អ៊ីរ៉ង់ ដាក់ឱសានវាទឱ្យអាមេរិក ទទួលលក្ខខណ្ឌសន្តិភាព បើមិនចង់ចាញ់​សង្គ្រាម

តំណាងចរចាកំពូលរបស់ប្រទេសអ៊ីរ៉ង់ បានផ្ញើសារព្រមានធ្ងន់ៗទៅកាន់ទីក្រុងវ៉ាស៊ីនតោន កាលពីថ្ងៃអង្គារ ទី​១២ ខែ​ឧសភា ថា សហរដ្ឋអាមេរិកគ្មានជម្រើសអ្វី ក្រៅតែ​ពីទទួលយកផែនការសន្តិភាពចុងក្រោយរបស់ខ្លួននោះទេ បើមិនដូច្នោះទេនឹងត្រូវប្រឈមមុខនឹងបរាជ័យជាបន្តបន្ទាប់។ នេះ​បើយោងតាម​ការ​ចុះផ្សាយរបស់ CNA នា​ថ្ងៃទី​១៣ ខែ​ឧសភា នេះ។

ការលើកឡើងនេះ ធ្វើឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានព្រមានថា បទឈប់បាញ់ក្នុងសង្គ្រាមមជ្ឈិមបូព៌ា ដែលកំពុងអូសបន្លាយជាងពីរខែមកនេះ កំពុងតែស្ថិតក្នុងស្ថានភាពប្រកាសអាសន្ន និងជិតរលាយសាបសូន្យទៅវិញ។

លោក Mohammad Bagher Ghalibaf ដែលជាអ្នកចរចារបស់អ៊ីរ៉ង់ បានបញ្ជាក់យ៉ាងច្បាស់ថា អាមេរិក ត្រូវតែគោរពសិទ្ធិរបស់ប្រជាជនអ៊ីរ៉ង់ តាមរយៈសំណើ ១៤ចំណុច ដែលខ្លួនបានដាក់ជូន។ លោកបានបន្ថែមដោយចំអក​ថា បើអាមេរិក នៅតែរារែកមិនព្រមសម្រេចចិត្តឱ្យបានឆាប់ទេ នោះអ្នកដែលត្រូវរ៉ាប់រងបន្ទុកចំណាយសង្គ្រាមដ៏ធ្ងន់ធ្ងរ គឺគ្មាននរណាក្រៅពីប្រជាជនអាមេរិក ដែលជាអ្នកបង់ពន្ធនោះឡើយ។ ជាក់ស្តែង ក្រសួងការពារជាតិអាមេរិកទើបតែទម្លាយថា ការចំណាយក្នុងសង្គ្រាមនេះ បានហក់ឡើងដល់ជិត ២៩ពាន់លានដុល្លារទៅហើយ។

ចំពោះខ្លឹមសារនៃសំណើសន្តិភាពនេះ ខាងភាគីអ៊ីរ៉ង់ ចង់ឱ្យមានការបញ្ឈប់សង្គ្រាម នៅគ្រប់សមរភូមិទាំងអស់ រួមទាំង នៅប្រទេសលីបង់ផងដែរ។ លើសពីនេះ អ៊ីរ៉ង់ ទាមទារឱ្យអាមេរិកដកការឡោមព័ទ្ធតាមផ្លូវទឹក នៅតាមកំពង់ផែផ្សេងៗ និង​បញ្ចេញ​​ទ្រព្យសម្បត្តិរបស់អ៊ីរ៉ង់ ដែល​ត្រូវ​បាន​បង្កក​នៅបរទេសជាយូរមកហើយ។ យ៉ាង​ណាមិញ លោក ដូណាល់ ត្រាំ បានបដិសេធភ្លាមៗ ដោយចាត់ទុកថា ជារឿងដែលមិនអាចទទួលយកបានឡើយ ហើយលោកបានប្រកាសដោយជឿជាក់ថា អាមេរិកនឹងទទួលបានជ័យជម្នះទាំងស្រុងលើអ៊ីរ៉ង់ជាមិនខាន៕

ប្រែសម្រួល៖ ឈាង