មីយ៉ាន់ម៉ា ទម្លាក់គ្រាប់បែក៩ថ្ងៃជាប់គ្នានៅតំបន់ជាប់ព្រំដែនថៃ ដើម្បីកម្ទេចសម្បុក Scammer

មិនមានការបន្ថយដៃឡើយពីសំណាក់យោធាមីយ៉ាន់ម៉ា ក្នុងការកម្ចាត់ក្រុមឧក្រិដ្ឋកម្មតាមអនឡាញ ដោយកងទ័ពបានទម្លាក់គ្រាប់បែកជាប់គ្នាមិនដាច់អស់រយៈពេល៩ថ្ងៃដើម្បីកម្ទេចសម្បុក Scammer ឲ្យហ្មត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Aamarin កាលពីថ្ងៃសៅរ៍ទី១ខែវិច្ឆិកាឆ្នាំ២០២៥ កងទ័ពឆ្មាំការពារព្រំដែន (BGF) ជាសម្ព័ន្ធមិត្តរបស់យោធាមីយ៉ាន់ម៉ា នៅតែបន្តទម្លាក់គ្រាប់ លើតំបន់សេដ្ឋកិច្ចពិសេស KK Park ដែលមានទីតាំងស្ថិតនៅស្រុក Myawaddy រដ្ឋ Karen នៃប្រទេសមីយ៉ាន់ម៉ា ជាប់ឃុំ Mae Ku, ស្រុក Mae Sot, ខេត្ត​ Tak នៃប្រទេសថៃ។

ក្រៅពីការវាយប្រហារអាកាស កងទ័ពក៏បានដាក់បង្កៃគ្រាប់បែកនៅតាមទីតាំងមួយចំនួនផងដែរ ដើម្បីបំផ្ទុះអគារ ហើយអ្វីដែលកាន់តែគួរឲ្យកត់សម្គាល់គឺថា ពួកគេបានបង្កើនប្រតិបត្តិការដល់ទៅ១ថ្ងៃ៤ដង។

យុទ្ធនាការកម្ទេចឥតដកដៃនេះ បានជំរុញឲ្យជនបរទេសរាប់ពាន់នាក់រត់ចូលដីថៃ ខណៈអាជ្ញាធរខេត្ត Tak ក៏បង្កើនការត្រួតពិនិត្យនិងប្រុងជើងការខ្ពស់ ត្រៀមទប់ទល់នឹងស្ថានការណ៍អាក្រក់ផងដែរ។

ទន្ទឹមនោះក៏មានសេចក្តីរាយការណ៍ដែរថា Scammer ជាជនបរទេសមួយក្រុមដែលរត់ចេញពី KK Park បានចូលទៅបើកបណ្តាញឆបោកនៅក្នុងប្រទេសថៃ។

យ៉ាងណា ប៉ូលិសថៃបានឆ្មក់ចូលវីឡាមួយក្នុងខេត្ត Samut Prakarn ដោយចាប់ខ្លួនជនបរទេសជា Scammer ចំនួន២៤នាក់ ភាគខាងច្រើនជាជនជាតិហ្វីលីពីន ដែលសំងំលាក់ខ្លួនបើកបណ្តាញឆបោក។

ក្នុងចំណោមជនបរទេសទាំង២៤នាក់ មាន២១នាក់ជាជនជាតិហ្វីលីពីន, ម៉ាឡេស៊ីម្នាក់, ចិនម្នាក់និងសិង្ហបុរីម្នាក់៕

អត្ថបទ៖ សុខ សុវណ្ណ

ចុចអាន៖ Scammer ២៤នាក់រត់ចេញពីមីយ៉ាន់ម៉ា ចូលថៃ ​បើកបណ្តាញឆបោកតាមអនឡាញ