តុលាការថៃបញ្ចាក់មូលហេតុ ដែលតារា៣រូប​រួមទាំងជនសង្ស័យផ្សេងទៀត មិនអាចធានាឲ្យនៅក្រៅឃុំ

តុលាការព្រហ្មទណ្ឌនៃប្រទេសថៃបានបញ្ចាក់ថា ចំពោះជនសង្ស័យចំនួន១៧នាក់ ក្នុងសំណុំក្ដី The Icon Group​ ជាពិសេសក្រុមនាយកប្រតិបត្តិ ឬ Boss រួមមាន Sam, Min, និង Kan ដែលព្យាយាមដំកល់ប្រាក់ គឺមិនអនុញ្ញាតឲ្យនៅក្រៅឃុំ ដោយ​បារម្ភ​ថា​ខ្លាចមានភាព​រញ៉េរញ៉ៃ​ជាមួយ​ភស្តុតាង ឬអាចរត់គេចខ្លួនក្នុងពេលដែលប៉ូលិសកំពុងធ្វើការស៊ើបអង្កេតយ៉ាងម៉ត់ចត់។

បន្ទាប់​ពី​តុលាការ​បាន​ពិចារណា​លើ​សំណើ​នេះ នៅក្រោយការសួរនាំជនជាប់ចោទមិនបានជំទាស់នឹងការឃុំខ្លួនទេ ទើបអនុញ្ញាតឲ្យឃុំខ្លួនជនត្រូវចោទពីលេខ ១ ដល់លេខ១៧ តាមសំណើរបស់មន្ត្រីសាកសួរ។ ប៉ុន្តែនៅក្នុង​ការ​ស៊ើប​អង្កេត ជន​ជាប់​ចោទ​ទាំង​អស់​បាន​បដិសេធ​រាល់​ការ​ចោទ​ប្រកាន់។

ទន្ទឹមនោះទៀត តារាសម្ដែងនិងជាពិធីករចំនួន៣រូប រួមមាន Sam Yuranan , Min Peachaya និង Kan Kantathaworn ដែលជាជនជាប់ចោទលេខ ១៥ ដល់ ១៧ រៀងៗខ្លួន បានដាក់ពាក្យបណ្តឹងទាមទារដំកល់ប្រាក់ក្នុងម្នាក់ៗចំនួន ២លានបាត ដើម្បីស្នើសុំដោះលែងបណ្តោះអាសន្ន ឬសំណើរសុំនៅក្រៅឃុំក្នុងដំណើរការនីតិវិធីច្បាប់។

ទោះបីជាយ៉ាងណាក៏ដោយ តុលាការ​បាន​ពិចារណា​លើ​ភាព​ធ្ងន់​ធ្ងរ​នៃ​ការ​ចោទ​ប្រកាន់ និង​កាលៈទេសៈ​នៃ​សំណុំ​រឿង។សកម្មភាពរបស់ជនជាប់ចោទលេខ ១៥, ១៦, និង ១៧ ត្រូវបានកំណត់លក្ខណៈដោយការបែងចែកតួនាទីជាប្រព័ន្ធដែលករណីនេះមានភាពស្មុគស្មាញខ្លាំង និងប៉ះពាល់​ដល់​សង្គម​ជា​ទ្រង់ទ្រាយ​ធំ។​ ហេតុដូច្នោះហើយ សំណើរបស់អ្នកទាំង៣ ត្រូវបានច្រានចោលភ្លាមៗ។

លើសពីនេះទៀតដែរ មន្ត្រី​ស៊ើប​អង្កេតនិងជនរងគ្រោះជាច្រើននាក់ បានជំទាស់​នឹង​ការ​ដោះលែង​ជនសង្ស័យទាំង៣រូបជា​បណ្ដោះអាសន្ន។ ពួកគេបានលើកឡើងថា ករណីមួយនេះកំពុងតែស្ថិត​ក្នុង​ការ​ចាប់អារម្មណ៍​របស់​សាធារណជន ប្រសិនបើការដោះលែងត្រូវបានអនុញ្ញាត មានហេតុផល​ដែល​គេជឿថា ជនជាប់ចោទ​លេខ ១៥, ១៦, ១៧ នឹង​គេចខ្លួនហើយលួច​បំផ្លាញភស្តុតាងឬអាចធ្វើអ្វីបានតាមចិត្ត ដែលអាចប៉ះពាល់ដល់ការស្វែងរកការពិតក្នុងសំណុំរឿងក្ដី។​

យ៉ាងណាមិញ ចាប់តាំងពីរឿងក្ដីបោកប្រាស់បាននិងកំពុងកក្រើកក្នុងប្រទេសថៃ បច្ចុប្បន្ននេះជនសង្ស័យទាំង១៧នាក់ ត្រូវគេបែងចែកផ្សេងៗគ្នា ដោយបុរសនឹងត្រូវបញ្ជូនទៅពន្ធនាគារបាងកក។ ចំណែក​ស្ត្រី​ជាប់​ចោទនឹងត្រូវបញ្ជូនទៅមណ្ឌលអប់រំកែប្រែស្ត្រីកណ្តាល។ ដោយឡែក ចំពោះ​មេខ្លោងធំគឺលោក Paul Waratanaphon នាពេលនេះប៉ូលិសកំពុងបន្តការស៊ើបអង្កេត​ដែលមិនទាន់​បញ្ចប់នូវឡើយទេ​​​ ហើយស្ថិតក្រោមការគ្រប់គ្រងរបស់មន្ត្រីយ៉ាងតឹងរ៉ឹងបំផុត។

គួររម្លឹកដែរថា នេះក៏មិនមែនជារឿងចម្លែកទេក្នុងប្រទេសថៃ ​ជុំវិញករណី​ឆបោក​សាធារណៈ។ កាលពីឆ្នាំមុន គម្រោង Forex-3D បានបោកបញ្ឆោតមនុស្សរាប់ពាន់នាក់ឲ្យចូលរួមវិនិយោគជួញដូររូបិយប័ណ្ណបរទេសក្លែងក្លាយ ដែលកាលណោះឈានដល់ចាប់ខ្លួនតារាស្រី Pinky Savika រួមទាំងម្ដាយ និងប្អូនប្រុសរបស់នាងដាក់ពន្ធធនាគារ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖ឃាត់ខ្លួនមនុស្ស១៨នាក់ជាថៅកែ Icon Group រួមទាំងតារាថៃ ៣ ដួងជាមេខ្លោងធំ