ស្គាល់គ្នាជិត ២០ឆ្នាំ! ខាន់ជេមស៍ រម្លឹកមិត្តភាពមិនប្រួលប្រែជាមួយឧកញ៉ា ខេមរៈ សិរីមន្ត

តាមរយៈការទម្លាយរូបភាព​ ១សន្លឹកបង្ហាញពីការ​​ស្វាគមន៍គ្នាយ៉ាង​ស្និទ្ធស្នាល និង​កក់ក្តៅរវាងកំពូលតារាចម្រៀង ២រូប គឺ ឧកញ៉ា ខេមរៈ សិរីមន្ត និង លោក ខាន់ ជេមស៍  កំពុង​ផ្ទុះ​ការ​ចាប់អារម្មណ៍​ព្រមទាំង​ការសរសើរពី​សំណាក់​អ្នកគាំទ្រដែលប្រើប្រាស់បណ្តាញសង្គមហ្វេសប៊ុកជាថ្មីម្តងទៀត។

ជាក់ស្តែងនៅលើបណ្តាញ​សង្គមហ្វេសប៊ុករបស់តារា​ចម្រៀងលោក ខាន់ ជេមស៍ មុន​នេះ​បានបង្ហោះ​រូបភាព ១សន្លឹងដោយ​ភ្ជាប់ការ​លើកឡើងពី​អនុស្សាវរីយ៍​នៃ​ការ​រាប់​អាន​គ្នាមិនព្រួលប្រែជិត ២០​ឆ្នាំកន្លងមកហើយ។លោក ខាន់ ជេមស៍ បាន​បញ្ជាក់​ខ្លឹមសារ​ថា «មិត្តដ៏ល្អរបស់ខ្ញុំបាទ​ជិត ២០​​ឆ្នាំហើយ តើបងប្អូនប្រិយមិត្ត​នៅចាំទេ​បទដំបូងដែល​ខ្ញុំបាទ​នឹងគាត់ច្រៀងរួមគ្នាមានចំណងជើងអ្វីដែរបាទ?»

ទន្ទឹមគ្នានេះក៏មានអ្នកគាំទ្រមួយចំនួនបញ្ចេញមតិថា បទដែលលោក ខាន់ ជេមស៍ និងឧកញ៉ា ខេមរៈ សិរីមន្ត ច្រៀងរួមគ្នានោះមានចំណងជើងថា” នាង​​ជាពិភពលោកខ្ញុំ” ខណៈ​មានអ្នកគាំទ្រខ្លះទៀត​ក៏ស្នើឲ្យ​អ្នកទាំងពីរ​មាន​បទ​ចម្រៀងរួមគ្នាម្តងទៀតផងដែរ។ យ៉ាងណាមិញរូបថត​នេះ​ក៏ត្រូវបាន​អ្នកគាំទ្រ​តារាប្រុសទាំង ២រូបខាងលើ​បន្ត​យកមកបង្ហោះ​ចែករំលែក​នៅលើបណ្តាញ​សង្គមដែល​អាចបញ្ជាក់ថា រវាង​ឧកញ៉ា ខេមរៈ សិរីមន្ត និងលោក ខាន់ ជេមស៍ គឺជាតារាចម្រៀងដែលមានមិត្តភាពនៃការាប់អានគ្នាយ៉ា​ងល្អ ឬអាចនិយាយ​ថា ជា​គំរូ​សម្រាប់​សិល្បៈ​ជំនាន់ក្រោយៗ​ផងដែរ។

ត្រង់ចំណុចនេះ​ក៏មានការលើកឡើងថា តារាចម្រៀង ២រូបនេះបាន​ស្តែងចេញពី​ទឹកចិត្តស្រលាញ់ និងគោរព​ឲ្យតម្លៃគ្នា​ទៅវិញ​ទៅមក​ដោយ​គ្មានលាក់​លាម​ឡើយ។ ប្រាកដណាស់​តារា​ចម្រៀង​ប្រុស​ល្បីឈ្មោះ​ទាំង ២រូបខាង​​លើ​គឺធ្លាប់​ស្ថិត​នៅ​ក្នុង​ទ្រនុំ​ផលិតកម្ម​រួមគ្នា​។

ប៉ុន្តែ​មាន​អ្នកគាំទ្រ និង​មហាជនភាគ​តិច​ណាស់ដែល​បានដឹង​ពីទំនាក់ទំនងក្រៅសិល្បៈ​របស់ ឧកញ៉ា ខេមរៈ សិរីមន្ត និង​លោក ខាន់ ជេមស៍ ហើយ​ទើបតែថ្មីៗនេះ តារា​ប្រុសលោក ខាន់ ជេមស៍ បាន​ទម្លាយ​ពី​ទំនាក់ទំនង​នៅលើបណ្តាញ​សង្គម​រម្លឹក​អនុស្សាវរីយ៍​របស់​ពួកគេ​ដោយ​បង្ហាញ​ឲ្យឃើញពី​ទំនាក់ទំនង​ល្អ​ និង​ស្អិតល្មួត​ជា​មួយគ្នាគួរឲ្យសរសើរ៕

អត្ថបទ៖ ចាន់រ៉ា