ជីវិតកម្សាន្ដ

ហ៊ិន ច័ន្ទនីរ័ត្ន ៖ កូនមានសំណាងខ្លាំងណាស់ទទួលបានការអាណិតស្រលាញ់ពី សម្ដេចពុក សម្ដេចម៉ែ

បានផុស

១ សប្តាហ៍ មុន

នៅ

ថ្ងៃព្រហស្បតិ៍ ២៦ តុលា ២០២៣

ដោយ

តារាសម្តែង និងជាពិធីការិនីរូបស្រស់សម្បូរវោហារស័ព្ទមិនចេះរីងស្ងួតប្រចាំស្ថានីយទូរទស្សន៍បាយ័ន កញ្ញា ហ៊ិន ច័ន្ទនីរ័ត្ន បានបង្ហាញអារម្មណ៍រំភើបខ្លាំង និងសម្តែងក្តីគោរពអរគុណជូនចំពោះសម្តេចទាំងទ្វេ ដែលសម្រេចរៀបចំឲ្យរូបនាង និងលោក ឌី ពេជ្រ ចូលរោងការតាមប្រពៃណីក្នុងពេលឆាប់ៗ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីការិនីល្បីឈ្មោះ និងមានប្រជាប្រិយភាព ហ៊ិន ច័ន្ទនីរ័ត្ន លើកឡើងថា នាងពិតជាមានសំណាងខ្លាំងដែលទទួលបានការអាណិតស្រលាញ់ពី សម្តេចតេជោ ហ៊ុន សែន ដើម្បីចូលរួមឲ្យមានការចូលស្ដីដណ្ដឹង និងរៀបការតាមប្រពៃណីជាមួយលោក ឌី ពេជ្រ។

កញ្ញា ហ៊ិន ច័ន្ទនីរ័ត្ន បានបញ្ជាក់ថា «កូនគោរពអរគុណ សម្តេចពុក ដ៏ខ្ពង់ខ្ពស់បំផុត កូនមានសំណាងខ្លាំងណាស់ដែលទទួលបានការអាណិតស្រលាញ់ពី សម្តេចពុក សម្តេចម៉ែ»។ តាមរយៈដំណឹងនេះដែរ ក៏មានអ្នកគាំទ្រមួយចំនួនធំ បានចូលរួមអបអរ និងជូនពរដល់គូស្នេហ៍ពិធីការិនី ហ៊ិន ច័ន្ទនីរ័ត្ន និងលោក ឌី ពេជ្រ ផងដែរ។

សូមជម្រាបថា ព្រឹកមិញ សម្តេចតេជោ ហ៊ុន សែន បានមានប្រសាសន៍ថា «ដើម្បីជៀសវាងមាត់ចាបមាត់ព្រាបដូចពាក្យចាស់លោកពោលថា មាត់វែងជាងផ្លូវ ជុំវិញកូនប្រុស ឌី ពេជ្រ និងកូនស្រី ហ៊ិន ច័ន្ទនីរ័ត្ន។ ក្នុងឋានៈជាឪពុកធំ កូនពេជ្រ ខ្ញុំត្រូវតែចូលរួមរៀបចំឲ្យកូនទាំងពីរបានចូលរោងការតាមប្រពៃណី»។

ជាមួយនេះ សម្តេចតេជោ បានបញ្ជាក់ថា «ថ្ងៃស្អែក ២៧ តុលា ២០២៣ ឪពុកម្តាយខាងប្រុសចូលស្តីដណ្តឹងកូនស្រី។ ថ្ងៃ ២២ ខែធ្នូ ២០២៣ កំណត់ជាថ្ងៃរៀបការដែលគ្រួសារទាំងសងខាង និងសាមីខ្លួន បានយល់ស្របតាមខ្ញុំដែលជាអាចារ្យធំរៀបចំពេលវេលាបែបនេះ»។