សេដ្ឋកិច្ច

កម្ពុជាស្នើឱ្យក្រុមហ៊ុនអាកាសចរណ៍ជប៉ុន Japan Airlines តភ្ជាប់ជើងហោះហើរត្រង់

បានផុស

៧ ខែ មុន

នៅ

ថ្ងៃអាទិត្យ ២៨ កញ្ញា ២០២៥

ដោយ

លោក ហួត ហាក់ រដ្ឋមន្ត្រីក្រសួងទេសចរណ៍បានស្នើឱ្យក្រុមហ៊ុនអាកាសចរណ៍ជប៉ុន Japan Airlines (JAL) សិក្សាលទ្ធភាពតភ្ជាប់ជើងហោះហើរត្រង់ដោយផ្ទាល់ពីប្រទេសជប៉ុនមកកម្ពុជា ដោយផ្អែកលើសក្ដានុពលទេសចរណ៍កម្ពុជា កត្តាសុខសន្តិភាព ចំនួនអ្នកដំណើរអន្តរជាតិកើនឡើងជាបន្តបន្ទាប់ និងបន្ទាប់ពីវត្តមានអាកាសយានដ្ឋានអន្តរជាតិតេជោ លំដាប់ 4F បានដាក់ឱ្យដំណើរការ។

លោករដ្ឋមន្ត្រីបានលើកឡើងនៅក្នុងជំនួបពិភាក្សាការងារជាមួយតំណាងក្រុមហ៊ុនអាកាសចរណ៍ជប៉ុន Japan Airlines ក្នុងដំណើរទស្សនកិច្ចការងារចូលរួមពិព័រណ៍ទេសចរណ៍ជប៉ុន ២០២៥ និងកិច្ចប្រជុំតុមូលថ្នាក់រដ្ឋមន្ត្រីទេសចរណ៍ កាលពីថ្ងៃទី ២៥ ខែកញ្ញា ឆ្នាំ ២០២៥។

លោករដ្ឋមន្ត្រីបានវាយតម្លៃខ្ពស់ចំពោះការចូលរួមដ៏សំខាន់ក្នុងវិស័យទេសចរណ៍កម្ពុជារបស់ក្រុមហ៊ុនអាកាសចរណ៍ជប៉ុនដ៏ធំមួយនេះដែលបានហោះហើរចំនួន ២២០គោលដៅនៅប្រទេស ចំនួន៣៥ ជុំវិញពិភពលោករហូតមក តាមរយៈការជួយផ្សព្វផ្សាយសក្តានុពលទេសចរណ៍កម្ពុជា និងការដឹកជញ្ជូនអ្នកដំណើរ និងភ្ញៀវទេសចរទាំងជប៉ុន និងអន្តរជាតិមកកាន់រាជធានីភ្នំពេញ និងខេត្តសៀមរាបក្នុងចំនួនគួរឱ្យមោទនៈ ក្រោមទម្រង់ Codeshares ជាមួយក្រុមហ៊ុនអាកាសចរណ៍ដៃគូរបស់ខ្លួន។

កាលពីពេលថ្មីៗនេះ ឯកអគ្គរាជទូតជប៉ុនប្រចាំនៅកម្ពុជា សន្យាជំរុញក្នុងការតភ្ជាប់ជើងហោះហើរត្រង់ជាមួយកម្ពុជា បន្ទាប់ពីការដាក់ឱ្យដំណើរការព្រលានយន្តហោះអន្តរជាតិតេជោ ដើម្បីផ្តល់ភាពងាយស្រួលដល់ទាំងធុរជន និងទេចរជប៉ុនមកកាន់កម្ពុជា។

យោងតាមអាកាសចរស៊ីវិល នៅក្នុងឆមាសទី១ ឆ្នាំ ២០២៥ កម្ពុជាទទួលបានអ្នកដំណើរចេញ-ចូលតាមផ្លូវអាកាសជាង ៣,៦ លាននាក់ កើនឡើង ២០% ធៀបនឹងរយៈពេលដូចគ្នាកាលពីឆ្នាំ ២០២៤។

រដ្ឋលេខាធិការដ្ឋានអាកាសចរណ៍ស៊ីវិលបានព្យាករណ៍ថា ការដឹកជញ្ជូនអ្នកដំណើរតាមផ្លូវអាកាសនឹងកើនដល់ចំនួន ៧,៥លាននាក់ នៅក្នុងឆ្នាំ ២០២៥នេះ៕