ជីវិតកម្សាន្ដ

ដួង ម៉ានិច ប្រកាសឆន្ទៈ ថ្ងៃរៀបមង្គលការមិនទទួលទានគ្រឿងស្រវឹង

បានផុស

១ year មុន

នៅ

ថ្ងៃពុធ ៣១ មករា ២០២៤

ដោយ

តារាសម្ដែងរាងតូចច្រឡឹង កញ្ញា ដួង ម៉ានិច ស្ងាត់ៗ ស្រាប់តែបង្ហើបប្រាប់ថ្ងៃជិតចូលរោងការជាមួយគូស្នេហ៍រូបសង្ហាវ័យប្រហែលគ្នា ខណៈនាងក៏ប្រកាសឆន្ទៈថា ក្នុងថ្ងៃរៀបមង្គលការខ្លួន គឺមិនមានការទទួលទានគ្រឿងស្រវឹងទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កញ្ញា ដួង ម៉ានិច បានបញ្ជាក់នៅក្នុងកិច្ចសម្ភាសន៍មួយថា សម្រាប់ពិធីមង្គលការរបស់នាង គ្រោងធ្វើឡើងនៅអំឡុងខែមេសា ឬ ដើមខែឧសភា ឆ្នាំ ២០២៤ ខាងមុខ។ នាងបន្តថា ដោយសារតែពេលវេលាខើចពេក ទើបមង្គលការរបស់នាង និងគូស្នេហ៍ រៀបចំបែបអឺរ៉ុប ប៉ុន្តែក៏មិនរំលងប្រពៃណីខ្មែរដែរ ហើយនៅក្នុងពិធីនេះបានរៀបចំរបៀបខ្មែរខ្លះផងដែរ ជាពិសេសការរៀបចំលាងបាតជើងឪពុកម្ដាយ។

កញ្ញា ដួង ម៉ានិច បាននិយាយបន្តថា «ថ្ងៃមង្គលការខ្ញុំ គឺយើងអត់មានដាក់ស្រាទេ(គ្រឿងស្រវឹងទេ) ព្រោះតែមូលហេតុ បើយើងដាក់ស្រាទៅតាមដែលរៀនធម៌គឺមានបាប ដូច្នេះទើបយើងមិនចង់ប្រព្រឹត្ត ឬដាក់ក្នុងកម្មវិធីមង្គលនេះតែម្ដង ហើយមួយវិញទៀតដោយសារការពិសាគ្រឿងស្រវឹងបណ្ដាលឲ្យមានបញ្ហាគ្រោះថ្នាក់ចរាចរណ៍កើតឡើង»។

តារាស្រី ដួង ម៉ានិច ក៏បានបញ្ជាក់ទៀតថា ពាក់ព័ន្ធការមិនដាក់គ្រឿងស្រវឹងនេះដែរ នាងមានគម្រោងជម្រាបប្រាប់ភ្ញៀវដែលចូលរួមអំពីដំណឹងនេះឲ្យពួកគាត់បានដឹងមុន និងសុំទោសពួកគាត់សម្រាប់រឿងនេះ។

សូមបញ្ជាក់ថា តារាសម្តែង ដួង ម៉ានិច និងគូស្នេហ៍ឈ្មោះ ពុទ្ធី ឆាត ឬ ហ៊ាឆាត ដែលជាអ្នកផលិតមាតិកាតាមយូធូបដ៏ល្បីម្នាក់នោះ គឺបានទាក់ទងមើលចិត្តគ្នា និងចាប់ផ្ដើមស្រឡាញ់គ្នារយៈពេលប្រហែលជិតកន្លះឆ្នាំ រហូតឈានដល់ការសម្រេចចិត្តដឹកដៃគ្នាចូលរោងការ៕

អត្ថបទ ៖ ចាន់រ៉ា