ក្រុមហ៊ុននាំចេញអង្ករ ១៣ នឹងចូលរួមពិព័រណ៍អាហារអន្តរជាតិ នៅអាឡឺម៉ង់

សហព័ន្ធស្រូវអង្ករកម្ពុជា នឹងដឹកនាំក្រុមហ៊ុននាំចេញអង្ករ ចំនួន ១៣ ក្រុមហ៊ុន ចូលរួមពិព័រណ៍អាហារអន្តរជាតិ ANUGA 2025 – International Foods Industry Trade Fair នៅប្រទេសអាឡឺម៉ង់ ចាប់ពីថ្ងៃទី០៤ ដល់ថ្ងៃទី០៨ ខែតុលា ឆ្នាំ២០២៥។

ក្រោម​កិច្ចយកចិត្តទុកដាក់របស់ រាជរដ្ឋាភិបាលកម្ពុជាក្នុងការជម្រុញការនាំចេញអង្ករកម្ពុជា តាមរយៈ​ថវិកាបដិភាគរបស់សហគ្រិនខ្មែរ (Khmer Enterprise) នៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងធនាគារអភិវឌ្ឍន៍ ជនបទ និងកសិកម្ម សហព័ន្ធស្រូវអង្ករកម្ពុជា នឹងដឹកនាំ​ក្រុមហ៊ុន​នាំ​ចេញ​អង្ករ ចំនួន ១៣ ក្រុមហ៊ុន ដើម្បី​ចូលរួម​តាំង បង្ហាញនូវផលិតអង្ករ ដែលមានគុណភាពបំផុតរបស់កម្ពុជា និង​ធ្លាប់​បាន​ឈ្នះ​ពាន​រង្វាន់​អង្ករល្អបំផុត របស់ពិភពលោក ទៅក្នុង​ព្រឹត្តិការណ៍​ម្ហូប​អាហារ​អន្តរជាតិ​ដ៏​ធំ​ជាង​គេ​លើ​ពិភព​លោក ដែល​មាន​ឈ្មោះ​ថា ANUGA 2025 – International Foods Industry Trade Fair នៅទី​ក្រុង​កូឡូញ ប្រទេស​អាឡឺម៉ង់ ដែល​កម្មវិធី​នេះ​នឹង​ប្រព្រឹត្ត​ទៅ​ចាប់​ពីថ្ងៃទី០៤ ដល់ថ្ងៃទី០៨ ខែ​តុលា ឆ្នាំ២០២៥។

ការ​ចូលរួមពិព័រណ៍អាហារ អន្តរជាតិ ANUGA 2025 នេះ គឺជាការចូលរួមលើកទី២ ហើយ​របស់ សហព័ន្ធស្រូវ​អង្ករ​កម្ពុជា​ បន្ទាប់ពី​ការចូលរួមលើកទី១ នៅក្នុងឆ្នាំ២០២៣។ សម្រាប់ការចូលរួមលើកនេះ សហព័ន្ធ​ស្រូវ​អង្ករកម្ពុជា បាន​រៀបចំ​នូវពន្លាជាតិរួមមួយ​យ៉ាងស្រស់ស្អាត​ក្នុងទំហំចំនួន ៩៦ ម៉ែត្រការ៉េ។  

គោលបំណង​ នៃ​ការចូលរួម​នៅ​ក្នុង​ព្រឹត្តិការណ៍​តាំង​ពិរព័ណ៍​នេះ គឺដើម្បីធ្វើពិពិធកម្មទីផ្សារ ដែលស្របទៅតាម​គោល​នបោយបាយ​របស់​រាជរដ្ឋាភិបាល ដែល​មាន​ក្រសួង​ពាណិជ្ជកម្ម ក្រសួង​ឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ លើ​ស្ដង់ដារ និង​លក្ខខណ្ឌ​សុវត្ថិភាព​ចំណី​អាហារ និង​ក្រសួងកសិកម្ម រុក្ខាប្រមាញ់ និង​នេសាទ ជា​សេនាធិការ​ក្នុងជំរុញផលិតផលចូលទីផ្សារ និងការដាំដុះតម្រូវតាមទីផ្សារ។

គូសបញ្ជាក់ផងដែរថា ព្រឹត្តិការណ៍ ANUGA 2025 ត្រូវបានបង្កើតដំបូងឡើងតាំងពីឆ្នាំ​ ១៩១៩ ហើយ​មាន​ការវិវត្តរីកចម្រើន និងក្លាយខ្លួនជាវេទិកាប្រមូលផ្ដុំដ៏សំខាន់ មួយ​សម្រាប់ពិភពលោករបស់អ្នកជំនាញ និងអ្នក​ធ្វើការ​សម្រេចចិត្តលើ​ការរៀបចំគោលនយោបាយផ្នែកចំណីអាហារ និងភេសជ្ជៈ។

ក្រុមហ៊ុននាំចេញទាំង ១៣ ដែលនឹងចូលរួមតាំងបង្ហាញផលិតផលនៅក្នុងព្រឹត្តិការណ៍ម្ហូបអាហារ ANUGA 2025 ស្ថិតក្រោមពន្លាសហព័ន្ធស្រូវអង្ករកម្ពុជា រួមមាន៖ ១. ក្រុមហ៊ុន ហ្គោលដេន រ៉ាយស៍ (ខេមបូឌា), ២. ក្រុមហ៊ុន ឥណ្ឌូឆាយណា រ៉ាយស៍ មីល លីមីធីត, ៣. ក្រុមហ៊ុន ហ្គោលដេន ស្ដារ រ៉ាយស៍ មីល អេន អុីមផត អិចផត, ៤. ក្រុមហ៊ុន អេមរុ រ៉ាយស៍ (ខេមបូឌា), ៥. ក្រុមហ៊ុន កំពង់ធំ រ៉ាយស៍ មីល លីមីធីត, ៦. ក្រុមហ៊ុន ស៊ីធី រ៉ាយស៍ អ៊ីមផត អិចផត ខូអិលធីឌី, ៧. ក្រុមហ៊ុន ដេលី ហ្រ្វេស ហ្វ៊ូដ (ខេមបូឌា) ឯ.ក

៨. ក្រុមហ៊ុន ឡ អៀកហេង សេកមាស រ៉ាយស៍, ៩. ក្រុមហ៊ុន ស៊ីកនេតឈ័រ រ៉ាយស៍ ឯ.ក, ១០. ក្រុមហ៊ុន ហ្គោលដិន ដូន​កែវ រ៉ាយស៍ មីល, ១១. ក្រុមហ៊ុន ហ្វេតរ៉ាយស៍ បាត់ដំបង អិលធីឌី, ១២. ក្រុមហ៊ុន អៀង ហ៊ាង អុីមផត អិចផត ខូ អិលធីឌី និង​ ១៣. ក្រុមហ៊ុន ព្រីម្លិះ ខបភើរេសិន។

សម្រាប់​ព័ត៌​មានបន្ថែម: www.anuga.com ពន្លាសហព័ន្ធ​ស្រូវអង្ករកម្ពុជា​ដែលនឹ​ងត្រូវដាក់តាំង​បង្ហាញ​អង្ករ​កម្ពុជា (រូប​តំណាង 3D) ដែល​ស្ថិត​នៅ​ស្ដង់ លេខ (STAND No-B-011/B-019) អាគារ 2.1 ស្ថិតនៅ​ក្នុងមជ្ឈ​មណ្ឌល​ពិព័រណ៍ Koelnmesse, ទីក្រុងកូឡូញ ប្រទេសអាឡឺម៉ង់៕

ដោយ៖ ឌិន ថារី