អតីតតារាភាពយន្តខ្មែរ ៣ ជំនាន់ អ្នកស្រី កែវ មន្ថា ទទួល​មរណភាពក្នុងវ័យ ៧៧ ឆ្នាំ

នេះជាដំណឹងមរណទុក្ខដ៏ក្រៀមក្រំហើយ សោកសៅបំផុតសម្រាប់ក្រុមគ្រួសារអតីតតារាភាពយន្តខ្មែរ ៣ ជំនាន់គឺអ្នកស្រី កែវ មន្ថា បានទទួលមរណភាពក្នុងអាយុ៧៧ឆ្នាំ។ នេះបើយោងតាមការបញ្ជាក់របស់ក្រុមព្រះសុរិយា។

អ្នកស្រី កែវ មន្ថា ដែលជាអតីតសិល្បការិនីខ្មែរ ៣ ជំនាន់បានទទួលមរណភាពទៅកាលពីរាត្រីថ្ងៃទី ១០ ខែវិច្ឆិកា ឆ្នាំ២០២១នេះ ក្នុងជន្មាយុ៧៧ ឆ្នាំ ដោយរោគាពាធ។ អ្នកស្រី កែវ មន្ថា គឺជាសិល្បការិនីដ៏ឆ្នេី មមួយរូបនៃកម្ពុជាដែលពោពេញដោយសមត្ថភាព ទេពកោសល្យ និងស្នាដៃ។ ការបាត់បង់នេះ គឺជាបាត់បង់ធនធានដ៏កម្រមួយរូបប្រចាំវិស័យសិល្បៈទី៧ នៃជាតិខ្មែរ។

ប្រភពបានបញ្ជាក់ថា អតីតតារាភាពយន្តអ្នកស្រី កែវ មន្ថា បានសម្តែងក្នុងរឿងដូចជា រឿងសង្សារឧត្ដមដួងចិត្ត រឿង សំណើចចំអកនៃព្រហ្មលិខិត រឿងគូកម្មទេបង រឿងជំនោរកំពូលភ្នំ រឿងចិត្តម្តាយ និងរឿងជាច្រើនទៀតផងដែរ។តាមរយ:ដំណឹងនេះដែរគេឃើញមហាជនជាច្រើនបានចូលរួមរំលែកទុក្ខដ៏ក្រៀមក្រំនេះ។

ដោយឡែកបទចម្រៀងវិញមានដូចជាបទមួលភ្លៅ បទមិនយកទេប្តីចាស់ បទគេហើយនិងបង បទថើបមកចុះជាដើម។លើសពីនេះទៀតអ្នកស្រី កែវ មន្ថា គឺជាម្ចាស់ពានរង្វាន់អប្សរាប្រចាំឆ្នាំ ១៩៦៤ ប្រទានដោយព្រះបាទសម្តេច ព្រះនរោត្តមសីហនុ តាមរយៈខ្សែភាពយន្តមួយរឿងដ៏ល្បីល្បា ញលំដាប់ថ្នាក់ជាតិគឺរឿង«សង្សារឧត្តមដួងចិត្ត» ដែលមានអមដោយចម្រៀងបទ«ខ្យល់កំពូលភ្នំ» បកស្រាយដោយអ្នកស្រីផ្ទាល់តែម្តង៕

អត្ថបទ៖ ចាន់រ៉ា