កូវីដ-១៩

អីយ៉ា! ពលរដ្ឋ Ohio នឹងឈ្នះរង្វាន់១លានដុល្លារ ៥រង្វាន់ គ្រាន់តែទៅចាក់វ៉ាក់សាំងកូវីដ

បានផុស

៥ years មុន

នៅ

ថ្ងៃព្រហស្បតិ៍ ១៣ ឧសភា ២០២១

ដោយ

ពលរដ្ឋនៅរដ្ឋ Ohio សហរដ្ឋអាមេរិកនឹងមានឱកាសឈ្នះរង្វាន់ជាទឹកប្រាក់១លានដុល្លារអាមេរិកដែលមានចំនួន៥រង្វាន់សម្រាប់អ្នកដែលបានទៅចាក់វ៉ាក់សាំងការពារកូវីដ-១៩ និងមានឈ្មោះផ្សងសំណាង។

ដំណឹងនេះត្រូវបានប្រកាសនៅថ្ងៃពុធដោយរដ្ឋ Ohio ដែលបានក្លាយជាវិធីទាក់ទាញមនុស្សឲ្យទៅចាក់វ៉ាក់សាំងគួរឲ្យចាប់អារម្មណ៍មួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Mike DeWine អភិបាលរដ្ឋបានឲ្យដឹងថា សម្រាប់គម្រោងផ្សងសំណាងនេះនឹងចាប់ផ្តើមពីថ្ងៃទី២៦ ខែឧសភា ដែលរដ្ឋនឹងធ្វើការចាប់រង្វាន់រាល់មួយសប្តាហ៍ម្តងសម្រាប់មនុស្សធំពេញវ័យដែលបានទៅចាក់វ៉ាក់សាំងការពារកូវីដ-១៩យ៉ាងហោចណាស់១ដូស។ ការចាប់ឆ្នោតផ្សងសំណាងនឹងធ្វើឡើយរយៈពេល៥ដង ដែលក្នុងមួយដង ចាប់មួយរង្វាន់។

លោកមានប្រសាសន៍ថា ៖«ខ្ញុំដឹងថា អ្នកខ្លះអាចនិយាយថា យើងឆ្កួត! គំនិតចាប់ឆ្នោតផ្សងសំណាងមានលុយដល់ទៅលានដុល្លារគឺជាការខ្ជះខ្ជាយប្រាក់ជាច្រើន។ ប៉ុន្តែមែនទែនទៅ ការខ្ជះខ្ជាយពិតប្រាកដនៅចំណុចនេះគឺកូវីដ-១៩ នៅពេលដែលវ៉ាក់សាំងមានសម្រាប់ចាក់អ្នកដែលត្រូវការ នោះការបាត់បង់អាយុជីវិតដោយសារកូវីដ»។

រដ្ឋ Ohio នឹងធ្វើការចាប់ឈ្មោះពីទិន្នន័យបញ្ជីឈ្មោះបោះឆ្នោតដែលមានស្រាប់របស់រដ្ឋ។ ប្រជាជនក៏អាចចុះឈ្មោះតាមអនឡាញសម្រាប់ចាក់វ៉ាក់សាំងដែរ។

អ្នកដែលមានសិទ្ធិឈ្នះរង្វាន់ត្រូវតែជាប្រជាជននៅរដ្ឋ Ohio អាយុ១៨ឆ្នាំគិតត្រឹមថ្ងៃចាប់ឆ្នោត និងបានចាក់វ៉ាក់សាំងមុនពេលចាប់ឆ្នោត។ ប្រាក់ដែលផ្តល់ជារង្វាន់យកពីមូលនិធិសង្គ្រោះកូវីដ-១៩របស់រដ្ឋដែលមានស្រាប់៕

ប្រែសម្រួល៖ វីរបុត្រ
ប្រភព៖ ABC