ព័ត៌មានអន្ដរជាតិ

អាមេរិកផ្តល់ប្រាក់១៦០លានដុល្លារឲ្យ UN ក្នុងចំណោមទឹកប្រាក់៤ប៊ីលានដែលជំពាក់

បានផុស

៤ ខែ មុន

នៅ

ថ្ងៃសុក្រ ២០ កុម្ភៈ ២០២៦

ដោយ

អ្នកនាំពាក្យអង្គការសហប្រជាជាតិ (UN) បាននិយាយកាលពីថ្ងៃព្រហស្បតិ៍ថា សហរដ្ឋអាមេរិកបានសងប្រាក់ប្រហែល ១៦០លានដុល្លារ ក្នុងចំណោមប្រាក់សរុបជាង ៤ប៊ីលានដុល្លារ ដែលជំពាក់អង្គការសហប្រជាជាតិ ខណៈប្រធានាធិបតី លោក ដូណាល់ ត្រាំ ធ្វើជាម្ចាស់ផ្ទះនៃកិច្ចប្រជុំលើកដំបូងនៃ «ក្រុមប្រឹក្សាសន្តិភាព» ដែលលោកបង្កើតឡើងនៅថ្ងៃទី១៩ ខែកុម្ភៈក្នុងក្រុងវ៉ាស៊ីនតោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យអង្គការសហប្រជាជាតិលើកឡើងក្នុងសេចក្តីថ្លែងការណ៍មួយថា៖«កាលពីសប្តាហ៍មុន យើងបានទទួលប្រាក់ប្រហែល ១៦០ លានដុល្លារពីសហរដ្ឋអាមេរិកជាការទូទាត់មួយផ្នែកនៃបំណុលកន្លងមក សម្រាប់ថវិកាទូទៅរបស់អង្គការសហប្រជាជាតិ»។

លោក ដូណាល់ ត្រាំ បានលើកឡើងអំឡុងពេលថ្លែងសុន្ទរកថារបស់ខ្លួនក្នុងកិច្ចប្រជុំក្រុមប្រឹក្សាសន្តិភាពថា ទីក្រុងវ៉ាស៊ីនតោននឹងផ្តល់ថវិកាដល់អង្គការសហប្រជាជាតិដើម្បីពង្រឹងភាពជាម្ចាស់ការរបស់ពួកគេ។

គួរឲ្យដឹងថា សហរដ្ឋអាមេរិកគឺជាប្រទេសផ្តល់មូលនិធីធំបំផុតសម្រាប់ថវិការបស់អង្គការសហប្រជាជាតិ ប៉ុន្តែរដ្ឋបាលលោក ដូណាល់ ត្រាំ បានបដិសេធមិនធ្វើការទូទាត់ចំពោះថវិកាទូទៅ និងថវិកាដើម្បីរក្សាសន្តិភាព ជាពិសេសកាត់បន្ថយមូលនិធិស្ម័គ្រចិត្តដល់ភ្នាក់ងារអង្គការសហប្រជាជាតិជាមួយនឹងថវិកាផ្ទាល់ខ្លួនរបស់ពួកគេផងដែរ។

ក្នុងរដ្ឋបាលរបស់ប្រធានាធិបតី ដូណាល់ ត្រាំ នេះដែរ ទីក្រុងវ៉ាស៊ីនតោនបានដកខ្លួនចេញពីភ្នាក់ងារអង្គការសហប្រជាជាតិជាច្រើន ដែលធ្វើឲ្យស្ថាប័នកំពូលនេះកាន់តែធ្លាក់ចុះឥទ្ធិពលក្នុងដំណោះស្រាយជម្លោះអន្តរជាតិនាពេលបច្ចុប្បន្ន។

លើសពីនេះ មន្ត្រីអង្គការសហប្រជាជាតិឱ្យដឹងថា សហរដ្ឋអាមេរិកជំពាក់ប្រាក់ចំនួន ២.១៩ ប៊ីលានដុល្លារសម្រាប់ថវិកាទូទៅរបស់អង្គការសហប្រជាជាតិ គិតត្រឹមដើមខែកុម្ភៈ ច្រើនជាង៩៥ភាគរយ នៃចំនួនសរុបដែលជំពាក់ដោយប្រទេសនានានៅទូទាំងពិភពលោក។ លើសពីនេះ សហរដ្ឋអាមេរិកក៏ជំពាក់ប្រាក់ចំនួន ២.៤ ប៊ីលានដុល្លារផ្សេងទៀត សម្រាប់បេសកកម្មរក្សាសន្តិភាពបច្ចុប្បន្ន និងអតីតកាល រួមទាំង ៤៣.៦លានដុល្លារ សម្រាប់ប្រព័ន្ធតុលាការអង្គការសហប្រជាជាតិផងដែរ។

យ៉ាងណាមិញ លោក ដូណាល់ ត្រាំ មានប្រសាសន៍អំឡុងពេលកិច្ចប្រជុំក្រុមប្រឹក្សាសន្តិភាពថា៖ «យើងនឹងជួយពួកគេ (អង្គការសហប្រជាជាតិ) ខាងផ្នែកហិរញ្ញវត្ថុ ហើយយើងនឹងធ្វើឱ្យប្រាកដថា អង្គការសហប្រជាជាតិអាចដំណើរការបានបាន»។

លោក ត្រាំ បន្តថា៖ «ខ្ញុំគិតថាអង្គការសហប្រជាជាតិមានសក្តានុពលដ៏អស្ចារ្យ សក្តានុពលដ៏អស្ចារ្យមែនទែន។ ប៉ុន្តែវាមិនទាន់អាចសម្រេចបាននូវសក្តានុពលនោះទេ»៕

ប្រែសម្រួល៖ ណឺ មិនា