ដឹងអត់! ហេតុអ្វី Khaby Lame ទាក់ទាញប្រជាប្រិយភាពបំផុតនៅលើ TikTok?

អ្នកលេង TikTok តិចណាស់ដែលមិនស្គាល់ឈ្មោះរបស់ Khaby Lame។ គាត់ជាតារា TikTok  ល្បីបំផុតដែលគ្រប់គ្នាស្គាល់ថាជា “ពូម៉ៅងាយៗ” តាមរយៈវីដេអូមិននិយាយស្ដីមួយម៉ាត់ ហើយមានតែប៉ុន្មានវិនាទីប៉ុណ្ណោះ ក៏អាចទាក់ទាញការចុច Like ដល់ទៅរាប់លាននាក់ឯណោះ។

គិតត្រឹមថ្ងៃទី ២៧ ខែកក្កដា ឆ្នាំ២០២១នេះ គណនី TikKok របស់ Khaby Lame​ ​មានអ្នក Follow កើនឡើងដល់ ៩៥.៨ លាននាក់ទៅហើយ។ បើប្រៀបធៀបរយៈពេលដែលគាត់ចាប់ផ្ដើមបង្កើតវីដេអូ TikTok ដំបូង នេះជារយៈពេលដ៏ខ្លីដែលគេចាត់ទុកជាភាពជោគជ័យធំមួយនៅលើអនឡាញ។

ចំណាយពេលប្រមាណមួយឆ្នាំប៉ុណ្ណោះ បុរសដែលធ្លាប់ជាកម្មករក្នុងក្រុមហ៊ុនផលិតសម្ភារឌីជីថលមួយ បានប្រែក្លាយជាបុគ្គលមានប្រជាប្រិយបំផុតនៅលើបណ្ដាញសង្គម ជាពិសេស​ TikTok តែម្ដង។

Khaby ឆក់បានប្រជាប្រិយភាពពីទស្សនិកជនគ្រប់ទិសទីទូទាំងពិភលោក ដោយសារភាសាកាយវិការក្នុងវីដេអូរបស់គាត់។ វីដេអូទាំងអស់មិនប្រើភាសាណាមួយសម្រាប់និយាយនោះទេ តែអ្នកទស្សនាគ្រប់ជាតិសាសន៍អាចយល់បានពីអ្វីដែលគាត់ចង់បង្ហាញទៅកាន់ពួកគេ។

ភាពស្ងៀមស្ងាត់នៃពាក្យសម្ដី ដោយប្រើអារម្មណ៍បង្ហាញលើទឹកមុខ បានក្លាយជាគន្លឹះនាំគាត់ឱ្យឈ្នះចិត្តលើទស្សនិកជនរាប់លាននាក់។ មួយទៀតសោត វីដេអូរបស់បុរសវ័យ ២៤ឆ្នាំរូបនេះ បានបង្ហាញនូវដំណោះស្រាយដែលគេគ្រប់គ្នាយល់ថាស្មុគស្មាញ មកជារឿងសាមញ្ញៗវិញ។ នៅចុងបញ្ចប់នៃវីឌីអូ Khaby តែងប្រើកែវភ្នែកបញ្ជាក់អ្នកមើល បូករួមនិងគ្រវីក្បាលតិចៗ ហើយលាតដៃ ដោយចង់សួរអ្នកដែលតែងតែធ្វើឱ្យជីវិតស្មុគស្មាញទាំងអស់ថា “ហេតុអ្វីបានជាអ្នកមិនអាចធ្វើបាន?” ឬ “មើលចុះ! វាជារឿងងាយទេ!”។

នេះហើយជាវិធីសាស្ត្រដែលបុរសសាមញ្ញម្នាក់ បានក្លាយជាមនុស្សម្នាក់ដែលមានប្រជាប្រិយបំផុតនៅលើអ៊ីនធរណិត ដោយមិនប្រើឧបករណ៍ថ្លៃៗ ប្រើពេលរូបភាពកាត់តសាំញ៉ាំ ឬបញ្ចូលភ្លេងអ្វីឡើយ ក្រៅតែពីស្មាតហ្វូនមួយ និងកាត់តតិចតួចប៉ុណ្ណោះ៕

ប្រែសម្រួល៖ សន្យា

ប្រភព៖ Bright Side

ចុចអាន៖ រឿង ៩ យ៉ាងអ្នកទំនងមិនទាន់ដឹងអំពី Khaby Lame ឬ ពូម៉ៅងាយៗ

ចុចអាន៖ ត្រឹមវីដេអូមិនដល់មួយនាទីលើ TikTok លោក Khaby Lame រកចំណូលបានរាប់ម៉ឺនដុល្លារ