ពេជ្រ វត្តីសារ៉ាវឌ្ឍី បញ្ជាក់ថា អនាគតខ្លួននឹងផ្តល់ឱកាសឲ្យអ្នក Make up ផ្សេងទៀតធ្វើការជាមួយ

ស្របពេល​មាន​ការ​វែកញែក​ក្រោយ​បវរកញ្ញាកម្ពុជា ពេជ្រ វត្តីសារ៉ាវឌ្ឍី ម្ចាស់​មកុដ Miss Grand Cambodia ២០២២ បាន​ប្រកាស​​បង្ហាញ​​មុខ​អ្នក Make upសំខាន់ ៥ នាក់ ប្រចាំខ្លួន​នឹង​​លើក​ឡើង​ថា ក្រៅ​ពីបុគ្គល ៥នាក់ នេះខ្លួន​មិន​ទទួល​យកអ្នក​​ផ្សេង​ឲ្យ​ផាត់មុខនោះ ពេល​នេះ​សាមីខ្លួន​បានចេញមកបញ្ជាក់ច្បាស់ៗហើយ។

ជាការ​ស្រាយ​ចម្ងល់​និង​បញ្ចៀស​ការ​យល់​ច្រឡំ ឬការ​រិះគន់មកលើខ្លួន កញ្ញា ពេជ្រ វត្តីសារ៉ាវឌ្ឍី បាន​បញ្ជាក់​ថា សម្រាប់​ពេល​អនាគត​នាង​ក៏ចង់​ធ្វើ​ការជាមួយអ្នកផ្សេង​ដែ​រ បើ​មានឱកាស ព្រោះ​​នាងជឿថា ប្រទេស​យើងសម្បូរ​ទៅដោយអ្នកmake upដែល​មាន​សម្ថភាព​ច្រើន និង​​មាន​វិជ្ជាជីវៈ​ត្រឹមត្រូវ​ ជាពិសេស​គឺ​មាន​ក្តីស្រលាញ់​ហើយនៅមានអ្នកល្អ​ៗច្រើនទៀតដែលនាង​តែងតែ​ធ្វើ​ការរួមជាមួយទោះ​មិន​បាន​ញឹកញាប់​។

វត្តីសារ៉ាវឌ្ឍី បាន​និយាយ​ទៀត​ថា «ទោះបីខ្ញុំមិន​បាន​រូប​ពួកគាត់​ក្នុងផុស​ក៏​ពួកយើងតែងតែ​ធ្វើការរួមគ្នាដោយក្តីស្រលាញ់ និងរាប់អានគ្នារហូតមកដែរ»។ ការ​លើក​ឡើង​របស់​បវរកញ្ញា​រូបនេះ​​បន្ទាប់​ពី​ការ​បង្ហោះ​របស់នាងដោយប្រកាសថា ក្រៅតែ​ពីអ្នកmake upប្រចាំ​ខ្លួននាង​ចំនួន ៥នាក់ គឺនាង​មិនឲ្យអ្នកផ្សេងផាត់មុខនាងឡើយ។

ផ្អែក​តាម​ខ្លឹមសាររបស់ ពេជ្រ វត្តីសារ៉ាវឌ្ឍី ដែល​បាន​បង្ហោះពីដំបូងបានលើកឡើងថា «ចំពោះបញ្ហាដែលបាន​កើតឡើងដដែលៗ​ចំពោះនាង​ខ្ញុំថ្ងៃនេះ នាងខ្ញុំសូមជូនដំណឹង​មួយនេះទៅកាន់បងប្អូន​ទាំងអស់គ្នា​ក៏ដូច​បណ្តាក្រុមហ៊ុន​ដែលតែងតែ​មេត្តា​និង​ផ្តល់​ឱកាស​ការងារ​ចំពោះនាង​ខ្ញុំទាំងអស់​គឺពួកគាត់ទាំង ៥នាក់​នេះគឺជាអ្នកmake up ផ្ទាល់ខ្លួន​របស់នាង​ខ្ញុំទាំងអស់​ដែល​បានធ្វើការ​ផាត់មុខជូន​ខ្ញុំតាំងពីខ្ញុំមិនទាន់​មានអ្នកស្គាល់រហូតមកដល់សព្វថ្ងៃនេះ»។

នាង​បន្ត​ទៀត​ថា «​ពួកគាត់មាន​ភាពunique ហើយស្អាត​ម្យ៉ាង​ម្នាក់​​នៅក្នុងការ Make upហើយ​ចំណុច​ពិសេសរបស់គាត់​ដែល​ធ្វើ​ឱ្យ​នាងខ្ញុំ​គោរពស្រលាញ់ ពួកគាត់មានវីជ្ជាជីវៈ​ការងារ​ត្រឹមត្រូវ ធ្វើការភ្ជាប់ទៅដោយ​សេចក្តីថ្លៃថ្នូរ និងច្បាស់លាស់ ដូច្នេះដោយ​ក្តីគោរព​​ចំពោះ​បណ្តាក្រុមហ៊ុន​ដែលបានផ្តល់ឱកាស​ការងារ​ដល់ប្អូន​ទាំងអស់ សូម​រាប់​ចាប់ពីថ្ងៃនេះ​ទៅ​គ្រប់ការងារទាំងអស់នាងខ្ញុំនិងមិនទទួលការ make up ពី​អ្នកផ្សេង​ក្រៅពីពួកគាត់ឡើយ»។

ពេជ្រ វត្តីសារ៉ាវឌ្ឍី បន្ថែម​ថា «​សូម​ឱ្យបងបងទាំង​អស់គ្នា​ធ្វើ​ការ​អនុគ្រោះ​និង​យល់​យោគ​ចំពោះ​​បញ្ហា​នេះ​​ហើយ​ការប្រកាសបែបនេះ គឺក្នុងគោល​បំណង​ជៀសវាង​រាល់បញ្ហា​ផ្សេងៗដែល​កើត​មានរវាង​នាងខ្ញុំ និងមនុស្សដែល​​នាងខ្ញុំមិនស្គាល់​ធ្វើ​ឱ្យប៉ះពាល់​ដល់កិត្តិយស​នាង​​ខ្ញុំផ្ទាល់​​ ប៉ះពាល់​ដល់​​ការងារ​ទាំងអស់ក៏ដូចជាសង្គមជាតិដែរ។ សង្ឃឹម​ថា​បង​ៗម្ចាស់ក្រុមហ៊ុន​ទាំងអស់ធ្វើការ​អនុគ្រោះ​ក៏ដូចជា​ការ​យោគយល់ក្នុងរឿងមួយនេះ»៕

អត្ថបទ៖ ចាន់រ៉ា