អ៊ីរ៉ង់ គំរាមវាយប្រហារលំនៅដ្ឋាន មេបញ្ជាការនិងអ្នកនយោបាយអាមេរិក-អ៊ីស្រាអែល ក្នុងតំបន់

សង្គ្រាមមជ្ឈិមបូព៌ានៅតែពុះកញ្ជ្រោល ដោយភាគីជម្លោះបន្តសងសឹកគ្នាទៅវិញទៅមក ដោយឥឡូវនេះ អ៊ីរ៉ង់ គំរាមទៀតថា ខ្លួននឹងកំណត់គោលដៅលើលំនៅដ្ឋានមន្ត្រីអាមេរិកនិងអ៊ីស្រាអែលក្នុងតំបន់ ដើម្បីឆ្លើយតបទៅការវាយប្រហាររបស់សត្រូវ លើផ្ទះជនស៊ីវិលនៅតាមទីក្រុងនានារបស់អ៊ីរ៉ង់។

សារព័ត៌មាន BBC បានដកស្រង់សម្តីលោក Ebrahim Zolfaghari អ្នកនាំពាក្យនៃទីបញ្ជាការដ្ឋានកណ្តាល Khatam al-Anbiya ដែលនិយាយនៅថ្ងៃចន្ទទី៣០ខែមីនាថា កងកម្លាំងប្រដាប់អាវុធនឹងកំណត់គោលដៅលើលំនៅដ្ឋានរបស់មេបញ្ជាការនិងមន្ត្រីនយោបាយអាមេរិក និងអ៊ីស្រាអែលនៅក្នុងតំបន់។ នេះគឺជាវិធានការសងសឹក បន្ទាប់ពីអាមេរិកនិងអ៊ីស្រាអែល កំណត់គោលដៅលើផ្ទះសម្បែងរបស់ប្រជាជនស៊ីវិលអ៊ីរ៉ង់នៅក្នុងទីក្រុងផ្សេងៗ។

ម្យ៉ាងវិធានការនេះ ក៏ដើម្បីសងសឹកចំពោះការបាត់បង់មេដឹកនាំកំពូល Ayatollah Ali Khamenei កាលពីថ្ងៃទី ២៨ ខែកុម្ភៈ ដែលអ៊ីរ៉ង់ចាត់ទុកថាជា ការវាយប្រហារលើក្បាលម៉ាស៊ីនដឹកនាំផងដែរ។

រឿងនេះកើតឡើងក្រោយពេល អ៊ីរ៉ង់​ បានបញ្ជាក់ពីការត្រៀមកម្លាំងទ័ពរហូតដល់ទៅជាង ១លាននាក់ ដើម្បីទប់ទល់កងទ័ពជើងគោកអាមេរិក ដែលនឹងមកលុកលុយប្រទេសរបស់ខ្លួន។

ដោយដកស្រង់ប្រភពយោធាមួយ សារព័ត៌មាន Tasnim រាយការណ៍ថា ក្រុមអ្នកប្រយុទ្ធនៃរបបនេះកំពុងមានភាពពុះកញ្ជ្រោលកាន់តែខ្លាំង ក្នុងការបង្កើតនរកជាប្រវត្តិសាស្ត្រមួយសម្រាប់ជនជាតិអាមេរិកនៅលើទឹកដីអ៊ីរ៉ង់។ យុវជនអ៊ីរ៉ង់ បាននិងកំពុងដាក់ពាក្យយ៉ាងច្រើនកកកុញ ដើម្បីចូលបម្រើក្នុងជួរកងទ័ព កងឆ្មាំបដិវត្តន៍ឥស្លាម (IRGC) និងកងពលតូចស្ម័គ្រចិត្ត Basij៕

អត្ថបទ៖ សុខ សុវណ្ណ