ឧត្តមសេនីយ៍ជាន់ខ្ពស់អាមេរិក ធ្វើទស្សនកិច្ចដ៏គួរឲ្យភ្ញាក់ផ្អើលទៅកាន់ វ៉េណេស៊ុយអេឡា

លោកឧត្តមសេនីយ៍ Francis Donovan និងមន្ត្រីជាន់ខ្ពស់នៃមន្ទីរបញ្ចកោណ Joseph Humire បានធ្វើទស្សនកិច្ចដ៏គួរឲ្យភ្ញាក់ផ្អើលមួយទៅកាន់ប្រទេសវ៉េណេស៊ុយអេឡា កាលពីថ្ងៃពុធទី១៨ខែកុម្ភៈ ដើម្បីពិភាក្សាអំពីសន្តិសុខ។ នេះបើយោងតាមរបាយការណ៍ចេញផ្សាយដោយភ្នាក់ងារ Reuters ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលវ៉េណេស៊ុយអេឡាបាននិយាយថា គណៈប្រតិភូយោធាអាមេរិកបានជួបជាមួយប្រធានាធិបតីស្តីទីលោកស្រី Delcy Rodriguez រដ្ឋមន្ត្រីក្រសួងការពារជាតិ Vladimir Padrino និងរដ្ឋមន្ត្រីក្រសួងមហាផ្ទៃ Diosdado Cabello។ ភាគីទាំងពីរបានព្រមព្រៀងគ្នាសហការគ្នាក្នុងការប្រយុទ្ធប្រឆាំងនឹងការជួញដូរគ្រឿងញៀន អំពើភេរវកម្ម និងការធ្វើចំណាកស្រុក។

រដ្ឋមន្ត្រីក្រសួងទំនាក់ទំនងវ៉េណេស៊ុយអេឡាលោក Miguel Angel Perez បានលើកឡើងថា កិច្ចប្រជុំនេះបានបញ្ជាក់ថា ការទូតត្រូវតែជាយន្តការមួយដើម្បីដោះស្រាយភាពខុសគ្នា និងដោះស្រាយបញ្ហាដែលជាផលប្រយោជន៍របស់ប្រទេសទាំងពីរ និងតំបន់។

ដោយឡែក បញ្ជាការភាគខាងត្បូង (SOUTHCOM) ដែលជាទីភ្នាក់ងារទទួលបន្ទុកប្រតិបត្តិការយោធាអាមេរិកនៅអាមេរិកខាងត្បូង អាមេរិកកណ្តាល និងការ៉ាប៊ីន បានចេញសេចក្តីថ្លែងការណ៍រួមថា ការពិភាក្សាបានផ្តោតលើបរិយាកាសសន្តិសុខ ជំហាននានាដើម្បីធានាការអនុវត្តផែនការ ៣ ដំណាក់កាលរបស់ប្រធានាធិបតី ដូណាល់ ត្រាំ ជាពិសេសស្ថិរភាពនៅក្នុងប្រទេសវ៉េណេស៊ុយអេឡា ក៏ដូចជាសារៈសំខាន់នៃសន្តិសុខរួមនៅទូទាំងអឌ្ឍគោលខាងលិច។

យ៉ាងណាមិញ ដំណើរទស្សនកិច្ចនេះ គឺជាដំណើរទស្សនកិច្ចលើកដំបូងរបស់គណៈប្រតិភូយោធាសហរដ្ឋអាមេរិក ចាប់តាំងពីកងកម្លាំងអាមេរិកបានចាប់ខ្លួនអតីតប្រធានាធិបតីលោក​ នីកូឡាស់ ម៉ាឌូរ៉ូ ក្នុងការវាយឆ្មក់មួយកាលពីខែមុន ហើយបាននាំលោកទៅកាន់ទីក្រុងញូវយ៉ក ដើម្បីប្រឈមមុខនឹងការចោទប្រកាន់ពីបទជួញដូរគ្រឿងញៀន និងជាប្រតិបត្តិការដែលបានកើតឡើងដោយគ្មានការប្រកាសជាមុន ដោយសម្គាល់ដំណើរទស្សនកិច្ចលើកដំបូងរបស់ឧត្តមសេនីយ៍ Francis Donovan ទៅកាន់អាមេរិកឡាទីន ក្នុងនាមជាមេដឹកនាំនៃបញ្ជាការភាគខាងត្បូង SOUTHCOM ចាប់តាំងពីត្រូវបានតែងតាំងកាលពីថ្ងៃទី ៥ ខែកុម្ភៈ ឆ្នាំ២០២៦ ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

កាណាដា និងអូស្ត្រាលី ជំរុញវិស័យការពារជាតិខ្លួនឯង ដោយលែងពឹងផ្អែកអាមេរិក