សឿន វីតា កំពុងកៀរគរសប្បុរជនជួយនិស្សិតពេទ្យបញ្ចប់ការសិក្សាម្នាក់ ដែលត្រូវលាងឈាម (មានវីដេអូ)

ត្បិតខ្លួនកំពុងជួបការលំបាកជំពាក់បំណុលគេខ្ទង់ម៉ឺនដុល្លារក៏ពិតមែន តែតារាសម្តែងលោក សឿន វីតា នៅតែមានបេះដូងសប្បុរធម៌ចង់រួមចំណែកជួយដល់កញ្ញា ហឿន ស្រីនីត តាមរយៈការកៀរគរថវិកាពីសប្បុរសជន ដើម្បីជួយសង្គ្រោះជីវិតរបស់នាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈវីដេអូប្រមាណ ១២នាទី លោក សឿន វីតា បានស្នើដល់មហាជនជួយបរិច្ចាគថវិកាដល់និស្សិតពេទ្យស្រីរូបនេះ ដែលធ្លាក់ខ្លួនឈឺដល់ថ្នាក់ត្រូវលាងឈាម ខណៈបច្ចុប្បន្នកំពុងស្នាក់នៅបន្ទប់ជួលមួយកន្លែង ក្នុងភូមិសាស្ត្រ ភូមិចម្រើនផល សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

គួរជម្រាបថា យុវតី ហឿន ស្រីនីត ធ្លាក់ខ្លួនឈឺត្រូវលាងឈាមតាំងពីឆ្នាំ២០២២ ខណៈដែលខ្លួនកំពុងសិក្សានៅឡើយ ហើយគ្រួសារត្រូវបង្ខំលក់ទ្រព្យសម្បត្តិខ្ទេចខ្ទី ដើម្បីចំណាយលើការព្យាបាល ដោយតម្រូវឱ្យលាងឈាម ១សប្តាហ៍ ចំនួន ២ដង រហូតធ្លាក់ខ្លួនជួលបន្ទប់ផ្ទះគេស្នាក់នៅ។

ឯមូលហេតុដែលឈានដល់ដំណាក់កាលលាងឈាមនេះ គឺដោយសារតែកាលពីកុមារភាព ឧស្សាហ៍មានបញ្ហាសុខភាពតម្រងនោម និងមាននោមឈាមទៀតផង។ សូមស្តាប់ការបញ្ជាក់បន្ថែម ក្នុងបទសម្ភាសរវាងយុវតីរូបនេះ ជាមួយលោក បូ ភក្ត្រា ។

ដោយក្តីអាណិតអាសូរ យុវតី ហឿន ស្រីនីត ក៏ត្រូវបានសាធារណជនស្រាក់ដៃគ្នាជួយជាថវិកាខ្លះ ដើម្បីបានបន្តការព្យាបាលផងដែរ។ ប៉ុន្តែយ៉ាងណាមិញ ស្ថានភាពរបស់នាង ក៏មិនខុសពីអ្នកមានបញ្ហាតម្រងនោមដែលត្រូវការលាងឈាមដទៃទៀតនោះដែរ ពោលគឺការវះកាត់ប្តូរក្រលៀន ប៉ុន្តែការចំណាយលើការវះកាត់នេះ គឺមានតម្លៃថ្លៃ ហួសលទ្ធភាពគ្រួសាររបស់នាង។

តែទោះបែបនេះ លោក សឿន វីតា ស្នើដល់មហាជនដែលមានចិត្តសប្បុរស ចូលរួមជាថវិកាតិចក្តីច្រើនក្តីទៅតាមលទ្ធភាព ដើម្បីសង្គ្រោះនារីម្នាក់ដែលធ្លាប់ជាទាហានអាវស ដោយបានរួមចំណែកជួយពលរដ្ឋក្នុងគ្រានៃជំងឺកូវីដកាលពីពេលកន្លងទៅ៕