ជីវិតកម្សាន្ដ

រៀបការយូរឆ្នាំមិនមានកូន Pancake សំណូមពរទស្សនិកជនឲ្យឈប់សួរសំណួរនេះទៀត

បានផុស

២ ថ្ងៃ មុន

នៅ

ថ្ងៃសៅរ៍ ១៦ កញ្ញា ២០២៣

ដោយ

តារាសម្ដែង និងជាតារាបង្ហាញម៉ូដដ៏ល្បីប្រចាំប្រទេសថៃ Pancake Khemanit ថ្ងៃនេះបានផ្ដល់បទសម្ភាសន៍ដោយបើកចំហរពីជីវិតរបស់នាង បន្ទាប់ពីរៀបការជាមួយស្វាមីឧត្តមសេនីយ៍អស់រយៈពេលជិត១ឆ្នាំ។

តាមរយៈកម្មវិធី Kui Zap Show នៅលើ Channel One31 តារាស្រីរូបនេះបានទម្លាយអារម្មណ៍ពិត ក្រោយមានមនុស្សចូលចិត្តសួរនូវសំណួរដដែលៗថា តើពេលណានឹងមានអ្នកស្នងមរតក?

ក្នុងនោះដែរ នាងបាននិយាយយ៉ាងដូច្នោះថា “មានរឿងមួយដែលធ្វើឲ្យខ្ញុំពិបាកចិត្តខ្លាំងណាស់។ តាមពិតវាមិនធ្ងន់ទេ ប៉ុន្តែសំណួរនោះបានធ្វើឲ្យអារម្មណ៍ខ្ញុំមិនល្អសោះ! ព្រោះពេលខ្លះ មានគេសួរពីការមានកូន។ តើអ្នកនឹងមានកូនប្រុសឬស្រីទេ? ពេលនេះពួកយើងកំពុងតែរង់ចាំដូចគ្នា! ពួកយើងមានអារម្មណ៍ថាសប្បាយចិត្តក្នុងផ្នែកអាពាហ៍ពិពាហ៍ ចង់ ថែរក្សាគ្នាទៅវិញទៅមកឲ្យបានយូរអង្វែងសិនដែរ”។

ចំពោះគម្រោងការយកកូន តាមពិតទៅ នាងមិនមានគម្រោងលើការមានកូននោះទេ ស្រេចលើពេលវេលាពេលណាពេលហ្នឹងចុះ! ជាពិសេសសំណួរនេះ បានធ្វើឲ្យនាងមានសម្ពាធនៅពេលមានមនុស្សមកសួរច្រើនលើកច្រើនសារ។ ហើយសូមឲ្យទស្សនិកជនឈប់សួរសំណួរនេះផងដែរ។

ទោះយ៉ាងណាក៏ដោយ ក្នុងកម្មវិធីនោះដែរពិធីករបានសួរថា តើគ្រួសារដាក់សម្ពាធលើនាងដែរទេ នៅពេលមិនទាន់យកកូនស្នងត្រកូលបែបនេះ។ Pancake បានឆ្លើយថា អត់ទេ ព្រោះមានចៅ២នាក់នៅផ្ទះក៏ដូចជានាងជួយចិញ្ចឹមផងដែរ៕