ពេជ្រ វត្តីសារ៉ាវឌ្ឍី បញ្ជាក់អត្តសញ្ញាណជាខ្មែរភ្លាម ក្រោយអ្នកផាត់មុខវៀតណាម ច្រឡំថាជាបវរកញ្ញាផ្ទះលេខ២

ទស្សនិកជនអ្នកគាំទ្រមានការចាប់អារម្មណ៍ជាថ្មីមកលើបវរកញ្ញាលំដាប់រងទី២ នៃកម្មវិធី Miss Universe Cambodia 2025 កញ្ញា ពេជ្រ វត្តីសារ៉ាវឌ្ឍី បន្ទាប់ពីមានការចែករំលែកវីដេអូមួយ ដែលវត្តី ឆ្លើយតបមិនស្ទាក់ស្ទើរក្រោយអ្នក Make up វៀតណាមច្រឡំនិយាយភាសាផ្ទះលេខ២។

កាលពីថ្មីៗកន្លងទៅ បវរកញ្ញា ពេជ្រ វត្តីសារ៉ាវឌ្ឍី ត្រូវបានអញ្ជើញចូលរួមនៅក្នុងកម្មវិធី Fashion Show ដ៏ធំនៅប្រទេសវៀតណាម ដើម្បីដើរបង្ហាញម៉ូដក្នុងនាមបវរកញ្ញាតំណាងកម្ពុជា ខណ:ក្នុងដែរ ក៏មានបវរកញ្ញាកម្ពុជា ៣រូបទៀតត្រូវបានអញ្ជើញចូលរួមផងដែរគឺកញ្ញា អុិន លក្ខិណា, ហុក សារីតុលា និងកញ្ញា Melia ។

ទន្ទឹមគ្នានឹងការបង្ហាញវត្តមាននៅលើទឹកដីវៀតណាម ក្នុងកម្មវិធី Fashion Show លំដាប់អន្តររជាតិនេះដែរ រឿងដែលទស្សនិកជនចាប់អារម្មណ៍ថែមទៀតនោះ គឺឃើញក្រុមអ្នក Make up របស់វៀតណាម បានជួយតុបតែងខ្លួនឱ្យស្រីស្អាត ពេជ្រ វត្តីសារ៉ាវឌ្ឍី ហើយស្រាប់តែនិយាយជាភាសាថៃដោយយល់ច្រឡំថានាងជាបវរកញ្ញាផ្ទះលេខ២ ប៉ុន្តែភ្លាមនោះ វតី្ត ក៏បានឆ្លើយតបអរគុណជាភាសាអង់គ្លេស និងភាសាខ្មែរវិញនិងបញ្ជាក់ប្រាប់ថា នាងជាជនជាតិខ្មែរ។

អ្នកគាំទ្រ ពេជ្រ វត្តីសារ៉ាវឌ្ឍី បានលើកឡើងដែរថា “បងជាង Makeup ស្មានតែពួកផ្ទះលេខ២ ខំនិយាយភាសាផ្ទះលេខ២ ដាក់វត្តី មានណា វត្តីនិយាយភាសាខ្មែរដាក់ហើយប្រាប់ថាគាត់ជាខ្មែរ នែ៎ គេជាកូនខ្មែរ កុំច្រឡំណាក៏មិនភ្លេចលើកមុខប្រទេសដែរ ស្រលាញ់ត្រង់ហ្នឹង”។ តាមរយ:ទង្វើរនេះបានធ្វើឲ្យមហាជនជាច្រើនកាន់តែបង្ហាញការគាំទ្រ និងសរសើរចំពោះកញ្ញា ពេជ្រ វត្តីសារ៉ាវឌ្ឍី ថែមទៀត៕ ចាន់រ៉ា