ចិន និងរុស្ស៊ី ប្តេជ្ញាសហការគ្នាដើម្បីធ្វើ​ឲ្យ​សង្គ្រាម​នៅមជ្ឈិមបូព៌ាថយចុះកម្តៅ

នៅក្នុងកិច្ចសន្ទនាតាមទូរសព្ទកម្រិតខ្ពស់នាថ្ងៃទី៥​ខែមេសា​ឆ្នាំ​២០២៦​ រដ្ឋមន្ត្រីការបរទេសចិន លោក Wang Yi បានប្រាប់សមភាគីរុស្ស៊ី លោក Sergei Lavrov ថា ទីក្រុងប៉េកាំងត្រៀមខ្លួនជាស្រេចក្នុងការធ្វើការយ៉ាងជិតស្និទ្ធជាមួយទីក្រុងមូស្គូ ដើម្បីធ្វើ​​ឲ្យ​សង្គ្រាមដែលកំពុងឆាបឆេះនៅមជ្ឈិមបូព៌ា​ថយចុះកម្តៅ។

យោង​តាម​ការ​​ផ្សាយរបស់ Strait Times លោក Wang បានសង្កត់ធ្ងន់ថា ស្ថានភាពបច្ចុប្បន្ន​កំពុងបន្តកាន់តែអាក្រក់ទៅៗ ហើយបានអំពាវនាវ​ឲ្យ​មានបទឈប់បាញ់ជាបន្ទាន់ ចំពោះការប្រយុទ្ធគ្នាដែលបង្កឡើងដោយការវាយប្រហាររបស់សហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់ កាលពីថ្ងៃទី២៨ខែកុម្ភៈ។ លោកបានបញ្ជាក់ថា ប្រទេសទាំងពីរត្រូវតែប្រកាន់ខ្ជាប់នូវភាពយុត្តិធម៌លើបញ្ហាគោលការណ៍សំខាន់ៗ ដើម្បីរក្សាសន្តិភាពក្នុងតំបន់ និងសន្តិសុខពិភពលោក។

ក្រសួងការបរទេសរុស្ស៊ីបានបញ្ជាក់ពីការពិភាក្សានេះ ដោយសម្តែងការពេញចិត្តដែលទីក្រុងមូស្គូ និងទីក្រុងប៉េកាំងមានទស្សនៈដូចគ្នាចំពោះរបៀបវារៈសកល ជាពិសេសពាក់ព័ន្ធនឹងអ្វីដែលពួកគេហៅថាជា «ការឈ្លានពានដោយគ្មានហេតុផល» ប្រឆាំងនឹងប្រទេសអ៊ីរ៉ង់។ អ្នកការទូតទាំងពីរបានព្រមព្រៀងគ្នា បន្តសម្របសម្រួលកិច្ចខិតខំប្រឹងប្រែងរបស់ពួកគេនៅក្នុងក្រុមប្រឹក្សាសន្តិសុខអង្គការសហប្រជាជាតិ ដើម្បីចាប់ផ្តើមការសន្ទនាផ្នែកនយោបាយ និងការទូត។ ជំហាននេះបានពង្រឹងបន្ថែមទៀតនូវភាពជាដៃគូដ៏ស៊ីជម្រៅរវាងមហាអំណាចទាំងពីរ ដែលបានរីកចម្រើនយ៉ាងខ្លាំងចាប់តាំងពីការឈ្លានពានរបស់រុស្ស៊ីលើអ៊ុយក្រែនក្នុងឆ្នាំ២០២២៕

ប្រែសម្រួល៖ ឈាង