PanCake ថា បុគ្គលិកម្នាក់របស់ក្រុមហ៊ុនសេវាដឹកជញ្ជូនល្បីមួយ មាក់ងាយខ្លួនដោយសម្តីមិនសមរម្យ

ពិធីការិនីកម្មវិធីកម្សាន្តល្បីឈ្មោះ Pancake និងជាបេក្ខភាព Miss Queen Cambodia បានសម្តែងការហួសចិត្តជាខ្លាំង ក្រោយបុគ្គលិកក្រុមហ៊ុនសេវាដឹកជញ្ជូនល្បីមួយ ពោលពាក្យមិនសមរម្យលើខ្លួន។ នេះបើតាមសារបញ្ជាក់ពីគណនីហ្វេសប៊ុករបស់ ពិធីការិនីរូបនេះផ្ទាល់។

PanCake បានរៀបរាប់ដោយមានទាំងការបញ្ជាក់ទីតាំងសាខាច្បាស់ៗថា បុគ្គលិកម្នាក់នៅសាខាគួចកានុង មើលងាយភេទទី៣ខ្លាំងណាស់ ដោយបានពោលពាក្យមកលើថា “អញស្មានតែមនុស្ស” ។

ដោយក្តីខឹងសម្បារ និងមិនអស់ចិត្តចំពោះពាក្យសម្តីមិនឱ្យតម្លៃនេះ PanCake បានបង្ហាញអារម្មណ៍តាមរយៈបណ្តាញទំនាក់ទំនងសង្គម ក្នុងន័យតបទៅកាន់បុគ្គលដែលមាក់ងាយខ្លួនវិញ ដោយប្រាប់ឱ្យបុគ្គលរូបនោះមើលខ្លួនសិនមុនមើលងាយអ្នកដទៃ ព្រោះបើប្រៀបធៀបគ្នា អាចនឹងអន់ជាងអ្នកដទៃក៏ថាបាន។

បើទោះបីសាមុីខ្លួនមិនមានការលម្អិតច្រើនជុំវិញរឿងរ៉ាវនេះ តែក៏មានសាធារណជនជាច្រើន បានចូលមកបង្ហាញបទពិសោធដែលខ្លួនធ្លាប់ជួបស្រដៀងគ្នា ទាក់ទងនឹងឥរិយាបថបុគ្គលិកមួយចំនួន របស់ក្រុមហ៊ុនដឹកជញ្ជូនខាងលើផងដែរ និងឱ្យយោបល់ក្រុមហ៊ុនផ្ទាល់ គួរមានណែនាំបុគ្គលិកខ្លួនណាដែលមានអប្បកិរិយាមិនល្អបែបនេះ៕