Netanyahu ចោទចំៗថា គឺចិន ដែលជាអ្នកជួយ កម្មវិធីនុយក្លេអ៊ែរ របស់អ៊ីរ៉ង់

ជាការនិយាយចំឈ្មោះដោយឥតលាក់លៀម នាយករដ្ឋមន្ត្រីអ៊ីស្រាអែល Benjamin Netanyahu ចោទប្រកាន់ថា គឺប្រទេសចិន ដែលជាអ្នកជួយកម្មវិធីនុយក្លេអ៊ែរ របស់អ៊ីរ៉ង់។

សម្ភាសន៍ក្នុងកម្មវិធី «៦០នាទី» របស់ទូរទស្សន៍ CBS កាលពីថ្ងៃ អាទិត្យ ទី ១០ ខែ ឧសភា ឆ្នាំ ២០២៦, លោក Netanyahu និយាយថា ប្រទេសចិន បានផ្គត់ផ្គង់គ្រឿងបង្គុំបច្ចេកវិទ្យា ដែលប្រើប្រាស់ក្នុងការផលិតមីស៊ីលរបស់អ៊ីរ៉ង់។ លោកហៅបញ្ហានេះ ថាជាការព្រួយបារម្ភយ៉ាងខ្លាំង។

ក្នុងអំឡុងពេលនោះដែរ លោក Netanyahu អះអាងថា សង្គ្រាមជាមួយអ៊ីរ៉ង់ «មិនទាន់បញ្ចប់ទេ» ព្រោះ ការគំរាមកំហែងសំខាន់ៗ នៅតែបន្តមាន។

ម្យ៉ាង លោកចោទថា អ៊ីរ៉ង់នៅតែរក្សាទុកសារធាតុអ៊ុយរ៉ាញ៉ូម ដែលចម្រាញ់រួច និងនៅតែរក្សាទីតាំងចម្រាញ់នុយក្លេអ៊ែរ ដែលចាំបាច់ ត្រូវតែរុះរើចោល។

យ៉ាងណាក្តី ជុំវិញការចោទប្រកាន់របស់នាយករដ្ឋមន្ត្រីអ៊ីស្រាអែល គេមិនឃើញមានប្រតិកម្មពីសំណាក់ ភាគីចិននៅឡើយទេ។

ពាក់ព័ន្ធរឿងអ៊ុយរ៉ាញ៉ូមនេះដែរ តាម​របាយការណ៍​ពី Independent ចុះផ្សាយកាលពី​ថ្ងៃទី ​៣០ ខែ មេសា ឆ្នាំ​ ២០២៦, មេដឹកនាំទីភ្នាក់ងារថាមពលបរមាណូអន្តរជាតិ (IAEA) លោក Rafael Grossi បានបង្ហាញក្ដីបារម្ភយ៉ាងខ្លាំងថា បច្ចុប្បន្ន អ៊ីរ៉ង់ មានសារធាតុអ៊ុយរ៉ាញ៉ូមចម្រាញ់កម្រិតខ្ពស់ ច្រើនសន្ធឹកសន្ធាប់ ដែលអាចយកទៅផលិតជាគ្រាប់បែកនុយក្លេអ៊ែរ បានរហូតដល់ទៅ ១០គ្រាប់។

បើតាមរូបភាពផ្កាយរណប សារធាតុដ៏គ្រោះថ្នាក់ទាំងនេះ ត្រូវគេជឿថា កំពុងលាក់ទុកយ៉ាងជិត នៅក្នុងរូងភ្នំ នៃមជ្ឈមណ្ឌល​នុយក្លេអ៊ែរ Isfahan បន្ទាប់ពីមានរថយន្ត​ជាច្រើនគ្រឿង បានដឹកជញ្ជូនកុងតឺន័រចំនួន​ ១៨ ដែល​សង្ស័យ​ថា​ជា ​សារធាតុ​អ៊ុយរ៉ាញ៉ូម ចូលទៅក្នុងជម្រកក្រោមដី កាល​ពី​ថ្ងៃទី​៩ ខែមិថុនា ឆ្នាំ​២០២៥ មក​ម៉្លេះ ពោល​គឺ​តាំងពីមុនពេលសង្រ្គាមផ្ទុះឡើងទៅ​ទៀត៕

អត្ថបទ៖ សុខ សុវណ្ណ