ជីវិតកម្សាន្ដ

រាជិនីកំពូលសម្រស់វៀតណាម៣រូប សុទ្ធតែជាប់ក្នុងបទឧក្រិដ្ឋ ប្រឈមនឹងទោសធ្ងន់

បានផុស

២ ខែ មុន

នៅ

ថ្ងៃចន្ទ ២៦ ឧសភា ២០២៥

ដោយ

មុនពេលដែលបវរកញ្ញា Nguyen Thuc Thuy Tien មានបញ្ហាប្រឈមនឹងផ្លូវច្បាប់ ដោយត្រូវតុលាការកាត់ទោសធ្ងន់ធ្ងរ ក្នុងនោះផងដែរ មានតារាស្រីវៀតណាមជាច្រើនរូបមកពីកម្មវិធីប្រកួតសម្រស់ផ្សេងៗគ្នា ដែលមានបញ្ហាចំពោះមុខច្បាប់ ចាប់តាំងពីការក្លែងបន្លំ ការកេងយកទ្រព្យសម្បត្តិ ព្រមទាំងជាឈ្មួញរកស៊ីពេស្យាចារ។

បវរកញ្ញា Nguyen Thuc Thuy Tien៖ ពីរាជិនីសម្រស់អន្តរជាតិ ក្លាយជាជនបោកប្រាស់អតិថិជន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីពេលថ្មីៗនេះ ភ្នាក់ងារប៉ូលិសស៊ើបអង្កេតនៃក្រសួងសន្តិសុខសាធារណៈបានកាត់ទោស និងឃុំខ្លួនជាបណ្ដោះអាសន្នលើម្ចាស់ជ័យលាភីឯក Miss Grand International 2021 (MGI) នាង Nguyen Thuc Thuy Tien កើតក្នុងឆ្នាំ១៩៩៨ ពីបទបោកប្រាស់អតិថិជនដែលមានចែងក្នុងប្រការ ២ មាត្រា ១៩៨ នៃក្រមព្រហ្មទណ្ឌថា ជាអ្នកសមគំនិតជាមួយចុងចោទនៃក្រុមហ៊ុន Chi Em Rot Group ក្នុងសំណុំរឿងបន្លំគុណភាពនៃស្ករគ្រាប់ Kera។

ស្ករគ្រាប់បន្លែ Kera គឺជាផលិតផលអាហារបំប៉នរបស់ Thuy Tien ហើយម្ចាស់ភាគហ៊ុននៃក្រុមហ៊ុននេះសហការក្នុងអាជីវកម្មយ៉ាងពេញទំហឹង។ ក្នុងនោះបវរកញ្ញាវ័យ២៦ឆ្នាំ ទទួលបានប្រាក់ចំណេញតាមកិច្ចព្រមព្រៀងរួមចំណែកដើមទុនស្មើនឹង ៣០%នៃភាគទុនិកដែលនៅសល់រួមចំណែក ៧០%ជាភាគហ៊ុនរបស់ម្ចាស់ក្រុមហ៊ុន។

ភ្នាក់ងារប៉ូលិសបានកំណត់ថា ក្រុមហ៊ុន Chi Em Rot លក់ស្ករគ្រាប់ Kera បានជាង ១៣៥ ពាន់ប្រអប់ ដោយទទួលបានចំណូលសរុបជិត ១៨ពាន់លានដុង ដែលក្នុងនោះម្ចាស់មកុដ MGI ឆ្នាំ២០២១ ទទួលបានកម្រៃជើងសារជិត ៧ ពាន់លានដុងឯណោះ។

បវរកញ្ញា Vo Thi My Xuan មេធំក្នុងអំពើរពេស្យាចារលំដាប់ខ្ពស់

ក្នុងឆ្នាំ ២០១២សាធារណជនជាច្រើនមានការភ្ញាក់ផ្អើលជាខ្លាំង នៅពេលដែលបវរកញ្ញាទន្លេមេគង្គ ឆ្នាំ ២០០៩ នាង Vo Thi My Xuan កើតឆ្នាំ ១៩៨៣ ត្រូវបានឃុំខ្លួនបណ្ដោះអាសន្ន ដើម្បីស៊ើបអង្កេតលើបទចោទប្រកាន់ ក្នុងនាមជាឈ្មួញកណ្តាលនៃអំពើពេស្យាចារ។ នាងត្រូវបានគេកំណត់អត្តសញ្ញាណថា ជាមេក្លោងម្នាក់នៃសង្វៀនពេស្យាចារនៃតារាបង្ហាញម៉ូដ និងសម្រស់រាប់ពាន់ដុល្លារ។

នៅក្នុងតុលាការកាលពីឆ្នាំ ២០១៣ នាង My Xuan បាននិយាយថា ស្ថានភាពលំបាក និងខ្វះខាតរបស់គ្រួសារ គឺជាហេតុផលដែលធ្វើឲ្យនាងប្រព្រិត្តអំពើបែបនេះ ហើយបន្តណែនាំមិត្តភ័ក្តិ និងសហការីទៅកាន់ផ្លូវមួយនោះផងដែរ។ ក្រោយមក គណៈវិនិច្ឆ័យបានកាត់ទោស បវរកញ្ញាឲ្យជាប់គុក ២ ឆ្នាំ ៦ខែ។

បវរកញ្ញា Truong Thi Tuyet Nga និងការបោកប្រាស់រាប់លានដុល្លារក្នុងអចលនទ្រព្យ

នាង Truong Thi Tuyet Nga កើតឆ្នាំ ១៩៦១ ជាបវរកញ្ញាតំណាងវៀតណាម និងជាគំរូនៃស្ត្រីជំនួញដ៏ល្អម្នាក់នៅក្នុងសង្គម។ ទោះជាយ៉ាងណាក៏ដោយ ក្នុងឆ្នាំ ២០១៣ នាង Tuyet Nga ត្រូវបានកាត់ទោស និងឃុំខ្លួនបណ្តោះអាសន្ន ដើម្បីស៊ើបអង្កេតលើទង្វើក្លែងបន្លំទ្រព្យសម្បត្តិ។

ក្នុងឆ្នាំ ២០១៦ នៅក្នុងការកាត់ក្តីលើកដំបូង តុលាការប្រជាជនទីក្រុងហូជីមិញ បានកំណត់ថា បវរកញ្ញារូបនេះបានប្រព្រឹត្តក្លែងបន្លំ និងសមគំនិតយកប្រាក់ពីជនរងគ្រោះឈ្មោះ L. សរុបចំនួន ៣.១ លានដុល្លារ។ តុលាការបានកាត់ទោស Nga ឲ្យជាប់គុក១៥ឆ្នាំពីបទក្លែងបន្លំទ្រព្យសម្បត្តិ ហើយចុងចោទត្រូវផ្តល់សំណងដល់ជនរងគ្រោះនូវចំនួនប្រាក់ដែលសមស្រប បន្ទាប់ពីកាត់ចំនួនទឹកប្រាក់ដែលគាត់បានបង់ ដើម្បីដោះស្រាយមួយផ្នែកនៃផលវិបាកក្នុងអំឡុងពេលស៊ើបអង្កេត។

ក្នុងឆ្នាំ ២០១៧ តុលាការប្រជាជនជាន់ខ្ពស់នៅទីក្រុងហូជីមិញក្នុងសវនាការឧទ្ធរណ៍ បានច្រានចោលបណ្តឹងសាទុក្ខរបស់ចុងចោទដែលជារាជិនីសម្រស់វៀតណាម ដោយតម្កល់សាលក្រមដំបូង៕

អត្ថបទ៖ សាង ស្រីល័ក្ខ

ចុចអាន៖ការលើកឡើងរបស់បវរកញ្ញា Thuy Tien ៣ឆ្នាំមុន ដូចទស្សន៍ទាយអនាគតខ្លួនឯងយ៉ាងច្បាស់

Related Topics: