ជីវិតកម្សាន្ដ

ជួបទុក្ខផ្ទួនៗ អតីតអ្នកបញ្ចូលសំឡេងតួឯករឿង “ទិនហ្វី” មានជំងឺប្រចាំកាយ ថែមចៅកើតមហារីកគ្រាប់ឈាម

បានផុស

៦ ខែ មុន

នៅ

ថ្ងៃព្រហស្បតិ៍ ៥ តុលា ២០២៣

ដោយ

នឹកឃើញដល់តួសម្តែងបែបកំប្លុកកំប្លែងល្បី ឈ្មោះក្នុងខ្សែភាពយន្តរឿងហុងកុង ទិនហ្វី មហាជនច្បាស់ជាស្គាល់គ្រប់គ្នាមិនខាន។ ចំណែកអ្នកដែលប្រើសំឡេងបញ្ចូលកាន់តែមានរស់ជាតិស៊ីសង្វាក់ទៅនឹងសាច់រឿងនោះប្រហែលជាមានទស្សនិកជនខ្លះបានស្គាល់ និងខ្លះទៀតមិនទាន់ស្គាល់នៅឡើយទេ។

ប្រាកដណាស់លោក ជា ចាន់ប៉ូ គឺជាអតីតអ្នកបញ្ចូលសំឡេងល្បីឈ្មោះនៅក្នុងរឿង “ទិនហ្វី” នៅក្នុងខ្សែភាពយន្តចិនហុងកុងដ៏ល្បីពីទតវត្សន៍ឆ្នាំ ៩០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទស្សនិកជនដែលបានធ្លាប់ទស្សនាខ្សែភាពយន្តរឿងដែលលោក ជា ចាន់ប៉ូ បញ្ចូលសំឡេងបានសេីចសប្បាយរីករាយរំលាយអស់ទុក្ខកង្វល់តាមរយ:ទេពកោសល្យនៃទឹកដមសំឡេង និងចងចាំសំឡេងរបស់គាត់នៅពេលមានទុក្ខសោកនឹកដល់ឈ្មោះទិនហ្វី គឺនឹកដល់សម្លេងលោក ជា ចាន់ប៉ូ។

បើតាមការផ្សព្វផ្សាយពីក្រុមព្រះសូរិយា បានលើកពីខ្សែជីវិតពិតនៃអ្នកប្រកបមុខរបបលេីវិថីសិល្បៈទី ៧ លោក ជា ចាន់ប៉ូ ដែលបានចាប់អាជីពជាអ្នកបញ្ចូលសម្លេងដាក់ក្នុងភាពយន្តបរទេសមានដូចជា, ចិន អាមេរិចកាំង ថៃ កូរ៉េ ក្រោយថ្ងៃជ័យជម្នះ ៧ មករា ឆ្នាំ១៩៧៩ ដែលសំឡេងរបស់គាត់បញ្ចូលបានធ្វេីឲ្យទស្សនិកជនបានស្គាល់យ៉ាងច្បាស់ក្នុងខ្សែភាពយន្តហុងកុងគឺលោកទិនហ្វី។

លោក ជា ចាន់ប៉ូ បញ្ចប់អាជីពជាអ្នកបញ្ចូលសំឡេង ដោយសារតែលោកមានជំងឺប្រចាំកាយមិនអាចព្យាបាលបានហេីយត្រូវការចំណាយយ៉ាងច្រេីនក្នុងការទិញថ្នាំពេទ្យ ដេីម្បីអាចបន្តជីវិតបានទៅមុខទៀត។ ភារកិច្ចរ៉ាប់រងបន្ទុកគ្រួសារធ្លាក់លេីភរិយារបស់លោកទាំងស្រុង ដែលបានឆ្លៀតទៅធ្វេីការងារនៅភោជនីយដ្ឋានដេីម្បីបានប្រាក់ខ្លះយកមកទប់ការចំណាយថ្លៃថ្នាំពេទ្យ ការហូបចុកដោយទុកឲ្យលោកនៅផ្ទះជាមួយចៅប្រុសម្នាក់ជាអ្នកមេីលថែរក្សាលោកជំនួសភរិយានិងកូនៗ។

ប៉ុន្តែអកុសលក្រៅពីលោកមានជំងឺប្រចាំកាយ ស្រាប់តែថ្មីៗចៅប្រុសដែលតែងតែនៅតាមមេីលថែបាយទឹកព្រឹកល្ងាច ដែលមានអាយុត្រឹមតែ ១១ ឆ្នាំ កើតជំងឺមហារីកគ្រាប់ឈាមក្រហមបច្ចុប្បន្នកំពុងសម្រាកព្យាបាលនៅមន្ទីរពេទ្យគន្ធបុប្ផាទី២។

សម្តីដែលកាន់តែឆួលអារម្មណ៍ដោយសោកសង្រេងបំផុត លោក ជា ចាន់ប៉ូ ពោលថា បេីសិនជាយមរាជត្រូវការជីវិតលោកព្រមប្រគល់ជូនសូមកុំយកជីវិតចៅប្រុសរបស់គាត់។

ក្រុមព្រះសូរិយា ក៏បានបង្ហាញពីលេខទូរសព្ទរបស់គាត់ ដើម្បីប្រិយមិត្តអាចចូលរួមផ្តល់ជំនួយសម្រាប់ផ្តល់ដល់អតីតអ្នកបញ្ចូលសំឡេងដ៏ល្បីឈ្មោះមួយនេះតាមរយៈលេខ ០១២ ៦៦៤ ៤៦៧៕

អត្ថបទ៖ ចានរ៉ា

Related Topics:លោក ជា ចាន់ប៉ូ