ស្ថានភាពការឆ្លងជំងឺកូវីដ-១៩ នៅភ្នំពេញ ខែកញ្ញាប្រហាក់ប្រហែលកាលខែសីហា តែទាបជាងខែមុនៗ

បើតាមការសង្កេត និងប្រៀបធៀប អំពីមន្ត្រីសុខាភិបាល ចំពោះស្ថានភាពការឆ្លងជំងឺកូវីដ-១៩ នៅរាជធានីភ្នំពេញ ឃើញថា ស្ថានភាពការឆ្លងជំងឺកូវីដ-១៩ នៅភ្នំពេញនៅខែកញ្ញានេះ មានភាពប្រហាក់ប្រហែលកាលខែសីហា ប៉ុន្តែការឆ្លងនៅខែកញ្ញានេះចុះទាប បើប្រៀបធៀបជាមួយខែមុនៗទៀត។

លោក ងី មានហេង ប្រធានមន្ទីរសុខាភិបាល រាជធានីភ្នំពេញ មានប្រសាសន៍ប្រាប់ កម្ពុជាថ្មី ដោយមិនបានបញ្ជាក់ចំនួនតួលេខ ប៉ុន្តែលោកសូមនិយាយជារួម អំពីស្ថានភាពឆ្លងជំងឺកូវីដ-១៩ នៅរាជធានីភ្នំពេញថា សម្រាប់ខែកញ្ញា ស្ថានភាពឆ្លងជំងឺកូវីដ-១៩ មានភាពប្រដំត្រសងគ្នា បើប្រៀបធៀបនឹងខែសីហា។

ប្រធានមន្ទីរសុខាភិបាល រាជធានីភ្នំពេញរូបនេះ បានឱ្យដឹងទៀតថា បើប្រៀបធៀបចំនួនឆ្លងជំងឺកូវីដ-១៩ នៅខែកក្កដា គឺមានការថយចុះ តែបើប្រៀបធៀបនឹងខែមិថុនា គឺមានការថយចុះច្រើន។

ជាមួយគ្នានេះ លោក ងី មានហេង ក៏បានបញ្ជាក់ផងដែរថា ចំពោះចំនួនអ្នកស្លាប់ដោយសារជំងឺកូវីដ-១៩ ក្នុងខែកញ្ញានេះ ក៏ថយចុះច្រើនដែរ។ 

គួរបញ្ជាក់ថា បើតាមសេចក្ដីជូនព័ត៌មានរបស់ក្រសួងសុខាភិបាលចេញកាលម្សិលមិញ ថ្ងៃទី៣០ ខែកញ្ញានេះ ស្ដីពី ការសរុបស្ថានភាពជំងឺកូវីដ១៩ ក្នុងព្រះរាជាណាចក្រកម្ពុជា ដោយបានរកឃើញ អ្នកឆ្លងថ្មីចំនួន ៩៧៨ករណី នាំឱ្យការឆ្លងសរុបមានចំនួន ១១២,៦៥១ករណី។ អ្នកជំងឺព្យាបាលបានជាសះស្បើយមានចំនួន ៦០៥ករណី នាំឱ្យអ្នកព្យាបាលជាសះស្បើយសរុបមានចំនួន ១០២,៦៥១ករណី។ អ្នកស្លាប់មានចំនួន ១៧ករណី នាំឱ្យមានអ្នកស្លាប់សរុចចំនួន ២,៣១៩ករណី៕

អត្ថបទ​៖ ច័ន្ទ វីរៈ