ព័ត៌មានអន្ដរជាតិ

វៀតណាមចាប់ផ្ដើមមើលឃើញពី «ជំនន់» ទំនិញអាមេរិក

បានផុស

៨ ខែ មុន

នៅ

ថ្ងៃព្រហស្បតិ៍ ១១ កញ្ញា ២០២៥

ដោយ

វៀតណាមចាប់ផ្ដើមមើលឃើញពី «ជំនន់នៃទំនិញអាមេរិក» ជាបណ្ដើរៗនៅឆ្នាំនេះ ខណៈពេលដែលប្រទេសអាស៊ីអាគ្នេយ៍មួយនេះ បើកទីផ្សារខ្លួនសម្រាប់ទំនិញអាមេរិក ដើម្បីជាថ្នូរនឹងការបន្ថូរបន្ថយពន្ធរបស់ប្រធានាធិបតី ដូណាល់ ត្រាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែតវៀតណាម VnExpress បានចុះផ្សាយថា ការនាំចូលរបស់វៀតណាមពីសហរដ្ឋអាមេរិក បានកើនឡើង ២៣ ភាគរយ ដល់ ១០,៥ ប៊ីលានដុល្លារ ក្នុងរយៈពេល ៧ ខែដើមឆ្នាំ ដោយលំហូរទំនិញពាក់កណ្ដាលសម្រេចសម្រាប់ផលិតកម្ម និងផលិតផលកសិកម្មកើនឡើងខ្លាំងជាងគេ។

កប្បាសជាប់ចំណាត់ថ្នាក់ខ្ពស់ជាងគេ ដោយវៀតណាមបាននាំចូលវារហូតដល់ទៅ ៩៤០ លានដុល្លារ ពោលគឺកើនឡើង ៥៦ ភាគរយ ធៀបនឹងរយៈពេលដូចគ្នាកាលពីឆ្នាំនេះ។ នេះបើតាមទិន្នន័យពីគយវៀតណាម។ ប្លាស្ទិកឆៅ ដែលសំដៅលើប្លាស្ទិកមិនទាន់កែច្នៃវិញ បានឡើងឡើងជិត ៤៩ ភាគរយ ដល់ ៦៥៦ លានដុល្លារ។

ជាមួយគ្នានោះ ការនាំចូលសំណល់ដែកបានកើនឡើងទ្វេដងដល់ ១២៥ លានដុល្លារ ដែលឆ្លុះបញ្ចាំងពីសញ្ញានៃការស្ទុះងើបឡើងវិញដោយឧស្សាហកម្មសំណង់។ ការនាំចូលបន្លែ និងផ្លែឈើវិញ បានកើនឡើង ៤៧ ភាគរយ ដល់ ៣៥៣ លានដុល្លារ ហើយការនាំចូលចំណីសត្វ បានកើនឡើង ២៧ ភាគរយ ដល់ ៤៤៧ លានដុល្លារ។ ការនាំចូលសណ្តែកសៀង បានកើនឡើង ៨ ភាគរយ ដល់ ២៤៨ លានដុល្លារ។

គេមើលឃើញថា ក្នុងរយៈពេលប៉ុន្មានខែថ្មីៗនេះ រដ្ឋាភិបាលវៀតណាមបាននិងកំពុងជំរុញធុរកិច្ចក្នុងស្រុក ឱ្យទិញផលិតផលអាមេរិកបន្ថែមទៀតដើម្បីធានាតុល្យភាពពាណិជ្ជកម្ម ។ វៀតណាមដែលមានអតិរេកពាណិជ្ជកម្មជាង ១២៣,៥ ប៊ីលានដុល្លារជាមួយសហរដ្ឋអាមេរិកកាលពីឆ្នាំមុន បានរងការដាក់ពន្ធខ្ពស់ ២០ ភាគរយ ពីលោក ត្រាំ ដែលនេះទាបជាងអត្រាចាស់ ៤៦ ភាគរយ។

ជាថ្នូរនឹងការបន្ថូរបន្ថយពន្ធកាលនោះ វៀតណាមបានព្រមព្រៀងបើកទីផ្សារឱ្យទំនិញអាមេរិក ដោយមិនយកពន្ធនាំចូល។ សហព័ន្ធនាំចេញសាច់របស់សហរដ្ឋអាមេរិកនៅវៀតណាម បាននិយាយថា ប្រសិនបើពន្ធគយត្រូវបានកាត់បន្ថយមកត្រឹម ០ ភាគរយ នោះការនាំចូលពីអាមេរិក អាចកើនឡើងពី ២០-៣០ ភាគរយ ក្នុងរយៈពេល ៦ ខែ ដោយសារតម្លៃទំនិញអាមេរិកកាន់តែប្រកួតប្រជែងជាមួយទំនិញអូស្រ្តាលី និងកាណាដា៕