UN កំពុងរង់ចាំមើលថា តើអាមេរិកនឹងសងបំណុលជិត៤ពាន់លានដុល្លារនៅពេលណា

ខណៈដែលអង្គការសហប្រជាជាតិ (UN) កំពុងឈរនៅមាត់ជ្រោះនៃអ្វីដែលអគ្គលេខាធិការ លោក Antonio Guterres ហៅថា «ការដួលរលំហិរញ្ញវត្ថុដែលមិនអាចជៀសបាន» ពិភពលោកទាំងមូលកំពុងផ្តោតការចាប់អារម្មណ៍លើទីក្រុងវ៉ាស៊ីនតោន ដើម្បីរង់ចាំមើលថាតើការសន្យាសងបំណុលរាប់ពាន់លានដុល្លារនឹងក្លាយជាការពិតដែរឬទេ។

តាម​ការ​ចុះ​ផ្សាយ​របស់​ AP នា​ថ្ងៃ​ទី​១០​ខែ​កុម្ភៈ​ឆ្នាំ​២០២៦ ដោយសារ​អាមេរិកជំពាក់បំណុលរហូតដល់​៩៥%​នៃថវិកាប្រតិបត្តិការសរុបរបស់ UN អង្គការនេះបានព្រមានថា ខ្លួនអាចនឹងអស់សាច់ប្រាក់សម្រាប់ដំណើរការនៅត្រឹមខែកក្កដាខាងមុខ។ បន្ទាប់ពីការផ្អាកផ្តល់ថវិកាទាំងស្រុងក្នុងឆ្នាំ​២០២៥ រដ្ឋបាលលោក ដូណាល់ ​ត្រាំ បានបង្ហាញសញ្ញាផ្លាស់ប្តូរ ដោយឯកអគ្គរដ្ឋទូត Mike Waltz បានសន្យាថានឹងធ្វើការបង់ប្រាក់ «ក្នុងចំនួនដ៏ច្រើន» ក្នុងរយៈពេលប៉ុន្មានសប្តាហ៍ទៀត ទោះបីជាចំនួនពិតប្រាកដនៅមិនទាន់ដឹងច្បាស់ក៏ដោយ។

ឱនភាពហិរញ្ញវត្ថុនេះមានទំហំធំធេងណាស់៖ បច្ចុប្បន្នសហរដ្ឋអាមេរិកជំពាក់ប្រហែល ២,២ពាន់លានដុល្លារសម្រាប់កញ្ចប់ថវិកាប្រតិបត្តិការទូទៅ និង ១,៨ពាន់លានដុល្លារទៀតសម្រាប់បេសកកម្មរក្សាសន្តិភាពជុំវិញពិភពលោក។ ប្រទេសជិត៦០​បានបង់ភាគទានប្រចាំឆ្នាំរបស់ពួកគេត្រឹមថ្ងៃទី៨​ខែកុម្ភៈ នៅ​ឡើយ​​អាមេរិកដែល​​ជាកូនបំណុលធំជាងគេ។ បើប្រៀបធៀបទៅ ប្រទេសវ៉េណេស៊ុយអេឡាដែលជាប់លេខពីរក្នុងបញ្ជីអ្នកជំពាក់បំណុល មានចំនួនត្រឹមតែ​៣៨​លានដុល្លារប៉ុណ្ណោះ ប៉ុន្តែចំនួននេះបានធ្វើ​ឲ្យ​ប្រទេសអាមេរិកខាងត្បូងមួយនេះបាត់បង់សិទ្ធិបោះឆ្នោតនៅក្នុងមហាសន្និបាតរួចទៅហើយ។

សម្រាប់អង្គការសហប្រជាជាតិ នេះមិនមែនគ្រាន់តែជាបញ្ហាបញ្ជីស្នាមនោះទេ ប៉ុន្តែវាគឺជាការតស៊ូដើម្បីរស់។ លោក Guterres កំពុងជំរុញ​ឲ្យ​មានការកែទម្រង់ច្បាប់ហិរញ្ញវត្ថុដើម្បីបង្ការការបិទទ្វារទាំងស្រុង ទោះបីជា​អាមេរិកធ្លាប់បានដកខ្លួនចេញពីទីភ្នាក់ងារនានាដូចជា WHO និង UNESCO ក៏ដោយ។ ខណៈដែលមន្ត្រី UN បន្តទំនាក់ទំនងយ៉ាងជិតស្និទ្ធជាមួយបេសកកម្ម​អាមេរិក សហគមន៍អន្តរជាតិបានត្រឹមតែរង់ចាំមើលថាតើប្រទេសដែលមានសេដ្ឋកិច្ចធំជាងគេលើពិភពលោកមួយនេះ នឹងសងបំណុលរបស់ខ្លួន ឬទុក​ឲ្យអង្គការពិភពលោកមួយនេះដួលរលំ៕

ប្រែសម្រួល៖ ឈាង