សឿន វីតា ដាស់តឿនអ្នកគិតខ្លី ឲ្យមើលជីវិតរបស់លោក ដែលកំពុងតស៊ូដោះបំណុលគេជាង ២០មុឺនដុល្លារ

បច្ចុប្បន្ន តារាសម្តែងប្រុស សឿន វីតា កំពុងជួបការលំបាកខ្លាំង ដោយសារផុងខ្លួនរឿងរ៉ាវជំពាក់បំណុលគេរាប់ម៉ឺនដុល្លារ ។ តែទោះជាបែបនេះ លោកនៅតែព្យាយាមប្រកបរបរដោះបំណុលគេ និងបានចេញសារដាស់តឿនមនុស្សមួយចំនួន កុំគិតខ្លី ត្រូវប្រឹងប្រែងតស៊ូបើនៅមានជីវិត។

ជុំវិញរឿងរ៉ាវធ្លាក់ខ្លួនដល់​ចំណុចសូន្យ​ តារា​សម្តែង​រូបនេះ ធ្លាប់បានចេញមកទម្លាយការពិតរួចមកហើយ គឺដោយសារតែ​លោក​ចាញ់បោក និងជួយអាសារដល់បុគ្គលមួយចំនួន ដែលជាមនុស្សស្គាល់រាប់អានគ្នានិងមិត្តភក្តិជាដើម ទើបធ្វើឱ្យជីវិតលោកត្រូវដើរដល់ចំណុចមួយពិបាកឥតពណ៌នា ដោយត្រូវប្រឹងប្រកបរបរដើម្បីផ្គង់ផ្គត់គ្រួសារផង និងដោះបំណុលគេផង។

យ៉ាងណាមិញ លោក សឿន វីតា នៅតែប្រឹងប្រែងដើម្បីដោះស្រាយបំណុលខ្លួនដោយមានទំនួលខុសត្រូវ និងឆ្លៀតលើកទឹកចិត្ត អ្នកដែលមានបញ្ហាក្នុងជីវិត កុំគិតខ្លីឲ្យសោះ។ លោកថា “មុនអ្នកគិតខ្លី ចូរមើលជីវិតខ្ញុំដែលកំពុងខំប្រឹងដោះបំណុលគេ ២៩មុឺនដុល្លារ ទាំងយប់ទាំងថ្ងៃ ដោយសេចក្តីជឿជាក់ថា នឹងសងគេរួច ១០០ភាគរយឆាប់ៗខាងមុខនេះ”។

លោក សឿន វីតា បន្ថែមថា រាល់ថ្ងៃលោកមិនមែនមិនដឹងថា ម្ចាស់បំណុលរបស់លោកក៏កំពុងលំបាកនោះទេ ហើយលោកតែងឆាតតបតជាមួយម្ចាស់លុយរាល់ថ្ងៃ ក្នុងទំនួលខុសត្រូវ។ បើទោះជាបច្ចុប្បន្ន លោកមិនទាន់អាចសងបំណុលទាំងអស់បាន តែលោកក៏បាននិងកំពុងតស៊ូព្យាយាមរកស៊ីលក់ម្ហូបត្រីសាច់គ្រប់មុខតាមអនឡាញ ដើម្បីរក​លុយដោះបំណុល​គេ និង​សម្រាប់​ផ្គត់ផ្គង់​គ្រួសារផងដែរ៕ អត្ថបទ៖ ចាន់រ៉ា