គុយបាបង្ហាញជំហរចង់សន្ទនាជាមួយអាមេរិក ប៉ុន្តែមិនព្រមលន់តួ

ប្រធានាធិបតីគុយបា លោក Miguel Diaz-Canel បានប្រកាសកាលពីថ្ងៃព្រហស្បតិ៍​ទី​៥​ខែ​កុម្ភៈ​ឆ្នាំ​២០២៦​ថា ប្រទេសរបស់លោកបានត្រៀមខ្លួនរួចជាស្រេចក្នុងការបើកកិច្ចសន្ទនាជាមួយសហរដ្ឋអាមេរិកលើគ្រប់ប្រធានបទទាំងអស់ ប៉ុន្តែត្រូវធ្វើឡើងក្នុងឋានៈជាដៃគូស្មើភាព និងគ្មានការដាក់លក្ខខណ្ឌជាមុន។

តាម​ការ​ចេញ​ផ្សាយ​របស់​ France24 ការថ្លែងនេះបានធ្វើឡើងបន្ទាប់ពីប្រធានាធិបតីអាមេរិក ដូណាល់ ត្រាំ បានប្រើប្រាស់ពាក្យសម្តីធ្ងន់ៗមកលើកោះកុម្មុយនិស្តមួយនេះ ដោយ​ព្រមានថា គុយបាជិតដល់ចំណុចរលំរលាយហើយ ហើយគួរតែប្រញាប់ធ្វើការចរចាមុនយឺតពេល។ សេតវិមានអះអាងថា ការចរចាកំពុងប្រព្រឹត្តទៅ តែ​រដ្ឋាភិបាលទីក្រុងឡាហាវ៉ានបានបដិសេធចំពោះអត្ថិភាពនៃកិច្ចចរចាផ្លូវការណាមួយ និងបានសង្កត់ធ្ងន់លើការគោរពអធិបតេយ្យភាព និងការមិនជ្រៀតជ្រែកកិច្ចការផ្ទៃក្នុង។

វិបត្តិសេដ្ឋកិច្ចនៅគុយបាកាន់តែដុនដាបខ្លាំង បន្ទាប់ពីមេដឹកនាំវ៉េណេស៊ុយអេឡាត្រូវបានទម្លាក់ពីតំណែងក្នុងប្រតិបត្តិការយោធាអាមេរិកកាលពីដើម​ខែមករា​មុន ដែលនាំ​ឲ្យ​ការផ្គត់ផ្គង់ប្រេងដែលគុយបាធ្លាប់ពឹងផ្អែកត្រូវបានកាត់ផ្តាច់។ លោកត្រាំ បានប្តេជ្ញានឹងបង្អត់ប្រេងដល់គុយបា និងគំរាមដាក់ពន្ធលើប្រទេសណាដែលហ៊ានជួយកោះ​មួយ​នេះ ដែលបង្ក​ឲ្យមានការដាច់ចរន្តអគ្គិសនីជាញឹកញាប់ និងប៉ះពាល់ដល់ការរស់នៅរបស់ប្រជាជនរាប់លាន​នាក់។ ទោះបីជាស្ថិតក្នុងស្ថានភាពលំបាក លោក Diaz-Canel បានអះអាងថា គុយបាមិននៅម្នាក់ឯងឡើយ ដោយមានមិត្តភក្តិដែលមិនបញ្ចេញឈ្មោះកំពុងផ្តល់ជំនួយសម្ងាត់ និងបានជំរុញ​ឲ្យ​ប្រទេសរបស់លោកងាកមករកថាមពលបៃតងវិញ ដើម្បីកាត់បន្ថយការពឹងផ្អែកលើបរទេស។

នៅក្នុងសកម្មភាពការទូតដ៏ស្មុគស្មាញនេះ អាមេរិកបានប្រកាសផ្តល់ជំនួយចំនួន ៦​លានដុល្លារដល់ប្រជាជនគុយបាតាមរយៈព្រះវិហារកាតូលិក ខណៈដែលម៉ិកស៊ិកកំពុងព្យាយាមជួយបញ្ជូនប្រេង​ឲ្យ​គុយបាឡើងវិញ ប៉ុន្តែមិនចង់ប្រឈមមុខនឹងការដាក់ទណ្ឌកម្មពីអាមេរិកឡើយ។ មន្ត្រីគុយបាបានទម្លាក់កំហុសលើការដាក់ទណ្ឌកម្មរបស់អាមេរិក ចំពោះវិបត្តិសេដ្ឋកិច្ចដ៏អាក្រក់បំផុតក្នុងរយៈពេលជាច្រើនទសវត្សរ៍នេះ ប៉ុន្តែក្រុមអ្នកសង្កេតការណ៍បានលើកឡើងថា ការគ្រប់គ្រងសេដ្ឋកិច្ចមិនបានល្អ និងការធ្លាក់ចុះនៃវិស័យទេសចរណ៍ក្រោយជំងឺរាតត្បាតកូវីដ១៩ ក៏ជាកត្តារួមចំណែកផងដែរ។ សម្រាប់ពេលនេះ ជោគវាសនានៃទំនាក់ទំនងរវាងប្រទេសទាំងពីរ នៅតែស្ថិតក្នុងភាពមិនច្បាស់លាស់រវាងការទាមទារការផ្លាស់ប្តូររបប និងការការពារឯករាជ្យភាពជាតិ៕

ប្រែសម្រួល៖ ឈាង