អ្នកស្លាប់ដោយសារព្យុះសង្ឃរា Melissa នៅទូទាំងតំបន់ការ៉ាបៀន កើនដល់៤៩នាក់

ព្យុះសង្ឃរា Melissa បានសម្លាប់មនុស្ស ៤៩ នាក់ និងបង្កការបំផ្លិចបំផ្លាញយ៉ាងធ្ងន់ធ្ងរនៅទូទាំងភាគខាងជើងនៃតំបន់ការ៉ាបៀន មុនពេលឆ្លងកាត់ទៅប្រទេសផ្សេងទៀត។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី៣១ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅប្រទេស​ហៃទី មនុស្ស ៣០ នាក់បានស្លាប់ និង ២០ នាក់បាត់ខ្លួន បន្ទាប់ពីមានភ្លៀងធ្លាក់ខ្លាំង និងទឹកជំនន់ ភាគច្រើននៅក្នុងទីក្រុង Petit-Goave។ នៅប្រទេសហ្សាម៉ាអ៊ីក មនុស្ស ១៩ នាក់បានស្លាប់ ដោយសារព្យុះសង្ឃរា Melissa មានកម្រិតរហូតទៅដល់ប្រភេទទី ៥ ដែលជាព្យុះខ្លាំងបំផុតមិនធ្លាប់មានពីមុនមក។ ព្យុះនេះបានបំផ្លាញផ្ទះសម្បែង កាត់ផ្ដាច់ផ្លូវ និងកាត់ផ្តាច់ចរន្តអគ្គិសនីដល់ប្រទេសកោះនេះជាង ៧០%ឯណោះ។

នៅប្រទេសគុយបា ទោះបីជាមិនមានរបាយការណ៍អំពីការស្លាប់ក៏ដោយ។ ព្យុះ Melissa ក្លាយជាព្យុះប្រភេទទី ៣ ដោយបង្ខំឱ្យមនុស្ស ៧៣៥.០០០ នាក់ត្រូវជម្លៀសចេញ។ ការខូចខាតនៅទូទាំងតំបន់ការ៉ាបៀនត្រូវបានប៉ាន់ប្រមាណថាមានចំនួន ៤៨-៥២ ពាន់លានដុល្លារអាមេរិក។ ឥឡូវនេះព្យុះMelissaបានចុះខ្សោយទៅជាប្រភេទទី ២ និងកំពុងបោកបក់នៅជិតតំបន់ Bermuda។

ជាការឆ្លើយតបសហរដ្ឋអាមេរិកកំពុងបញ្ជូនក្រុមជួយសង្គ្រោះ និងជំនួយទៅកាន់ប្រទេសហ្សាម៉ាអ៉ីក និងបានផ្តល់ជំនួយដល់ប្រទេសគុយបាផងដែរ៕

អត្ថបទ៖ ប៊ុន សុភាព