ព័ត៌មានអន្ដរជាតិ

កងទ័ពជើងទឹកអ៊ីស្រាអែល រៀបចំស្ទាក់ចាប់ក្រុមនាវាអន្តរជាតិ ប៉ុនប៉ងនាំជំនួយចូលតំបន់ហ្គាហ្សា

បានផុស

២ ខែ មុន

នៅ

ថ្ងៃចន្ទ ១៨ ឧសភា ២០២៦

ដោយ

យោងតាមប្រព័ន្ធផ្សព្វផ្សាយអ៊ីស្រាអែល បានឱ្យដឹងថា កងទ័ពជើងទឹកអ៊ីស្រាអែលកំពុងរៀបចំស្ទាក់ចាប់ និងរឹបអូសទូករបស់កងនាវាផ្តល់ជំនួយអន្តរជាតិ Global Sumud Flotilla ដែលស្វែងរកការបំបែកការបិទផ្លូវរបស់អ៊ីស្រាអែលឆ្ពោះទៅតំបន់ហ្គាហ្សា ក្នុងដែនទឹកអន្តរជាតិនៃសមុទ្រមេឌីទែរ៉ាណេ។

កាសែតអ៊ីស្រាអែល Maariv ដែលបានដកស្រង់ប្រភពដែលមិនបញ្ចេញអត្តសញ្ញាណនៅថ្ងៃចន្ទ បានផ្សាយថា កងទ័ពជើងទឹកអ៊ីស្រាអែលកំពុងរៀបចំបញ្ឈប់សកម្មភាពទូករបស់កងនាវា Flotilla ដែលធ្វើដំណើរចាកចេញពីប្រទេសតួកគី នឹងកំពុងឆ្ពោះទៅកាន់តំបន់ហ្គាហ្សា។

សកម្មភាពអ៊ីស្រាអែលកំពុងយាយីទូកជំនួយអន្តរជាតិ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មានខាងលើ បាននិយាយថា កងទ័ពជើងទឹកអ៊ីស្រាអែលនឹងស្ទាក់ចាប់ទូកទាំងនោះក្នុងដែនទឹកអន្តរជាតិ មុនពេលពួកគេទៅដល់ដែនទឹកប៉ាឡេស្ទីន។

យោងតាមប្រព័ន្ធផ្សព្វផ្សាយរដ្ឋអ៊ីស្រាអែល KAN នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ថានឹងធ្វើកិច្ចប្រជុំសន្តិសុខមួយ ដើម្បីអនុម័តការរឹបអូសយកកងនាវានោះ។

គួរបញ្ជាក់ថា លោក ណេតាន់យ៉ាហ៊ូ ត្រូវបានតុលាការឧក្រិដ្ឋកម្មអន្តរជាតិ (ICC) ចោទប្រកាន់តាំងពីឆ្នាំ២០២៤ ពីបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងនឹងមនុស្សជាតិនៅក្នុងតំបន់ហ្គាហ្សា ជាកន្លែងដែលមនុស្សជាង ៧២ ០០០នាក់ ភាគច្រើនជាស្ត្រី និងកុមារ ត្រូវបានសម្លាប់នៅក្នុងសង្គ្រាម និងជាអំពើប្រល័យពូជសាសន៍របស់អ៊ីស្រាអែល ចាប់តាំងពីខែតុលា ឆ្នាំ ២០២៣។

យ៉ាងណា នៅព្រឹកថ្ងៃចន្ទ កងនាវាថា រកឃើញសកម្មភាពគួរឱ្យសង្ស័យ ដោយកប៉ាល់និងទូកដែលមិនស្គាល់អត្តសញ្ញាណចូលមកជិតនាវារបស់ខ្លួនភ្លាមៗ បន្ទាប់ពីបានប្រកាសថាខ្លួនបានចូលទៅក្នុងដែនទឹកអន្តរជាតិ។

កងនាវានោះ មានទូកអមចំនួន ៥៤គ្រឿង បានចេញដំណើរកាលពីថ្ងៃព្រហស្បតិ៍ពីទីក្រុង Marmaris នៃប្រទេសតួកគីនៅសមុទ្រមេឌីទែរ៉ាណេ ដើម្បីបំបែកការបិទផ្លូវរបស់អ៊ីស្រាអែលឆ្ពោះទៅតំបន់ហ្គាហ្សា៕

សម្រួល៖ ណឺ មិនា