ព័ត៌មានអន្ដរជាតិ

នាយករដ្ឋមន្ត្រីជប៉ុន Takaichi បដិសេធមិនឲ្យស្ត្រីអាចស្នងរាជ្យ

បានផុស

៤ ខែ មុន

នៅ

ថ្ងៃសៅរ៍ ២៨ កុម្ភៈ ២០២៦

ដោយ

នាយករដ្ឋមន្ត្រីជប៉ុន លោកស្រី Sanae Takaichi បានថ្លែងកាលពីថ្ងៃសុក្រថា លោកស្រីជំទាស់នឹងការផ្លាស់ប្តូរច្បាប់ស្នងរាជ្យរបស់គ្រួសាររាជវង្ស ដែលបច្ចុប្បន្នអនុញ្ញាតឱ្យតែបុរសប៉ុណ្ណោះដែលអាចឡើងគ្រងរាជ្យបាន។

លោកស្រី សាណាអេ តាកាអ៊ិឈិ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម AFP ចុះផ្សាយថ្ងៃទី២៧ខែកុម្ភៈឆ្នាំ២០២៦, ជាក់ស្តែងក្នុងប្រទេសជប៉ុនក្នុងត្រកូលស្តេចមានតែកូនចៅក្នុងគ្រួសារជាបុរសប៉ុណ្ណោះដែលអាចឡើងគ្រងរាជ្យបល្ល័ង្ក នាពេលបច្ចុប្បន្នបាន។

ដោយសារតែព្រះចៅអធិរាជ Naruhito ព្រះជន្ម៦៦ព្រះវស្សា មានបុត្រីតែមួយអង្គប៉ុណ្ណោះ ក្តីសង្ឃឹមសម្រាប់ការបន្តគ្រួសារអធិរាជគឺស្ថិតនៅលើព្រះអង្គម្ចាស់ Hisahito ដែលជាបុត្រាច្បងរបស់ព្រះអង្គម្ចាស់ Akishino ដែលជាប្អូនប្រុសរបស់អធិរាជ Naruhito។

លោកស្រី Takaichi ប្រាប់សភាកាលពីថ្ងៃសុក្រថា «មានក្រុមអ្នកជំនាញមួយក្រុមក្នុងឆ្នាំ២០២១ រកឃើញហេតុផលសមស្របក្នុងការកំណត់ថាមានតែកូនចៅប្រុសក្នុងខ្សែរាជ្យវង្សទទួលបានសិទ្ធិពេញលេញបន្តពូជពង្សអធិរាជ»។ លោកស្រី គាំទ្រការលើកឡើងនេះ!

លោកស្រីបន្តថា៖ «រដ្ឋាភិបាល និងខ្ញុំផ្ទាល់ផងដែរ គោរពរបាយការណ៍លើកឡើងនេះ»។

លោកស្រីធ្លាប់បានព្រមានថា ការកែសម្រួលច្បាប់ស្នងរាជ្យរបស់គ្រួសារអធិរាជគឺជាបញ្ហាបន្ទាន់ ដែលគួរយកចិត្តទុកដាក់ ទោះបីជារឿងនេះទំនងជាពាក់ព័ន្ធនឹងការទទួលយកអ្នកថ្មីក៏ដោយ។

ប្រពៃណីដែលកំណត់ថាមានតែបុរសដែលអាចបន្តតាមខ្សែរាជវង្សបាន មានអាយុកាល ២ ៦០០ឆ្នាំមកហើយ។

យ៉ាងណាមិញ ការស្ទង់មតិពីសាធារណជនបង្ហាញថាមានការយល់ស្របជាច្រើន ដែលចង់ឱ្យស្ត្រីឡើងគ្រងរាជ្យម្ដង។

គួរបញ្ជាក់ថា រដ្ឋាភិបាលជប៉ុនបានជជែកវែកញែកពីច្បាប់ស្នងរាជ្យក្នុងខ្សែរាជវង្សអស់រយៈពេលច្រើនទសវត្សរ៍មកហើយ ដោយធ្លាប់មានគណៈកម្មាធិការរដ្ឋាភិបាលមួយក្នុងឆ្នាំ២០០៥ បានណែនាំច្បាប់ឱ្យប្រគល់រាជ្យទៅកូនច្បងដោយមិនគិតពីភេទឡើយ។

ការណ៍នេះហាក់ដូចជាបានត្រួសត្រាយផ្លូវសម្រាប់បុត្រីរបស់ព្រះចៅអធិរាជ គឺព្រះនាង Aiko ដើម្បីឡើងគ្រងរាជ្យ។ ប៉ុន្តែចាប់តាំងពីការប្រសូតរបស់ព្រះអង្គម្ចាស់ Hisahito ក្នុងឆ្នាំបន្ទាប់មក រឿងនេះក៏ស្ងាត់ស្ងៀមទៅវិញ៕

ប្រែសម្រួល៖ ណឺ មិនា