ដើម្បីបំពេញបំណងសព! ជា វណ្ណារិទ្ធ ពាំនាំសំណូមពរទៅកាន់សាធារណជន កុំបង្ហោះរូប អ៊ុន សិទ្ធា ក្នុងសភាពឈឺធ្ងន់

ក្រោយប្រកាសដំណឹងមរណភាពតារាសម្តែងប្រុសឆ្នើម អ៊ុន សិទ្ធា មិនបានប៉ុន្មានផង វីដេអូដេកដួលលើគ្រែពេទ្យក្នុងស្ថានភាពស្គមស្គាំងរបស់លោកកាលកំពុងសង្គ្រោះព្យាបាល ក៏ត្រូវបានចែករំលែកពេញបណ្តាញផ្សព្វផ្សាយ និងទំនាក់ទំនងសង្គម។

តែដោយហេតុថាជាបំណងលោកកាលនៅរស់រានមានជីវិត ដោយពុំចង់ឱ្យមហាជនពិសេសអ្នកគាំទ្របានឃើញសភាពទ្រុឌទ្រោមរបស់លោកនាវេលាចុងក្រោយនៃជីវិត ទើបពិធីករពូកែវោហាស័ព្ទ ជា វណ្ណារិទ្ធ ចេញមុខជួសសាច់ញាតិលោក អ៊ុន សិទ្ធាផ្ទាល់ ដោយស្នើថា “សូមកុំបង្ហោះរូបបងធាឈឺ​ ជាការស្នេីរសុំពីក្រុមគ្រួសារគាត់​ ហេីយបងធាខ្លួនឯងក៏មិនចង់ឱ្យបងប្អូនឃេីញរូបភាពគាត់ឈឺដែរ​ គាត់ចង់ឃេីញរូបស្អាតៗ”។

លោក អ៊ុន សិទ្ធា ជាតារាសម្តែងប្រុសមានឈ្មោះបោះសំឡេងមួយរូបក្នុងវិស័យភាពយន្តខ្មែរប្រមាណជិត ២០ឆ្នាំមកនេះ ខណៈលោកធ្លាប់ជាតួប្រុសក្នុងភាពយន្តខ្នាតធំ រឿងភាគ ភាពយន្តប្រវត្តិសាស្ត្រ ក៏ដូចជាកិច្ចការងារផ្សេងទៀត ក្នុងវិស័យសិល្បៈ។

តែយ៉ាងណា ក្រោយថតបញ្ចប់ភាពយន្តខ្នាតធំ ២រឿងចុងក្រោយ លោក អ៊ុន សិទ្ធា ពិសេសគឺពេលដែលមរណភាពអ្នកម្តាយជាទីស្រលាញ់ហើយ លោកហាក់ឃ្លាតពីទស្សនិកជន ដោយពុំសូវមានវត្តមានលើកម្មវិធី ឬភាពយន្តណាមួយទៀតនោះទេ។ ជាងនេះទៅទៀត លោកក៏ធ្លាប់បង្ហើបពីបំណងស្ទាក់ស្ទើរនឹងចាកចេញពីអាជីពដែលខ្លួនស្រលាញ់ និងបានសាងកេរ្តិ៍ឈ្មោះប្រមាណ ២០ឆ្នាំ ដោយមិនបានលម្អិតពីរឿងរ៉ាវនៃបំណងចាកចេញនោះឡើយ។

បើរាប់ចាប់ពីវត្តមានរបស់លោកក្នុងភាពយន្តខ្នាតធំមួយ២-៣ឆ្នាំចុងក្រោយ លោកបានចូលរួមសម្តែងក្នុងខ្សែ​​ភាព​យន្ត​ភាគ​​ខ្នាត​​ធំមួយចំនួន ដូចជាក្នុងភាពយន្តខ្នាតធំរបស់លោក ហ្វៃ សំអាង រឿង​​​ «អប្សរា​មហាអង្គរ​​» ​​ដោយដើរតួជាព្រះ​​អង្គ​​ម្ចាស់​​ ​​វរនន្ទ​​ កាលពីឆ្នាំ២០២២។ ពិសេស បានចូលរួមសម្តែងក្នុងភាពយន្តប្រវត្តិសាស្ត្ររឿង «កូនប្រុស ក្រោមពន្លឺចន្ទពេញបូរមី» ដែលជាសាច់រឿងរៀបរាប់ពីជីវិតក្នុងសម័យសង្គ្រាមរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភាកម្ពុជា។

ខណៈក្រោយថតបញ្ចប់ និងបានចាក់ផ្សាយហេីយ លោកនៅតែដក់ចិត្តដែលមានឱកាសចូលរួមបង្ហាញសមត្ថភាពក្នុងភាពយន្តប្រវត្តិសាស្ត្រជាតិមួយនេះ និងធ្លាប់បង្ហាញអារម្មណ៍ផ្ទាល់ខ្លួនថា៖ ដ្បិតតែរឿងថតបញ្ចប់ និងចាក់ផ្សាយចប់ក៏ដោយ តែលោកនៅតែនឹក និងមាន​អនុស្សាវរីយ៍ជាច្រើនជាមួយអ្នករួមសម្តែង មិនថាតែជាមួយតួ​ក្រុមការងារ ជាពិសេស​លោក​ ហ៊ុយ​ វាសនា​ ហើយកាន់តែ​អស្ចារ្យ​សម្រាប់លោក គឺមាន​វាសនា​ខ្ពស់ណាស់បានជួប​សម្តេចតេជោដោយផ្ទាល់ និងបានការណែនាំពីលោកផ្ទាល់​ ពីបុគ្គលិកលក្ខណៈ​របស់តួអង្គ (ធី) ព្រមទាំងបងវាសនាផងដែរ ដែលសុទ្ធសឹងតែអ្នកផ្តល់ឱកាស និងមេីលឃេីញ​ពី​សមត្ថភាព​របស់​លោក។

ជុំវិញដំណឹងមរណភាពនេះ ទាំងសាធារណជន និងអ្នកសិល្បៈ បានសម្តែងការស្លុតចិត្តជាពន់ពេក និងបានបង្ហោះសារព្រោងព្រាតបង្ហាញការសោកស្តាយចំបោះការបាត់បង់ អ្នកមានទេពកោសល្យ និងជាមិត្តសិល្បៈដ៏ល្អមួយរូបដោយមិនបានលា។ បើតាមអ្នកស្រី ចន ច័ន្ទលក្ខិណា លោក​ទទួលមរណភាពដោយសារជំងឺដំបៅក្រពះ ពោះវៀនធ្ងន់ធ្ងរ និងមានទឹកដក់ក្នុងពោះ។

មរណភាពរបស់លោក អ៊ុន សិទ្ធា មិនមែនត្រឹមតែដំណឹងដ៏សោកសៅសម្រាប់អ្នករួមអាជីព និងក្រុមគ្រួសារប៉ុណ្ណោះទេ សូម្បីតែសាធារណជនដែលជាអ្នកគាំទ្រតារាប្រុសឆ្នើមរូបនេះ ក៏បង្ហាញក្តីសោកសង្រែងជាពន់ពេកផងដែរ ក៏ព្រោះតែពុំធ្លាប់លេចឭដំណឹងស្ថានភាពសុខភាពមិនល្អណាមួយរបស់លោកទាល់តែសោះ ហើយសុខៗស្រាប់តែបានទទួលដំណឹងស្លុតចិត្តភ្លាមៗនេះទៅវិញ។ ខណៈសូម្បីតែមិត្តសិ្នតស្នាលនឹងតារាប្រុសឆ្នើមរូបនេះ គឺលោក សឿន វីតា ក៏ពុំបានទទួលដំណឹងថាមិត្តខ្លួនធ្លាក់ខ្លួនឈឺរហូតដេកស្លាប់លើគ្រែពេទ្យនោះដែរ។ លោក សឿន វីតា បញ្ជាក់ថា លោក អ៊ុន សិទ្ធា ចូលសង្គ្រោះបន្ទាន់ និងសម្រាកពេទ្យ ៥ថ្ងៃ តែបែរជាលាក់បាំងមិនប្រាប់មិត្តសោះឡើយ៕