ឈុនបុរីវឹកវរ! រថយន្តដឹកហឹបឆ្នោតចេញទាំងយប់ ទៅកាន់ទីតាំងអាថ៌កំបាំង, ពលរដ្ឋជិះម៉ូតូដេញតាមប្រសាច

បញ្ហាក្រោយការបោះឆ្នោតនៅប្រទេសថៃកាន់តែកើតច្រើនឡើងៗ ជាពិសេសនៅខេត្ត ឈុនបុរី តែម្តង ​ដោយកាលពីរាត្រីថ្ងៃអង្គារទី១០ខែកុម្ភៈ ពលរដ្ឋនាំគ្នាជិះម៉ូតូប្រសាចដេញតាមរថយន្តដឹកហឹបឆ្នោត ព្រោះតែភាពមិនប្រក្រតី ពោលគឺរថយន្តបានជិះហួសគោលដៅដែលត្រូវទុកសន្លឹកឆ្នោត ឆ្ពោះទៅកាន់ទីតាំងអាថ៌កំបាំង។

រឿងហេតុត្រូវបានរាយការណ៍ដោយបេក្ខជនសមាជិកសភាមណ្ឌល៣ ខេត្តឈុនបុរី មកពីបក្សប្រជាជន Chawal Polmuangdee ដែល Live វីដេអូលើទំព័រ Facebook របស់ខ្លួនផ្ទាល់នៅម៉ោង៨យប់ ​ដោយអះអាងថា គណៈកម្មាធិការរៀបចំការបោះឆ្នោត (EC) បានផ្លាស់ប្តូរទីតាំងហឹបឆ្នោតដោយបំពាន ពោលគឺដំបូងឡើយ ពួកគេប្រាប់ថានឹងយកទៅការិយាល័យ EC ខេត្តឈុនបុរី ប៉ុន្តែបែរជាបើកបរហួសទីនោះទៅកាន់គោលដៅមិនច្បាស់លាស់ ទើបក្រុមការងាររបស់លោកដេញតាមពីក្រោយតែម្តង។

គេឃើញថារថយន្តដឹកហឹបឆ្នោតទាំងនោះ បានទៅចតនៅទីតាំងមួយដែលមើលទៅដូចជាឃ្លាំងទំនិញ ហើយកំពុងធ្វើការលើកហឹបឆ្នោតចុះ។ រឿងនេះបង្កឲ្យមានការរិះគន់យ៉ាងខ្លាំងពីសាធារណជន ដោយចោទសួរថា ហេតុអ្វីចាំបាច់ត្រូវប្តូរទីតាំងហឹបឆ្នោតនៅពេលយប់ជ្រៅបែបនេះ ហើយពលរដ្ឋស្រែកបង្ខំឲ្យមន្ត្រីចេញមកបកស្រាយ។

នៅ ឈុនបុរី នេះដែរ, បើយោងតាមការផ្សាយរបស់ Khaosod ក្រុមអ្នកបោះឆ្នោត និងតំណាងគណបក្សនយោបាយក្នុងខេត្តនេះ បានលើកគ្នាមកឡោមព័ទ្ធទីតាំងរក្សាទុកហិបឆ្នោត ដើម្បីពិនិត្យមើលថា តើសន្លឹកឆ្នោតរបស់ពួកគេនៅរក្សាសុវត្ថិភាព និងមិនមានការកែឬក្លែងបន្លំដែរឬទេ ខណៈមានហេតុការណ៍ដាច់ចរន្តអគ្គិសនីក្នុងអំឡុងពេលរាប់ឆ្នោតនៅតាមមណ្ឌលមួយចំនួន ដូចជានៅតំបន់ Bang Saen ដែលភ្លើងបានដាច់អស់រយៈពេលជាង ៤០ នាទី។

ដោយសារបញ្ហាអគ្គិសនីនេះ, អ្នកបោះឆ្នោតនៅឈុនបុរី មិនអស់ចិត្តនឹងលទ្ធផលឡើយ ហើយសង្ស័យថា មានភាពមិនប្រក្រតី ដូច្នេះពួកគេទាមទារឲ្យមានការរាប់ឆ្នោតឡើងវិញដើម្បីតម្លាភាព។

យ៉ាងណា មកទល់ពេលនេះ មិនទាន់មានការរាប់ឆ្នោតឡើងវិញនៅឡើយទេ ដោយសារមន្ត្រីនៃគណៈកម្មាធិការរៀបចំការបោះឆ្នោត បានប្រាប់ឲ្យក្រុមអ្នកតវ៉ាប្រមូលឯកសារព័ស្តុតាង ដើម្បីដាក់ពាក្យបណ្ដឹងផ្លូវការ ដើម្បីឲ្យដំណើរការតាមផ្លូវច្បាប់អាចចាប់ផ្តើមបាន៕

អត្ថបទ៖ សុខ សុវណ្ណ