មិនដែលគេចវេស! សឿន វីតា តែងបង្ហាញឆន្ទៈរកប្រាក់សងគេ និងណែនាំកូនបំណុលដទៃទៀត ធ្វើដូចខ្លួន

លោក សឿន វីតា សន្យាថា លោកនឹងប្រឹងប្រែងសងលុយម្ចាស់បំណុលរបស់លោកទាំងអស់ និងណែនាំដល់អ្នកដែលជាកូនបំណុលដទៃទៀត ឱ្យប្រឹងប្រែងរកលុយសងគេ ដោយលើកឡើងថា ព្រោះគេមានគុណជួយយើងពេលលំបាក ហើយសងពីតិចៗទៅច្រើន។ នេបើតាមរយៈសំណេរនៅលើ គណនីហ្វេសប៊ុកផ្ទាល់ខ្លួន កាលពីព្រឹកថ្ងៃទី១១ ខែវិច្ឆិកា ឆ្នាំ២០២៤។

ក្រោយប្រកាសរឿងបំណុលរបស់រាប់ម៉ឺនដុល្លារ មិនខ្វល់នឹងសម្តីអ្នកណា តារាសម្តែងប្រុស សឿន វីតា តែងតែបង្ហាញការតស៊ូនិងពុះពាររបស់ខ្លួន ក្នុងការប្រឹងប្រែងរកលុយដើម្បីសងប្រាក់ដល់ម្ចាស់បំណុលខ្លួន បើទោះបីជាលោកគ្មានលទ្ធភាពសងទាំងដុលក៏ដោយ ខណៈរាល់ថ្ងៃ លោកត្រូវប្រឹងប្រកបរបរដើម្បីផ្គង់ផ្គត់គ្រួសារផង និងដោះបំណុលគេផង។ តែទោះជាបែបនេះ លោកនៅតែព្យាយាមប្រកបរបរដោះបំណុលគេ និងបានចេញសារដាស់តឿនជារឿយៗ ដល់អ្នកដែលកំពុងស្ពាយបំណុលដូចជាលោក កុំគិតខ្លី និងត្រូវប្រឹងប្រែងតស៊ូដោះស្រាយបញ្ហាបំណុលរបស់ខ្លួនឱ្យអស់ពីលទ្ធភាព។

ជុំវិញការជំពាក់បំណុលនេះដែរ លោក សឿន វីតា ធ្លាប់បានបង្ហើបថា មូលហេតុដែលលោកផុងខ្លួនរឿងរ៉ាវជំពាក់បំណុលគេរាប់ម៉ឺនដុល្លារនេះ គឺដោយសារការចាញ់បោក និងជួយអាសារបុគ្គលមួយចំនួនដែលជាមនុស្សស្គាល់រាប់អានគ្នា រួមនិងមិត្តភក្តិ។

ដោយមើលឃើញពីការប្រឹងប្រែងដើម្បីដោះស្រាយបំណុល ប្រកបដោយទំនួលខុសត្រូវនេះ លោកក៏ត្រូវបាnសាធារណជន និងអ្នករាប់គ្នាមួយចំនួន បង្ហាញការសរសើរដល់លោកផងដែរ ដែលមិនចុះចាញ់នឹងបញ្ហា ហើយនៅតែរឹងមាំតស៊ូដោះស្រាយជានិច្ច។

គួររំលឹកថា កន្លងមក លោក សឿន វីតា តែងតែលើកឡើងពីគុណរបស់ម្ចាស់បំណុល ខណៈលោកក៏យល់ពីការលំបាករបស់ម្ចាស់បំណុលដែរ ជាហេតុដែលលោកមិនធ្លាប់គេចវេសពីឆាត ឬខល របស់ម្ចាស់បំណុលឡើយ ជាមួយនឹងទំនួលខុសត្រូវ។ លោកថា បើទោះជាបច្ចុប្បន្ន លោកមិនទាន់អាចសងបំណុលទាំងអស់បាន តែលោកក៏បាននិងកំពុងតស៊ូព្យាយាមរកស៊ីលក់ម្ហូបត្រីសាច់គ្រប់មុខតាមអនឡាញ ដើម្បីរក​លុយដោះបំណុល​គេ និង​សម្រាប់​ផ្គត់ផ្គង់​គ្រួសារផងដែរ៕