ពលរដ្ឋថៃជាង ៣០០នាក់ ឡោមព័ទ្ធសាលាស្រុកក្នុងខេត្ត Suphan Buri ស្រែកតវ៉ាឲ្យរាប់សន្លឹកឆ្នោតឡើងវិញ

ពលរដ្ឋថៃជាង៣០០នាក់នៅខេត្ត Suphan Buri ក៏កំពុងផ្ទុះកំហឹងផងដែរ ដោយពួកគេបានលើកគ្នាទៅតវ៉ានៅមណ្ឌលបោះឆ្នោតស្រុក Mueang Suphan Buri ស្រែកទាមទារឲ្យមានការរាប់សន្លឹកឆ្នោតឡើងវិញ។

តាមការផ្សាយរបស់ Khaosod, ពលរដ្ឋទាំងនេះដែលជាអ្នកគាំទ្រគណបក្សប្រជាជន បានឡោមព័ទ្ធសាលាស្រុក ទាមទារឲ្យរាប់សន្លឹកឆ្នោតឡើងវិញនៅគ្រប់មណ្ឌលក្នុងខេត្ត Suphan Buri។

ពួកគេអះអាងមិនទទួលស្គាល់លទ្ធផលទេ ហើយជំរុញឲ្យគណៈកម្មាធិការរៀបចំការបោះឆ្នោត (EC) រួមទាំងស្ថាប័នរដ្ឋាភិបាលផ្សេងទៀត អនុវត្តទៅតាមច្បាប់ កុំកំណត់ទុកជាមុនថា នរណាជាអ្នកឈ្នះបែបនេះ ព្រោះឆ្នោតមួយសន្លឹកៗរបស់ពួកគេពិតជាមានតម្លៃណាស់។

ការតវ៉ានេះកើតឡើង ចំពេលតំណាងបក្សប្រជាជនអះអាងថា ពួកគេរកឃើញភស្តុតាងនៃភាពមិនប្រក្រតី ជាពិសេសនៅក្នុងមណ្ឌលទី៤ ស្រុក Doem Bang Nang Buat ដែលមានការលួចប្រើសិទ្ធិបោះឆ្នោតជំនួសអ្នកដទៃ។ 

មិនត្រឹមប៉ុណ្ណឹង ពួកគេក៏រិះគន់ដែរថា មន្ត្រីនៅតាមមណ្ឌលបោះឆ្នោតមួយចំនួនបានរាប់សន្លឹកឆ្នោតដោយលាក់លៀម មិនឲ្យប្រជាពលរដ្ឋចូលទៅមើលជិតៗបានឡើយ។ ពួកគេជឿថា មានការបន្លំសន្លឹកឆ្នោតរហូតដល់ទៅ ៧០%។

ជាការតវ៉ា ពលរដ្ឋទាំងជាង៣០០នាក់បញ្ជាក់ថា ពួកគេនឹងមិនរំសាយការជួបជុំឡើយ ដរាបណាមិនទាន់មានការបើកហឹបឆ្នោតរាប់ឡើងវិញភ្លាមៗ ព្រោះពួកគេបារម្ភថា ប្រសិនបើហឹបឆ្នោតត្រូវបានបញ្ជូនទៅដល់ EC កណ្តាល នោះដំណើរការប្តឹងផ្តល់នឹងត្រូវអូសបន្លាយដល់ទៅ ៩០ ថ្ងៃ ដែលយឺតពេលក្នុងការទប់ស្កាត់ការបញ្ជាក់អាសនៈសមាជិកសភា។

បញ្ហាក្រោយការបោះឆ្នោតនៅប្រទេសថៃកាន់តែកើតច្រើនឡើងៗ ដោយករណីថ្មីមួយទៀតគឺនៅខេត្ត ឈុនបុរី ​ដោយកាលពីរាត្រីថ្ងៃអង្គារទី១០ខែកុម្ភៈ ពលរដ្ឋនាំគ្នាជិះម៉ូតូប្រសាចដេញតាមរថយន្តដឹកហឹបឆ្នោត ព្រោះតែភាពមិនប្រក្រតី ពោលគឺរថយន្តបានជិះហួសគោលដៅដែលត្រូវទុកសន្លឹកឆ្នោត ឆ្ពោះទៅកាន់ទីតាំងអាថ៌កំបាំង។

រឿងហេតុត្រូវបានរាយការណ៍ដោយបេក្ខជនសមាជិកសភាមណ្ឌល៣ ខេត្តឈុនបុរី មកពីបក្សប្រជាជន Chawal Polmuangdee ដែល Live វីដេអូលើទំព័រ Facebook របស់ខ្លួនផ្ទាល់នៅម៉ោង៨យប់ ​ដោយអះអាងថា គណៈកម្មាធិការរៀបចំការបោះឆ្នោត (EC) បានផ្លាស់ប្តូរទីតាំងហឹបឆ្នោតដោយបំពាន ពោលគឺដំបូងឡើយ ពួកគេប្រាប់ថានឹងយកទៅការិយាល័យ EC ខេត្តឈុនបុរី ប៉ុន្តែបែរជាបើកបរហួសទីនោះទៅកាន់គោលដៅមិនច្បាស់លាស់ ទើបក្រុមការងាររបស់លោកដេញតាមពីក្រោយតែម្តង។

គេឃើញថារថយន្តដឹកហឹបឆ្នោតទាំងនោះ បានទៅចតនៅទីតាំងមួយដែលមើលទៅដូចជាឃ្លាំងទំនិញ ហើយកំពុងធ្វើការលើកហឹបឆ្នោតចុះ។ រឿងនេះបង្កឲ្យមានការរិះគន់យ៉ាងខ្លាំងពីសាធារណជន ដោយចោទសួរថា ហេតុអ្វីចាំបាច់ត្រូវប្តូរទីតាំងហឹបឆ្នោតនៅពេលយប់ជ្រៅបែបនេះ ហើយពលរដ្ឋស្រែកបង្ខំឲ្យមន្ត្រីចេញមកបកស្រាយ៕

ប្រភព៖ Khaosod