លោក ប៉ុក បូរក្ស បញ្ជាក់ថា “No Body2” ពុំពាក់ព័ន្ធបញ្ហាឌឺដងអ្វីឡើយ និងស្នើកុំនាំភ្លើងពីព្រំដែនមកឆេះនៅភ្នំពេញ

លោក ប៉ុក បូរក្ស ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ បញ្ជាក់ថា ភាពយន្ត “No Body2” ដែលកំពុងចាក់បញ្ចាំងគ្រប់រោងកុននៅកម្ពុជា ជាភាពយន្តហូលីវូដ ពុំមានពាក់ព័ន្ធបញ្ហាឌឺដងអ្វីនោះឡើយ និងស្នើកុំនាំភ្លើងពីព្រំដែនមកឆេះនៅភ្នំពេញ។

ការបញ្ជាក់នេះ គឺបន្ទាប់ពីមានការលើកឡើងនៅលើទំព័រហ្វេសប៊ុក ធី សុវណ្ណា ដោយលើកយកភាពយន្តហូលីវូដមួយនេះ មករំលេចឱ្យមានការយល់ខុស និងថែមទាំងបានសំណូមពរឱ្យអជ្ញាធរពិនិត្យថែមទៀត។

លោកសង្កត់ធ្ងន់ថា កុំនាំភ្លើងពីព្រំដែនមកឆេះនៅភ្នំពេញ ព្រោះភាពយន្តនេះ ជាភាពយន្តហូលីវូដមានចំណងថា No Body2 ដែលបាននិងកំពុងចាក់បញ្ចាំងគ្រប់រោងភាពយន្តនៅកម្ពុជា និងប្រទេសជាច្រើនក្នុងពិភពលោក ហើយពុំមានពាក់ព័ន្ធនឹងបញ្ហាឌឺដងអ្វីនោះទេ។

ទន្ទឹមនេះ លោកក៏បានដាស់តឿនតាមរយៈពាក្យបុរាណខ្មែរ ពោលថា “កុំដុតឱ្យខ្លោច កុំរោចឱ្យឆៅ” ។ ក្នុងន័យនេះ គឺសំដៅដល់យុទ្ធសាស្ត្រនយោបាយមួយ ដែលប្រើដើម្បីទាញយកអំណាចឱ្យខ្លួន និងរុញច្រានអ្នកដទៃឱ្យមានបញ្ហា ដូច្នេះការស្នើឱ្យកុំប្រើយុទ្ធសាស្ត្រនេះ គឺណែនាំដល់បុគ្គលរូបនោះ កុំប្រើ​យុទ្ធសាស្ត្រ​​រុញ​បញ្ហា ឬបង្កហេតុឱ្យ​សាធារណជន​មើលឃើញ ដើម្បី​យកប្រជាប្រិយបម្រើឱ្យផលប្រយោជន៍ផ្ទាល់ខ្លួន។

នេះពុំមែនជាលើកទី១ឡើយ សម្រាប់សកម្មភាពហាក់បង្កឱ្យមានការភាន់ច្រឡំដល់សាធារណជន ពីសំណាក់ អ្នកស្រី ធី សុវណ្ណថា អតីតអភិបាលរងក្រុងអរិយក្សត្រ ខណៈសារខ្លះដែលស្ត្រីរូបនេះបានបង្ហោះ មិនត្រឹមតែប៉ះពាល់ដល់ទឹកចិត្តពលរដ្ឋខ្មែរ ថែមទាំងប៉ះពាល់ដល់កងទ័ពទៀតផង។

ដោយសារទង្វើមិនគួរគប្បីជារឿយៗនេះហើយ កាលពីព្រឹកថ្ងៃទី៣ ខែសីហា លោកស្រី ធី សុវណ្ណាថា ត្រូវបានបញ្ចប់មុខតំណែងជាអភិបាលរងក្រុងអរិយក្សត្រ និងត្រូវបានបណ្តេញចេញពីក្របខ័ណ្ឌរដ្ឋទាំងអស់ និងសូម្បីតែតួនាទីក្នុងគណបក្សប្រជាជន៕ ចាន់រ៉ា