ប៉ាគីស្ថាន ចេញមុខបដិសេធ រឿងលាក់យន្តហោះចម្បាំងអ៊ីរ៉ង់ កុំឱ្យអាមេរិកវាយប្រហារ

នាថ្ងៃអង្គារ ទី​១២ ខែ​ឧសភា ឆ្នាំ​២០២៦ នេះ រដ្ឋាភិបាលប៉ាគីស្ថាន បានចេញមុខច្រានចោលយ៉ាងដាច់អហង្ការ ចំពោះរបាយការណ៍របស់សារព័ត៌មានអាមេរិក CBS News ដែលផ្សាយថា មានយន្តហោះយោធារបស់អ៊ីរ៉ង់ មកសម្ងំលាក់ខ្លួន នៅក្នុងមូលដ្ឋានទ័ពអាកាសរបស់ប៉ាគីស្ថាន។

យោងតាម Anadolu ប៉ាគីស្ថាន បានហៅការចោទប្រកាន់នេះថា ជាព័ត៌មាន ដែលធ្វើឱ្យមានការភាន់ច្រឡំ និងមានបំណងបង្ខូចកិច្ចខិតខំប្រឹងប្រែង ក្នុងការស្វែងរកសន្តិភាពនៅក្នុងតំបន់ ដែលកំពុងតែមានភាពតានតឹងខ្លាំង។

ក្រសួងការបរទេសប៉ាគីស្ថាន បានពន្យល់ថា វត្តមានយន្តហោះទាំងរបស់អ៊ីរ៉ង់ និងសហរដ្ឋអាមេរិកនៅលើទឹកដីប៉ាគីស្ថានកន្លងមក គឺសុទ្ធតែមានបំណងបម្រើឱ្យការងារការទូតតែប៉ុណ្ណោះ។ យន្តហោះទាំងនោះ បានដឹកជញ្ជូនមន្ត្រីការទូត ក្រុមសន្តិសុខ និងក្រុមការងាររដ្ឋបាល ដើម្បីមកចូលរួមក្នុងកិច្ចពិភាក្សាកាត់បន្ថយជម្លោះរវាងប្រទេសទាំងពីរ។ ប៉ាគីស្ថាន បានបញ្ជាក់ថា ខ្លួនគ្រាន់តែជាអ្នកសម្របសម្រួលដ៏ស្មោះត្រង់ម្នាក់ ដែលផ្តល់កន្លែងឱ្យភាគីជម្លោះមកអង្គុយជជែកគ្នាដោយសន្តិវិធី ហើយការចត​បណ្តោះអាសន្ននៃយន្តហោះមួយចំនួន គឺដើម្បីត្រៀមសម្រាប់កិច្ចចរចាជុំបន្ទាប់តែប៉ុណ្ណោះ។

ការចេញមុខមកបកស្រាយនេះ ធ្វើឡើងបន្ទាប់ពីសារព័ត៌មាន CBS News បានចុះផ្សាយថា ប៉ាគីស្ថាន បានលួចអនុញ្ញាតឱ្យយន្តហោះយោធាអ៊ីរ៉ង់មកចត ក្នុងព្រលានយន្តហោះរបស់ខ្លួន ដើម្បីគេចពីការវាយប្រហារតាមអាកាសរបស់អាមេរិក។ កាលពីចុងខែកុម្ភៈកន្លងទៅ សហរដ្ឋអាមេរិក និងអ៊ីស្រាអែល បានបើកការវាយប្រហារលើអ៊ីរ៉ង់ ដែលបណ្តាលឱ្យមានការសងសឹកគ្នាទៅវិញទៅមកយ៉ាងខ្លាំងក្លា រហូតដល់មានការបិទច្រកសមុទ្រ Hormuz ដ៏សំខាន់របស់​ពិភពលោក​ទៀតផង។ ទោះបីជាមានការឈប់បាញ់គ្នាបណ្តោះអាសន្ន ក្រោមការសម្របសម្រួលរបស់ប៉ាគីស្ថាន តាំងពីខែមេសា ក៏ដោយ ក៏​ស្ថានការណ៍នៅតែមិនទាន់មានភាពច្បាស់លាស់នៅឡើយ។

កាលពីថ្ងៃអាទិត្យ អ៊ីរ៉ង់បានផ្ញើការឆ្លើយតបទៅកាន់អាមេរិក ជុំវិញសំណើបញ្ចប់សង្រ្គាម ប៉ុន្តែលោកប្រធានាធិបតី ដូណាល់ ត្រាំ បានទាត់ចោលភ្លាមៗ ដោយចាត់ទុកថា ជាសំណើ ដែលមិនអាចទទួលយកបាន។ ក្នុងស្ថានភាពដ៏ក្តៅគគុកនេះ ប៉ាគីស្ថាន នៅតែបន្តប្រកាន់ជំហរថា ខ្លួននឹងមិនលម្អៀងទៅខាងណាឡើយ ហើយនឹងបន្តដើរតួជាអ្នកនាំសារ ដើម្បីសន្តិភាព និងស្ថិរភាពនៅក្នុងតំបន់បន្តទៀត ដោយមិនមានការពាក់ព័ន្ធនឹងកិច្ចការយោធាណាមួយ ដូចការចោទប្រកាន់នោះឡើយ៕

ប្រែសម្រួល៖ ឈាង