អ្នកគាំទ្ររំភើបចិត្តនឹងវត្តមាន PanCake ចូលប្រកួត MQC និងប្រាប់ថា ទោះលទ្ធផលបែបណានៅតែគាំទ្រ

មុនលាឆ្នាំ២០២៤ ពិធីការិនីដ៏ពូកែវហាសព្ទ PanCake បានធ្វើឱ្យមហាជនភ្ញាក់ផ្អើលខ្លាំង ជាមួយនឹងវត្តមានរបស់អ្នកសិល្បៈរូបនេះ ក្នុងនាមជាបេក្ខភាពប្រលងកម្មវិធីប្រកួតសម្រស់ និងសមត្ថភាព Miss Queen Cambodia តំណាងខេត្តព្រះសីហនុ ខណៈនេះ ក៏ជាការបំពេញក្តីស្រមៃរបស់ខ្លួនដែលចង់ក្លាយជាបវរកញ្ញាផងដែរ។

យ៉ាងណាមិញ ក្រោយផេកផ្លូវការរបស់ស្ថាប័ន Miss Queen Cambodia បានបង្ហាញវត្តមានបវរកញ្ញាតំណាងខេត្តព្រះសីហនុរូបនេះ សាធារណជន សិល្បករសិល្បការិនី ពិសេសអ្នកគាំទ្របានសម្តែងការអបអរទន្ទឹមនឹងក្តីរំភើប ដែលបានឃើញ PanCake អាចឈានមកដល់ចំណុចមួយនេះ។

តួយ៉ាង ក្នុងចំណោមមតិអបអរសាទរទាំងនោះ ក៏មានការលើកទឹកចិត្ត និងបង្ហាញក្តីស្រលាញ់ដល់ពិធីការិនីដ៏មានប្រជាប្រិយភាពនេះផងដែរ ខណៈអ្នកគាំទ្រម្នាក់ បានផ្ញើជាវីដេអូបង្ហាញក្តីរីករាយ និងរៀបរាប់ថា ខ្លួនសប្បាយចិត្តខ្លាំងណាស់ ដែលបានឃើញកញ្ញា PanCake ចូលប្រកួត Miss Queen Cambodia និងបញ្ជាក់ទៀតថា សម្រាប់ការប្រកួតនេះ បើទោះជា idol ទទួលបានលទ្ធផលបែបណា ក៏នៅគាំទ្រដែរ។

គួរជម្រាបថា ក្នុងដំណើរនៃការប្រកួត Miss Queen Cambodia 2025 នេះដែរ ក្រៅពីចូលរួមជូនពរ អ្នកគាំទ្រជឿថា PanCake នឹងអាចសម្រេចបាននូវក្តីស្រមៃមួយនេះ ក៏ព្រោះតែពិធីការិនីរូបនេះ ពេញដោយសមត្ថភាពសិល្បៈ៕