ខេមរ: សិរីមន្ត ទទួលបានការសរសើរ តាមរយៈសកម្មភាពបំផុសកូនឱ្យស្រលាញ់ និងរាំចង្វាក់ប្រពៃណីខ្មែរ

កំពូលតារាចម្រៀងល្បីឈ្មោះប្រចាំប្រទេសឧកញ៉ា ខេមរ: សិរីមន្ត បានបង្ហាញវីដេអូកូនស្រីសំណព្វរាំចង្វាក់ប្រពៃណីខ្មែរ រួមនឹងពាក្យពេចន៍បំផុសស្មារតីស្រលាញ់សិល្បៈវប្បធម៌ ធ្វើឱ្យសាធារណជនពិសេសអ្នកគាំទ្រ បង្ហាញការកោតសរសើរជាខ្លាំង។

ជាក់ស្តែងតារាចម្រៀងចាស់វស្សាលោក ខេមរ: សិរីមន្ត បានបង្ហាញវីដេអូរយ:ពេលជាង ១នាទី នៃសកម្មភាពបង្រៀនកូនស្រីរាំបទចង្វាក់រាំវង់ប្រពៃណីជាតិខ្មែរយ៉ាងរស់រវើកទទួលបានការចាប់អារម្មណ៍ និងកោតសរសើរពីសំណាក់មហាជនអ្នកគាំទ្រពិសេសអ្នកប្រើប្រាស់បណ្តាញសង្គមហ្វេសប៊ុកផងដែរ។

ទន្ទឹមគ្នានោះកំពូលតារាចម្រៀងងារជាឧកញ៉ា ខេមរ: សិរីមន្ត ក៏បានឆ្លៀតទម្លាយពាក្យផ្តាំដ៏មានអត្ថន័យចំពោះកូនស្រីខ្លួនថា “ថ្ងៃនេះនាំកូន «មន្តស្ត្រី» រៀនរាំបទរាំវង់ប្រពៃណីជាតិខ្មែរ ហើយខ្ញុំបានប្រាប់កូនថា ទោះសម័យសិល្បៈទំនើបប៉ុណ្ណាតែយើងត្រូវថែរក្សាប្រពៃណីបុរាណដូនតារបស់យើងជានិច្ចដែរណាកូន”។

តាមរយ:ខ្លឹមសារនេះ សង្កេតឃើញមានទស្សនិកជនមួយចំនួនបានបង្ហាញការគាំទ្រ និងសរសើរថា លោកគឺជាបុគ្គលគំរូសម្រាប់សង្គមព្រោះក្នុងនាមជាឪពុកដ៏ល្អ ខេមរ: សិរីមន្ត បានណែនាំកូនស្រីពីរួមការរក្សានូវសិល្ប:វប្បធម៌របស់ខ្មែរ។

ក្នុងនោះក៏មានការលើកឡើងថា នេះជាសកម្មភាពភាពដែលរីករាយនិងបង្កើតអនុស្សាវរីយ៍ដ៏កក់ក្ដៅ និងមានន័យនៅក្នុងគ្រួសារ។ ខណ:មានខ្លះទៀតសរសើរដែរថា ល្អណាស់ប្អូនប្រុសបង្ហាត់កូនស្រី ឱ្យចេះរាំបទប្រពៃណីខ្មែរយើង រាំវង់ របស់ខ្មែរយើងរាំមិនចេះសាបសូន្យសុភាពរាបសាររមទម្យតជំនាន់៕ ចាន់រ៉ា