លោកត្រាំ​សន្យានឹងចែក​លុយ​ពលរដ្ឋ​ម្នាក់ៗ​២០០០​ដុល្លារ​ ដែល​រក​បាន​ពី​ពន្ធគយ

ប្រធានាធិបតី ដូណាល់ ត្រាំ បានប្រកាសផែនការសម្រាប់ការទូទាត់​ប្រាក់​ចំនួន​២០០០​ដុល្លារ​ដល់ប្រជាជនអាមេរិក ដោយនិយាយថា ថវិកា​ទាំង​នេះនឹង​បាន​មក​ពី​ចំណូលដែលបង្កើតដោយពន្ធគយ។

នៅលើ​ការបង្ហោះ​ក្នុង​​បណ្ដាញ​សង្គម Truth Social កាលពីថ្ងៃអាទិត្យ​ទី​៩ខែ​វិច្ឆិកា​ឆ្នាំ​២០២៥ លោកត្រាំ​បាននិយាយថា «ភាគលាភ»​នឹង​ត្រូវបានចែក​​ឲ្យ​ពលរដ្ឋ​អាមេរិក​​គ្រប់ៗ​រូប ប៉ុន្តែ​មិនរាប់បញ្ចូលអ្នកដែលមានប្រាក់ចំណូលខ្ពស់​ឡើយ។ ក្រោយមក រដ្ឋមន្ត្រីក្រសួងរតនាគារលោក Scott Bessent បានប្រាប់សារព័ត៍មាន ABC ថា ការទូទាត់អាចមានទម្រង់ផ្សេងៗគ្នា ដូចជា ការបន្ធូរបន្ថយពន្ធ​របស់​ប្រជាជន​ជា​ដើម។

លោកត្រាំ​ បានអះអាងថា ពន្ធគយបានពង្រឹងសេដ្ឋកិច្ច និងបង្កើតប្រាក់ចំណូល«រាប់ទ្រីលានដុល្លារ»។ លោក​បាន​បន្ថែម​​ថា ចំណូល​​នេះ​ក៏​អាច​ត្រូវ​បាន​ប្រើ​ដើម្បី​កាត់​បន្ថយ​បំណុល​ជាតិ​ដែល​លោក​បាន​លើក​ឡើង​​ថាមាន​ចំនួន​៣៧​ទ្រីលាន​ដុល្លារផង​ដែរ។

យោង​តាម Politico ប្រាក់​ដែល​លោក​ត្រាំ​គ្រោង​នឹង​ចែក​​​នេះ គឺ​​បានមកពីចំណូលដែលប្រមូលបានតាមរយៈពន្ធគយរបស់រដ្ឋបាលលើទំនិញបរទេស។ យ៉ាង​ណា​មិញ អ្នកជំនាញកត់សម្គាល់​ថា កម្មវិធីទូទាត់ផ្ទាល់បែបនេះទំនងជាត្រូវការការយល់ព្រមពីសភា ដើម្បីចាត់ចែងចំណូលពន្ធឡើងវិញ។

សូម​ជម្រាប​ថា នាយកដ្ឋានរតនាគារបានរាយការណ៍ពីការប្រមូលពន្ធគយប្រហែល​១៩៥​ពាន់លានដុល្លារ ក្នុងរយៈពេលបីត្រីមាសដំបូងនៃឆ្នាំសារពើពន្ធ​២០២៥៕

ប្រែសម្រួល៖ ឈាង