ម្ចាស់មកុដ MQC 2025 ដាស់តឿនអ្នកជំនាន់ក្រោយភេទទី៣ គប្បីចេះដាក់ខ្លួននិងគោរពរៀមច្បង

ម្ចាស់មកុដ Miss Queen Cambodia 2025 ផេន ខេក ថ្មីៗនេះ បានបញ្ចេញអារម្មណ៍ហាក់មានការអន់ចិត្តអ្នកសិល្ប:រួមអាជីព ពិសេសគឺភេទទី៣ជំនាន់ក្រោយមួយចំនួន ដែលមានចរិតអំនួតមិនចេះគោរពឲ្យតម្លៃ ពិសេសចំពោះរៀមច្បងប្រឡូកក្នុងវិស័យនេះយូរឆ្នាំ។

មិនត្រឹមតែបង្ហាញការមិនពេញចិត្តទៅលើចរិតអ្នកជំនាន់ក្រោយនោះទេ ម្ចាស់មកុដ Miss Queen Cambodia 2025 រូបនេះ ក៏បានចេញសារដាស់តឿនថា “អ្នកសិល្ប:ភេទទី៣ជំនាន់ក្រោយត្រូវចេះគោរពរៀមច្បងផង ក្រែងល្បីបានយូរនិងមានការអាណិតស្រលាញ់”។

ផេន ខេក បានបញ្ជាក់ក្នុងន័យបែបនេះថា “មួយរយ:នេះចូលរួមកម្មវិធីជួបប្អូនៗភេទទី៣ ដែលទើបតែមានឈ្មោះជំនាន់ក្រោយម្នាក់ៗ ដូចជាងើយៗដល់ហើយ ឱនបន្តិចទៅប្អូនក្រែងល្បីបានយូរ ដកភាពស្អាតចេញពីខ្លួនខ្លះទៅ មិនមែនមានតែយើងទេត្រូវចាំណា ភាពរុះរាយនឹងឱ្យតម្លៃទៅអ្នកដទៃ ទើបធ្វើឱ្យមនុស្សអាក្រក់អត់ស្អាតដូចបងមានថ្ងៃនេះ(យល់)”។

ដ្បិតមិនបានលម្អិតឱ្យស៉ីជម្រៅលើរឿងរ៉ាវនេះ តែអ្នកគាំទ្រមួយចំនួន រួមទាំងមិត្តភ័ក្តិក្នុងអាជីពសិល្ប:របស់ ផេន ខេក បានបង្ហាញការលើកទឹកចិត្តដល់នាងផងដែរ។

គួររម្លឹកថា​កាល​ពី​រាត្រី​ថ្ងៃ២២ ខែឧសភា ឆ្នាំ២០២៥ កម្មវិធី Miss Queen Cambodia 2025 បាន​រកឃើញម្ចាស់​មកុដ​ដ៏​សក្ដិសម​នោះ​គឺ​បវរ​កញ្ញា ផេន ខេក ខណៈ​បវរ​កញ្ញា​ដែល​មក​ពី​ខេត្ត​ព្រះ​សីហនុ​ររូបនេះ ទើបប្រឡូក​ក្នុង​វិស័យ​បវរ​កញ្ញា​​ប៉ុណ្ណោះ៕ អត្ថបទ៖ ចាន់រ៉ា