ជីវិតកម្សាន្ដ

នាយ ចឺម ប្រកាសថា ម្ដាយកំណត់ពេល ២ ឆ្នាំទៀត ឲ្យយកប្រពន្ធ

បានផុស

៣ years មុន

នៅ

ថ្ងៃពុធ ៧ ធ្នូ ២០២២

ដោយ

លោក សុខ មេសា ហៅនាយ ចឺម ជាតារាចម្រៀងវ័យក្មេងសំឡេងបាន បើនិយាយពីរឿងស្នេហាគិតមកដល់ពេលនេះលោកបានឆ្លងកាត់ការបែកបាក់សង្សារចំនួន ៤ នាក់មកហើយ ដែលនារីទាំងនោះសុទ្ធសឹងតែស្រីស្អាតក្នុងចង្កោមសិល្បៈដូចគ្នា។

សម្រាប់នារីជាសង្សារទី ៤ របស់នាយ ចឺម ដែលទើបប្រកាសពីដំណឹងបែកបាក់កាលពីថ្មីៗកន្លងទៅនេះ ត្រូវបានគេស្គាល់គ្រប់គ្នាគឺអ្នកមេម៉ាយសាច់ខ្ចី សេង សុខឃីម។ ការបែកបាក់នេះបានធ្វើឲ្យគេយល់ថា នាយ ចឺម ជាបុរសចិត្តសាវា និងមានស្នេហាច្រើន ខណៈត្រឹមរយៈពេលខ្លីលោកប្ដូរសង្សាររហូតដល់ទៅ ៤ នាក់ ដោយមិនខ្វល់ការរិះគន់របស់មហាជន។

ជាមួយគ្នា នៃការចាប់អារម្មណ៍លើរឿងរ៉ាវ នាយ ចឺម មានស្រីច្រើន មិនដឹងស្មោះនារីមួយណាពិតប្រាកដនោះ ស្រាប់តែតារាចម្រៀងម្ចាស់បទ “មនុស្សប្រុសមានសង្សារច្រើនមិនមែនសុទ្ធតែសាវា” នាយ ចឺម បានទម្លាយថា ម្ដាយខ្លួនបានទុកពេលឲ្យត្រឹម ២ ឆ្នាំទៀតទេ ត្រូវការប្រពន្ធ។ ខណៈមានមតិលើកឡើងថា ប្រសិនបែបនេះមែន ប្រហែលមានមនុស្សស្រីច្រើនអាចខូចចិត្តព្រោះរឿងនេះ។

ជាក់ស្ដែងតារាចម្រៀងប្រុសសម្បូរស្នេហ៍នាយ ចឺម ក៏បានបង្ហោះរូបភាពមួយសន្លឹកថតជាមួយអ្នកម្ដាយជាទីស្រលាញ់ដោយខ្លឹមសារខ្លីថា «អ្នកម្ដាយខ្ញុំគាត់និយាយប្រាប់ថា ២ ឆ្នាំទៀត គាត់ឲ្យខ្ញុំយកប្រពន្ធហើយបងប្អូន»។ ប៉ុន្តែយ៉ាងណាមិញចំពោះការលើកឡើងនេះ គេពុំទាន់ដឹងទេថា ជាការពិត ឬគ្រាន់តែសម្ដីលេងសើចពីសំណាក់នាយ ចឺម ដើម្បីពញ្ញាក់អារម្មណ៍អ្នកគាំទ្រខ្លួន៕

អត្ថបទ ៖ ចាន់រ៉ា