លោក Macron បដិសេធការអញ្ជើញរបស់លោកត្រាំ ឲ្យចូលរួមក្នុង «ក្រុមប្រឹក្សាសន្តិភាព»

ប្រធានាធិបតីបារាំង លោក Emmanuel Macron បានសម្រេចចិត្តបដិសេធការអញ្ជើញរបស់ប្រធានាធិបតីអាមេរិក លោក ដូណាល់ ត្រាំ ក្នុងការចូលរួម​អង្គភាពអន្តរជាតិថ្មីមួយដែលត្រូវបានបង្កើតឡើងក្រោមឈ្មោះថា «ក្រុមប្រឹក្សាសន្តិភាព» (Board of Peace)។

យោង​តាម​ការ​ចុះ​ផ្សាយ​នា​ថ្ងៃ​ទី​២០​ខែម​ករា​ឆ្នាំ​២០២៦​របស់​សារព័ត៌មាន European Pravda មេដឹកនាំបារាំងត្រូវ​បានគេរាយការណ៍ថា បានសម្តែងការព្រួយបារម្ភយ៉ាងខ្លាំងចំពោះលក្ខន្តិកៈរបស់អង្គការនេះ ដែលលោកជឿថាបានរំលោភលើគោលការណ៍គ្រឹះ និងរចនាសម្ព័ន្ធស្ថាប័នរបស់អង្គការសហប្រជាជាតិ។ ការបដិសេធរបស់លោក Macron បានគូសបញ្ជាក់ពីភាពតានតឹងកាន់តែខ្លាំងឡើងជុំវិញរចនាសម្ព័ន្ធនៃក្រុមប្រឹក្សានេះ ដែលត្រូវបានបង្កើតឡើងក្នុងគោលបំណងត្រួតពិនិត្យការកសាងឡើងវិញ និងការគ្រប់គ្រងអន្តរកាលនៅតំបន់ហ្គាហ្សា ប៉ុន្តែហាក់ដូចជាមានគោល​នយោបាយ​គ្របដណ្តប់លើជម្លោះសកលផ្សេងទៀតផងដែរ។

«ក្រុមប្រឹក្សាសន្តិភាព» បានរងការរិះគន់យ៉ាងខ្លាំង បន្ទាប់ពីមានការលេចធ្លាយសេចក្តីព្រាងលក្ខន្តិកៈ ដែលបានបង្ហើបថា ប្រទេសដែលចង់ក្លាយជាសមាជិកអចិន្ត្រៃយ៍ត្រូវបង់វិភាគទានចំនួន ១ពាន់លានដុល្លារអាមេរិក។ យោងតាមបទបញ្ជាដែលបានស្នើឡើង ប្រធានាធិបតី ត្រាំ នឹងធ្វើជាប្រធានដំបូងគេដែលមានអំណាចផ្តាច់មុខលើការសម្រេចចិត្តសំខាន់ៗទាំងអស់ រួមទាំងសិទ្ធិក្នុងការតែងតាំង ឬដកតំណែងសមាជិកក្រុមប្រឹក្សាផងដែរ។ ទោះបីជាមានមេដឹកនាំមួយចំនួន រួមទាំងនាយករដ្ឋមន្ត្រីហុងគ្រី លោក Viktor Orbán បានទទួលយកការអញ្ជើញក៏ដោយ ក៏មេដឹកនាំប្រទេសដទៃទៀតនៅតែមានការស្ទាក់ស្ទើរ។ ជាក់ស្តែង នៅប្រទេសប៉ូឡូញ រដ្ឋាភិបាលបានព្រមានប្រធានាធិបតី Karol Nawrocki ថាការចូលរួមក្នុងអង្គភាពបែបនេះ ចាំបាច់ត្រូវមានការយល់ព្រមជាផ្លូវការពីទាំងគណៈរដ្ឋមន្ត្រី និងសភា ដែលនេះបង្ហាញ​ឲ្យឃើញកាន់តែច្បាស់ពីឧបសគ្គផ្នែកការទូត និង​ផ្នែក​ច្បាប់ដែលគំនិតផ្តួចផ្តើមរបស់លោកត្រាំ កំពុងជួបប្រទះ៕

​ប្រែសម្រួល៖ ឈាង