ទេសរដ្ឋមន្រ្តី លី ធុជ នាំយកគ្រឿងឧបភោគ បរិភោគរបស់ពលរដ្ឋខ្មែររស់នៅប្រទេស​អូស្ត្រាលីជូនប្រជាពលរដ្ឋនៅតំបន់បិទខ្ទប់

ព្រឹកថ្ងៃទី០៣ ខែឧសភា ឆ្នាំ២០២១ ប្រជាពលរដ្ឋខ្មែរនៅប្រទេស អូស្ត្រាលី តាមរយៈ លោកទេសរដ្ឋមន្រ្តី លី ធុជ បានប្រគល់នូវគ្រឿង ឧបភោគ បរិភោគជូនលោកជំទាវ ម៉ែន សំអន ឧបនាយករដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋានរាជធានីភ្នំពេញ ដើម្បីចូលរួមចែករំលែកទុក្ខលំបាករបស់បងប្អូនប្រជាពលរដ្ឋខ្មែរ ដែលកំពុងទទួលរងគ្រោះដោយ សារកូវីដ-១៩ និងកំពុងរស់នៅតាមតំបន់បិទខ្ទប់ទប់ស្កាត់ការរាលដាលជំងឺកូវីដ-១៩ នៅរាជធានីភ្នំពេញ។

គ្រឿងឧបភោគបរិភោគនេះ ឧបត្ថម្ភ ដោយ សមាគមន៍ Australasian Business Association Inc (ABA) ដែលមានលោក Jason Sara ជាប្រធាន លោក Tee Tan អនុប្រធាន រួមជាមួយបងប្អូនជាអនុប្រធាន សមាជិកក្រុមការងារសមាគមន៍ ABA និងប្រជាពលរដ្ឋខ្មែររស់នៅទីក្រុងម៉ែលប៊ន រដ្ឋវិចតូរីយ៉ា ប្រទេសអូស្រ្តាលី រួមមាន៖ ត្រីខកំប៉ុង ៥០ កេស, អង្ករ ៨ តោន, ទឹកត្រី ៤០០យូរ និងទឹកស៊ីអ៊ីវ ៤០០យូរ ព្រមទាំងមានការចូលរួមពីលោកស្រី ប៊ុត រតនា នាយិកា មូលនិធិ មីជាតិចំនួន ១០០ កេស។

លោក ជំទាវ ម៉ែន សំអន មានប្រសាសន៍ថា ស្ថិតនៅក្នុងដំណាក់កាលដ៏លំបាកនេះ ឯកឧត្តម ទេសរដ្ឋមន្រ្តី លី ធុជ បាន កៀរគរ បងប្អូនខ្មែរនៅបក្រៅប្រទេស រួមជាមួយនឹងកម្លាំងកាយចិត្ត កម្លាំង ចិត្ត និងថវិកាផ្ទាល់ខ្លួន ក្នុងការស្វែងរកស្បៀង​ ​ដែលជាជំនួយសង្គ្រោះបឋម ដើម្បីមកជួយដល់ប្រជាពលរដ្ឋខ្មែរ ដែលបាននឹងកំពុងរងផលប៉ះពាល់ ដោយសារ វិបត្តិ កូវីដ១៩ នៅក្នុងអំឡុងពេលបិទខ្ទប់ក្នុងរាជធានីភ្នំពេញ និងខេត្តកណ្តាលនាពេលនេះ។

អំណោយសប្បុរសនេះ គឺបានឆ្លុះបញ្ចាំងឱ្យឃើញអំពីការយកចិត្តទុក ដាក់ក្នុងចូលរួមចំណែកពីសំណាក់ ឯកឧត្តម លោកស្រី ជាមួយរាជរដ្ឋាភិបាលកម្ពុជា ជួយដល់ប្រជាពលរដ្ឋក្នុងកាលៈទេសៈដ៏លំបាកនេះ។

លោកទេសរដ្ឋមន្រ្តី លី ធុជ បានសម្តែងនូវការដឹងគុណ និងវាយតម្លៃខ្ពស់ចំពោះទឹកចិត្តមេត្តាធម៌ និងការសន្តោស ប្រណីរបស់ លោកជំទាវ ដែលតែងតែយកចិត្តទុកដាក់ចូលរួមជួយដល់បងប្អូនជនរួមជាតិតាំងពីសម័យសង្រ្គាម រហូត ដល់ទទួលបានសុខសន្តិភាពក៏ដូចជាបច្ចុប្បន្ននេះបានជួយសង្រ្គោះនិងសម្រាលទុក្ខការលំបាករបស់បងប្អូន ប្រជាពលរដ្ឋ ដែលកំពុងជួបបញ្ហាខ្វះខាតដោយសារការរីករាលជំងឺកូវីដ១៩ ក្រោមការដឹកនាំដ៏ត្រឹមត្រូវបំផុតរបស់សម្ដេច អគ្គ មហា សេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

ក្នុងនាមរាជរដ្ឋាភិបាលកម្ពុជា លោកទេសរដ្ឋមន្រ្តី លី ធុជ បានថ្លែងអំណរគុណយ៉ាងជ្រាល ជ្រៅជូនចំពោះសមាគមន៍ ABA និងបងប្អូនប្រជាពលរដ្ឋខ្មែររស់នៅអូស្រ្តាលី ក៏ដូចជា សប្បុរសជន ដទៃ ទៀត ដែល បានចូលរួមឧបត្ថម្ភគ្រឿង ឧបភោគ បរិភោគជូនដល់ប្រជាពលរដ្ឋរាជធានីភ្នំពេញកំពុងជួបការលំបាកដោយសារជំងឺឆ្លងកូវីដ-១៩នេះ។

លោកបានបន្តទៀតថា ការឧបត្ថម្ភស្បៀងនេះ ពិតជាបានឆ្លើយតបនឹងតម្រូវការចាំបាច់សម្រាប់ដោះស្រាយបញ្ហាប្រចាំថ្ងៃរបស់ប្រជាពលរដ្ឋខ្វះខាតក្នុងគ្រាដែលប្រទេសកំពុងជួបបញ្ហាបែបនេះ ហើយក៏ជាការបង្ហាញអំពីទឹកចិត្តដ៏សប្បុរស និងសណ្តានចិត្តចូលរួមសាមគ្គីរបស់បងប្អូនប្រជាពលរដ្ឋខ្មែរ ទាំងនៅក្នុង និងក្រៅប្រទេសដេីម្បីរួមសាមគ្គីគ្នា ជួយជ្រោមជ្រែងទៅដល់ការឆ្លើយតបទៅនឹងវិធានការការ ទប់ស្កាត់ការរីករាលជំងឺកូវីដ១៩ ផងដែរ។

សូមបញ្ជាក់ថា សមាគមន៍ Australasian Business Association Inc (ABA) និងប្រជាជនខ្មែររស់នៅទីក្រុងម៉ែលប៊ន បានរៀបចំកម្មវិធីសប្បុរសធម៌ កាលពីថ្ងៃទី១៧ ខែមេសា ឆ្នាំ២០២១ កន្លងទៅនេះ ក្នុងគោលបំណងរួមចំណែកជាមួយរាជរដ្ឋាភិបាលកម្ពុជា ដើម្បីជួយដល់ប្រជាជនខ្មែរដែលរងគ្រោះដោយជំងឺកូវីត-១៩ និងជួយទប់ស្កាត់ការរីករាលដាលជំងឺកូវីត-១៩៕