអាមេរិក។

​រដ្ឋមន្ត្រីឧស្សាហកម្មឥណ្ឌូណេស៊ី លោក Agus Gumiwang Kartassmita ​ឱ្យដឹងយ៉ាងដូច្នេះកាលពីថ្ងៃព្រហស្បតិ៍ ដោយចង្អុលបង្ហាញថា ការនាំចេញ​ស្បែកម៉ាក Converse មាន​ភាពជោគជ័យជាងគេ។ លោក​និយាយយ៉ាងដូច្នេះថា៖ «នេះ​បង្ហាញ​ថា ឥណ្ឌូណេស៊ី​អាច​ផលិត​ស្បែកជើង​បាន​តាម​ស្តង់ដារ​អន្តរជាតិ»។

ទន្ទឹមនឹង​កំណើននៃការនាំចេញនេះ លោក Kartasasmita ក៏បានសង្កត់ធ្ងន់ផងដែរ លើ​ផល​វិជ្ជមាននៃវិស័យស្បែកជើង ដែល​ផ្ដល់ការងារក្នុងស្រុក។ ចាប់តាំងពីខែកុម្ភៈឆ្នាំ ២០២៥ កម្លាំងពលកម្ម​ក្នុងឧស្សាហកម្មនេះ បានកើនឡើងប្រហែល ៣៥ ភាគរយ បើប្រៀបធៀបទៅនឹងរយៈពេលដូចគ្នា​ឆ្នាំមុន។

លោកបានបញ្ជាក់ថា រដ្ឋាភិបាលនៅតែបន្តពង្រឹងឧស្សាហកម្មផលិតកម្មជាតិ ដោយផ្តល់ជូននូវកម្មវិធីលើកទឹកចិត្តផ្សេងៗ រួមទាំងការឧបត្ថម្ភធនការប្រាក់ ៥ ភាគរយលើប្រាក់កម្ចីសម្រាប់អាជីវកម្មក្នុងវិស័យឧស្សាហកម្ម​មួយ​នេះ​។

កាលពីថ្ងៃព្រហស្បតិ៍ ស្បែកជើងម៉ាក​ Converse ចំនួន ២០ ០០០ គូ ​ដែលផលិតនៅរោងចក្រ Batang ត្រូវបានដឹកជញ្ជូនទៅកាន់សហរដ្ឋអាមេរិក និងអូស្ត្រាលី។ ក្រុមហ៊ុនក៏បាននាំចេញទៅកាន់ប្រទេសចំនួន ៣៧ ផ្សេងៗទៀតផងដែរ រួមមានបែលហ្សិក ម៉ិកស៊ិក និងកាណាដា។

Converse ដែលជាម៉ាកយីហោសកលដ៏ល្បីល្បាញគ្រប់គ្រងដោយ Nike ​ពឹងផ្អែកលើក្រុមហ៊ុនផលិតនៅឥណ្ឌូណេស៊ីអស់រយៈពេលជាច្រើនឆ្នាំមកហើយ ដើម្បីបំពេញតម្រូវការផលិតកម្មរបស់ខ្លួន។