គុយបា ចោទអាមេរិកថា «ប្រឌិតរឿងដ្រូន» ធ្វើលេស​ដាក់ទណ្ឌកម្ម និងលូកដៃកិច្ចការផ្ទៃក្នុង

បន្ទាប់ពីមានការលេចធ្លាយព័ត៌មានសម្ងាត់ពីរដ្ឋាភិបាលអាមេរិក ​ថា ប្រទេសគុយបា បានលួចប្រមូលទិញដ្រូនវាយប្រហារជាង ៣០០គ្រឿងមកនោះ ពេលនេះ ខាងភាគីគុយបា បានចេញមុខប្រតិកម្មយ៉ាងខ្លាំងក្លាវិញម្តង។ នេះ​បើយោងតាម​ការ​ចុះផ្សាយ​របស់​ The Strait Times។

កាលពីថ្ងៃទី១៧ ខែឧសភា រដ្ឋមន្ត្រីការបរទេសគុយបា លោក Bruno Rodriguez បានចេញមុខចោទប្រកាន់សហរដ្ឋអាមេរិកចំៗថា បានប្រឌិត «រឿងរ៉ាវភូតកុហក» នេះឡើង ក្នុងបំណងយកទៅធ្វើជាលេស ដើម្បីដាក់ទណ្ឌកម្មសេដ្ឋកិច្ចបន្ថែម និងត្រៀមលក្ខណៈលូកដៃផ្នែកយោធាមកលើប្រទេសរបស់លោក។

ការចេញមុខមកបកស្រាយរបស់រដ្ឋមន្ត្រីរូបនេះ បានធ្វើឡើងភ្លាមៗ បន្ទាប់ពីសារព័ត៌មាន Axios បានចុះផ្សាយព័ត៌មានស៊ើបការណ៍សម្ងាត់ ដោយចោទថា ទីក្រុងឡាហាវ៉ាន បានពិភាក្សាគ្នាពីផែនការប្រើប្រាស់ដ្រូនទាំងនោះ ទៅវាយប្រហារលើមូលដ្ឋានទ័ពជើងទឹកអាមេរិក នៅ​តំបន់​ឆ្នេរ​សមុទ្រ Guantanamo នាវាចម្បាំង និងទីក្រុងមួយចំនួន ក្នុងរដ្ឋផ្លរីដា។ លោក Rodriguez បានសរសេរនៅលើបណ្តាញសង្គម ដោយសង្កត់ធ្ងន់ថា គុយបា មិនដែលគំរាមកំហែង ឬចង់បង្កើតសង្គ្រាមជាមួយនរណាឡើយ ប៉ុន្តែអ្វីដែលគុយបាកំពុងធ្វើ គឺគ្រាន់តែជាការរៀបចំខ្លួន ដើម្បីប្រឈមមុខនឹងការឈ្លានពានពីខាងក្រៅ ស្របតាមសិទ្ធិការពារខ្លួនស្របច្បាប់ ដែលមានចែងក្នុងធម្មនុញ្ញរបស់អង្គការសហប្រជាជាតិ (UN) តែប៉ុណ្ណោះ ទោះបីជាលោកមិនបានរំលឹកចំៗ ពីព័ត៌មានរឿងទិញដ្រូននោះក៏ដោយ។

យ៉ាង​ណាមិញ បើតាមមន្ត្រីជាន់ខ្ពស់អាមេរិកម្នាក់ បានទម្លាយថា ព័ត៌មានសម្ងាត់រឿងដ្រូននេះ បានក្លាយជាហេតុផលចម្បងដែលធ្វើឱ្យរដ្ឋបាលលោក ដូណាល់ ត្រាំ ចាត់ទុកគុយបាជាការគំរាមកំហែងលំដាប់ខ្ពស់ ដោយសារតែការវិវត្តនៃបច្ចេកវិទ្យាសង្គ្រាមដ្រូន និងវត្តមានរបស់ទីប្រឹក្សាយោធាអ៊ីរ៉ង់នៅលើ​ប្រទេស​កោះ​មួយ​នេះ។ ស្ថានភាពរវាងប្រទេសទាំងពីរ កាន់តែឡើងកម្តៅខ្លាំង បន្ទាប់ពីក្រសួងយុត្តិធម៌អាមេរិក បានបង្ហើបពីផែនការត្រៀមចោទប្រកាន់អតីតមេដឹកនាំគុយបា លោក Raul Castro វ័យ ៩៤ឆ្នាំ ពីបទពាក់ព័ន្ធនឹងការបាញ់ទម្លាក់យន្តហោះមនុស្សធម៌មួយ​កាលពីឆ្នាំ ១៩៩៦។

ការរៀបចំចោទប្រកាន់លើនិមិត្តរូបបដិវត្តន៍ដ៏មានឥទ្ធិពលរូបនេះ គឺជាយុទ្ធសាស្ត្របង្កើនសម្ពាធយ៉ាងធ្ងន់ធ្ងរពីរដ្ឋបាលលោក ត្រាំ ដែលជានិច្ចកាលតែងតែរិះគន់រដ្ឋាភិបាលកុម្មុយនិស្តគុយបា ថាពុករលួយ និងអសមត្ថភាព។ កន្លងមក អាមេរិក ធ្លាប់បានប្រើប្រាស់ប្រព័ន្ធច្បាប់ប្រឆាំងនឹងមេដឹកនាំបរទេស ដើម្បីធ្វើជាលេសបើកផ្លូវដល់ការធ្វើអន្តរាគមន៍យោធារួចមកហើយ ដូចជា ករណីចាប់ខ្លួនមេដឹកនាំវ៉េណេស៊ុយអេឡា លោក នីកូឡាស ម៉ាឌូរ៉ូ កាលពីខែមករាកន្លងទៅនេះជាដើម ខណៈ​លោក ត្រាំ ធ្លាប់បានព្រមាន​ថា ប្រទេសបន្ទាប់គឺ «គុយបា» នេះឯង៕

ប្រែសម្រួល៖ ឈាង