បាងកកប៉ុស្តិ៍៖ ភ្ញៀវទេសចរអន្តរជាតិ «ដើរគេច» ប្រទេសថៃ

កាសែតបាងកកប៉ុស្តិ៍ហៅការធ្លាក់ចុះនៃភ្ញៀវទេសចរបរទេស ថាជាការ «ដើរគេចប្រទេសថៃ» របស់ពួកគេ ចំពេលដែលទំនុកចិត្តវិស័យទេសចរណ៍ថៃធ្លាក់ចុះ ដោយសារតែបញ្ហាជាច្រើនរួមរឹត ជាពិសេសកង្វល់សុវត្ថិភាព។

ក្នុងអត្ថបទចុះផ្សាយនៅថ្ងៃចន្ទនេះ កាសែតដដែល​បាន​ស្រង់ទិន្នន័យស្ទង់មតិពី​ក្រុមប្រឹក្សាទេសចរណ៍​ថៃ (TCT) ​ដែល​បង្ហាញថា សន្ទស្សន៍ទំនុកចិត្តទេសចរណ៍សម្រាប់ត្រីមាសទី ៣ នៃឆ្នាំ ២០២៥ ស្ថិតក្នុងស្ថានភាព «អាក្រក់» ដោ​យធ្លាក់ចុះដល់ ៦៦/១០០ ពិន្ទុ ធៀប​នឹង​ ៧០ ពិន្ទុ នៅត្រីមាសទី ២ និង ៦៨ ពិន្ទុ នៅត្រីមាសដូចគ្នា កាលពីឆ្នាំមុន។ ​

ការស្ទង់មតិរបស់ TCT ធ្វើឡើងនៅចន្លោះថ្ងៃទី ១៥ ខែសីហា ដល់ថ្ងៃទី ១៦ ខែកញ្ញា ទៅលើ​ប្រតិបត្តិករទេសចរណ៍ចំនួន ៧៤០ នាក់ ភ្ញៀវទេសចរថៃ ៤៥០ នាក់ និងភ្ញៀវទេសចរបរទេសចំនួន ៣១០ នាក់។ របាយការណ៍ស្ទង់មតិដដែល បានលើកឡើងពីបញ្ហាប្រឈមជាច្រើនដែល​ធ្វើឱ្យ​ឧស្សាហកម្មគ្មានផ្សែងថៃធ្លាក់ចុះនៅត្រីមាសនេះ រួមទាំងការធ្លាក់ចុះនៃសេដ្ឋកិច្ច ជម្លោះព្រំដែនជាមួយ​កម្ពុជា កង្វល់សុវត្ថិភាព​ និងការឡើងថ្លៃប្រាក់បាតជាដើម។

គួរគូសបញ្ជាក់ថា វិបត្តិទេសចរណ៍ថៃបាន​បង្កក្ដីបង្វល់ពីគ្រប់ភាគីពាក់ព័ន្ធរួចស្រាប់ហើយ រាប់តាំងពីដើមឆ្នាំមក ដោយ​អ្នកជំនាញលើកឡើងពីបញ្ហាសំខាន់ៗរួមមាន​ កង្វល់សុវត្ថិភាពដែល​ធ្វើឱ្យ​ភ្ញៀវទេសចរ ជាពិសេសចិន ធ្លាក់ចុះ, កំណើន​ប្រាក់បាតថៃ ដែលធ្វើឱ្យទំនិញថៃឡើងថ្លៃសម្រាប់បរទេស, ជម្លោះព្រំដែនជាមួយ​កម្ពុជា ដែលធ្វើឱ្យភ្ញៀវបញ្ចៀសការទៅលេង​ក្បែរព្រំដែនជម្លោះ និងពហិការពីភ្ញៀវកម្ពុជា, ព្យុះនយោបាយក្នុងស្រុកថៃ និងកំណើននៃការប្រកួតប្រជែងពីប្រទេសជិតខាងដូចជាវៀតណាម​ ចំពេលដែលថៃបរាជ័យក្នុងធ្វើកំណែទម្រង់ ដូចជាការធ្លាក់ចុះនៃគុណភាព​សេវាកម្មទេសចរណ៍ និង​ជម្រើស​ទិសដៅ​ដដែលៗជាដើម​។

បើ​តាមរបាយការណ៍ចុងក្រោយរបស់ក្រសួងទេសចរណ៍ និងកីឡា ថៃបាន​ទទួលភ្ញៀវទេសចរអន្តរជាតិចំនួន ២៣,៤៥ លាននាក់ ចាប់ពីថ្ងៃទី ១ មករា ដល់ថ្ងៃទី ២១ ខែកញ្ញា ដោយធ្លាក់ចុះ ៧,៤៤ ភាគរយ ធៀប​នឹង​រយៈពេល​ដូចគ្នាកាលពីឆ្នាំមុន។ ​​

ដោយបែបនេះហើយ ថៃបាន​​ទម្លាក់ការព្យាករការមកដល់របស់ភ្ញៀវទេសចរមកត្រឹម ៣៣,១ លាននាក់ នៅឆ្នាំនេះ ធៀប​នឹង​ការព្យាករ ៣៣,៣ លាននាក់នៅខែកក្កដា ដែលតួលេខដដែល បង្ហាញពីការធ្លាក់ចុះ ៦,៧ ភាគរយ ធៀបនឹង​ឆ្នាំមុន និង ១៧ ភាគរយ ធៀប​នឹង​ចំនួនឆ្នាំ ២០១៩ ពោលគឺមុនសម័យ​កូវីដ​១៩​​៕

​