ត្រាំ ប្រកាសដាក់ទណ្ឌកម្មក្រុមហ៊ុនប្រេងធំបំផុតពីររបស់រុស្ស៊ីជុំវិញសង្គ្រាមអ៊ុយក្រែន

រដ្ឋបាល ត្រាំ បានប្រកាសដាក់ទណ្ឌកម្មថ្មីយ៉ាងតឹងរ៉ឹងលើក្រុមហ៊ុនប្រេងធំបំផុតពីររបស់រុស្ស៊ីគឺ Rosneft និង Lukoil រួមជាមួយនឹងក្រុមហ៊ុនបុត្រសម្ព័ន្ធរបស់ពួកគេ ដើម្បីឆ្លើយតបទៅនឹងការបន្តវាយប្រហាររបស់ទីក្រុងមូស្គូលើអ៊ុយក្រែន។ នេះបើយោងតាមការចេញផ្សាយរបស់សារព័ត៌មានCBS នៅថ្ងៃទី​២៣ ខែ តុលា។

រដ្ឋមន្ត្រីក្រសួងរតនាគារអាមេរិកលោក Scott Bessent បាននិយាយថា វិធានការនេះមានគោលបំណងកាត់ផ្តាច់ការផ្តល់មូលនិធិសំខាន់ៗសម្រាប់ម៉ាស៊ីនសង្រ្គាមរបស់ប្រធានាធិបតីវ្ល៉ាឌីមៀរ ពូទីន ដោយជំរុញឱ្យសម្ព័ន្ធមិត្តចូលរួមក្នុងការដាក់ទណ្ឌកម្ម និងអំពាវនាវឱ្យមានបទឈប់បាញ់ជាបន្ទាន់។

ការប្រកាសនេះបានធ្វើឡើងបន្ទាប់ពីមានរលកថ្មីនៃការវាយប្រហារដោយយន្តហោះគ្មានមនុស្សបើក និងមីស៉ីលរបស់រុស្ស៊ីទៅលើទូទាំងប្រទេសអ៊ុយក្រែន បានសម្លាប់មនុស្សយ៉ាងតិចប្រាំមួយនាក់ មានទាំងម្តាយ និងកូនស្រីពីរនាក់នៅជិតទីក្រុងគៀវ និងជិត ៣០នាក់ផ្សេងទៀតរងរបួស។

ការ​ដាក់​ទណ្ឌកម្ម​នេះក៏​ធ្វើ​ឡើង​បន្ទាប់​ពី​មាន​សម្ពាធ​​ជាច្រើន​ខែ​មកហើយ​លើ​លោក​ប្រធានាធិបតី ដូណាល់ ត្រាំ ឲ្យចាត់​វិធានការ​ខ្លាំង​ជាង​មុន​ប្រឆាំង​នឹង​រុស្ស៊ី។ លោក ត្រាំ ដែលកន្លងមកបាន បានជំរុញឱ្យមានកិច្ចចរចាសន្តិភាព តាមរយៈការជំរុញឲ្យរុស្ស៊ីទទួលយកបទឈប់បាញ់ តែវាបានជាប់គាំងម្ដងហើយម្ដងទៀត ដោយសារលោក ពូទីន បដិសេធ។

ក្នុងដំណើរទស្សនកិច្ចទៅកាន់ទីក្រុងវ៉ាស៊ីនតោន អគ្គលេខាធិការអង្គការណាតូ លោក Mark Rutte បានបង្ហាញទំនុកចិត្តថា ការបន្តដាក់សម្ពាធនឹងបង្ខំឱ្យលោក ពូទីន ចរចា។ ទន្ទឹមនឹងនេះ ប្រធានាធិបតីអ៊ុយក្រែនលោក វ៉ូឡូឌីមៀ ហ្សលេនស្គី បានជំរុញឱ្យមានការដាក់ទណ្ឌកម្មរបស់លោកខាងលិចកាន់តែខ្លាំង និងការគាំទ្រផ្នែកយោធាបន្ថែមទៀត។ហ្សេលេនស្គីថា៖ «មានតែតាមរយៈការដាក់ទណ្ឌកម្ម ការផ្ដល់អាវុធរយៈចម្ងាយឆ្ងាយ និងការទូតរួបរួមប៉ុណ្ណោះ ទើបពិភពលោកអាចជំរុញឱ្យរុស្ស៊ីបញ្ចប់សង្គ្រាមបាន»។

លើសពីនេះដោយសារតែលោកពូទីនបានបញ្ជាឱ្យធ្វើសមយុទ្ធនុយក្លេអ៊ែរ មេដឹកនាំសហភាពអឺរ៉ុបក៏បានត្រៀមខ្លួនដើម្បីពិភាក្សាអំពីការដាក់ទណ្ឌកម្មបន្ថែមនៅក្នុងកិច្ចប្រជុំកំពូលនៅទីក្រុងប្រ៊ុចសែល។ ចំណែកក្រុមប្រទេស៣៥ដែលគាំទ្រអ៊ុយក្រែន គ្រោងនឹងជួបប្រជុំនៅទីក្រុងឡុងដ៍៕

អត្ថបទ៖ ប៊ុន សុភាព