អ្នកស្លាប់ដោយសារការវាយប្រហារដ៏សាហាវរបស់អ៊ីស្រាអែលលើហ្គាហ្សា ក្រោយបទឈប់បាញ់កើនដល់ ២៨០ នាក់

អ៊ីស្រាអែលធ្វើការវាយប្រហារថ្មីនៅភាគខាងត្បូងហ្គាហ្សាកាលពីថ្ងៃពុធ សម្លាប់ជនជាតិប៉ាឡេស្ទីនម្នាក់ និងធ្វើឱ្យស្ត្រីម្នាក់ និងកូនរបស់នាងរងរបួសយ៉ាងធ្ងន់ធ្ងរ ដែលនាំឲ្យចំនួនអ្នកស្លាប់សរុប ចាប់តាំងពីបទឈប់បាញ់ថ្ងៃទី ១០ ខែតុលាកើនដល់ ២៨០ នាក់និងរបួសជាង ៦៥០ នាក់។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២០ខែវិច្ឆិកា។

អាជ្ញាធរហ្គាហ្សាបាននិយាយថា អ៊ីស្រាអែលបានបំពានបទឈប់បាញ់ជិត ៤០០ ដង ហើយកំពុងអំពាវនាវឱ្យសហរដ្ឋអាមេរិក អង្គការសហប្រជាជាតិ និងប្រទេសដទៃទៀតបង្ខំឱ្យអ៊ីស្រាអែលបញ្ឈប់ការវាយប្រហារ។

ទន្ទឹមនឹងនេះ ក្រុមប្រឹក្សាសន្តិសុខអង្គការសហប្រជាជាតិបានអនុម័តផែនការរបស់សហរដ្ឋអាមេរិកដើម្បីបង្កើតរដ្ឋបាលអន្តរជាតិបណ្តោះអាសន្ននៅហ្គាហ្សារហូតដល់ឆ្នាំ ២០២៧ ប៉ុន្តែមិនច្បាស់ទេថាតើផែនការនេះនឹងដំណើរការយ៉ាងដូចម្តេច ឬពេលណាទេ។

ចំពោះប្រជាជននៅហ្គាហ្សានិយាយថា ការតស៊ូប្រចាំថ្ងៃរបស់ពួកគេកាន់តែអាក្រក់ទៅៗ។ ពួកគេមានការព្រួយបារម្ភអំពីការស្វែងរកទឹកស្អាត អាហារ និងជម្រកសុវត្ថិភាព។ មនុស្សជាច្រើនមិនអាចត្រឡប់ទៅផ្ទះវិញបានទេ ព្រោះតំបន់ធំៗត្រូវបានបំផ្លាញ ឬគ្រប់គ្រងដោយកងកម្លាំងអ៊ីស្រាអែល។ ការបង្កើនជំនួយដែលបានសន្យា ឲ្យមាន៦០០ ឡានដឹកទំនិញក្នុងមួយថ្ងៃមិនបានកើតឡើងទេ ហើយភាពអត់ឃ្លាននៅតែធ្ងន់ធ្ងរខ្លាំងនៅឡើយ។

លើសពីនេះមន្ត្រីអង្គការសហប្រជាជាតិព្រមានថា រដូវរងានឹងធ្វើឱ្យស្ថានភាពនៅហ្គាហ្សាបច្ចប្បន្នកាន់តែលំបាក ដូចជាអាកាសធាតុត្រជាក់ ភ្លៀងធ្លាក់បង្កជាទឹកជំនន់ និងមានជំនួយតិចតួចពេកចូលទៅក្នុងតំបន់ហ្គាហ្សា។ មន្ត្រីអង្គការសហប្រជាជាតិកំពុងជំរុញឱ្យបើកច្រកឆ្លងកាដើម្បីឱ្យការផ្គត់ផ្គង់សំខាន់ៗអាចទៅដល់ប្រជាជនឲ្យបានឆាប់៕

អត្ថបទ៖ ប៊ុន សុភាព