ព័ត៌មានអន្ដរជាតិ

គុយបា ព្រមានអាមេរិក ថា សកម្មភាពយោធាលើគុយបា នឹងនាំឱ្យមានការបង្ហូរឈាម

បានផុស

២ ខែ មុន

នៅ

ថ្ងៃអង្គារ ១៩ ឧសភា ២០២៦

ដោយ

ប្រធានាធិបតីគុយបា លោក Miguel Diaz-Canel លើកឡើងនៅថ្ងៃចន្ទថា សកម្មភាពយោធាណាមួយរបស់សហរដ្ឋអាមេរិកប្រឆាំងនឹងប្រទេសគុយបា នឹងនាំឱ្យមានការបង្ហូរឈាម ជាមួយនឹងផលវិបាកដែលមិនអាចគណនាបានសម្រាប់សន្តិភាព និងស្ថិរភាពក្នុងតំបន់។ នេះបើយោងតាមភ្នាក់ងារសាព័ត៌មានរ៉យទ័រ ចុះផ្សាយថ្ងៃទី១៨ ខែឧសភា ឆ្នាំ២០២៦ ។

លោក Diaz-Canel បង្ហោះលើបណ្តាញសង្គម X ថា៖ « ប្រទេសគុយបាមិនមែនជាការគំរាមកំហែងទេ»។

ការអត្ថាធិប្បាយទាំងនេះធ្វើឡើង បន្ទាប់ពីមានសេចក្តីរាយការណ៍របស់សារព័ត៌មាន Axios មានមូលដ្ឋាននៅសហរដ្ឋអាមេរិក បានចេញផ្សាយកាលពីថ្ងៃអាទិត្យ ដោយដកស្រង់សម្តីចារកម្មសម្ងាត់ ដែលនិយាយថា ប្រទេសគុយបាទទួលបានដ្រូនយោធាជាង ៣០០គ្រឿង ថែមទាំងពិភាក្សាពីផែនការប្រើប្រាស់ដ្រូនទាំងនោះ ដើម្បីវាយប្រហារមូលដ្ឋានកងទ័ពជើងទឹកសហរដ្ឋអាមេរិកនៅឈូងសមុទ្រ Guantanamo នាវាយោធាសហរដ្ឋអាមេរិក និងទីក្រុង Key West ក្នុងរដ្ឋ Florida ។

ប្រធានាធិបតីគុយបា លោក Miguel Diaz-Canel ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលគុយបា បានចោទប្រកាន់ត្រឡប់ទៅវិញថា សហរដ្ឋអាមេរិកកំពុងប្រតិដ្ឋករណីនេះ ដើម្បីបង្ហាញពីភាពត្រឹមត្រូវនៃអន្តរាគមន៍យោធាដែលអាចកើតមាន។

នៅតាមដងផ្លូវនៃទីក្រុង Havana ប្រជាពលរដ្ឋមួយចំនួននិយាយថា ពួកគេនឹងទប់ទល់នឹងការវាយប្រហារណាមួយ ទោះបីជាមានការលំបាកផ្នែកសេដ្ឋកិច្ចយ៉ាងធ្ងន់ធ្ងរ នៅលើកោះនេះក៏ដោយ។

ប្រជាជនគុយបាម្នាក់ ឈ្មោះ Ulises Medina អាយុ ៥៨ឆ្នាំ ជាអ្នករស់នៅទីក្រុង Havana ជំរុញឱ្យមានការចរចា។

លោកលើកឡើងថា៖ « វាមិនត្រឹមត្រូវទេ ដែលសហរដ្ឋអាមេរិក ឈ្លានពានប្រទេសគុយបា ហើយគុយបានក៏មិនបានឈ្លានពានអាមេរិកដែរ។ ពួកគេត្រូវតែឈានដល់កិច្ចព្រមព្រៀង ពិភាក្សា និងចរចា។ ក្នុងករណីណាក៏ដោយ គុយបានឹងការពារខ្លួនពីព្រោះប្រទេសនេះនឹងមិនត្រូវចុះចាញ់ឡើយ»។

គួរបញ្ជាក់ថា គុយបាជាសត្រូវកុម្មុយនីស្តរបស់ទីក្រុងវ៉ាស៊ីនតោនអស់ជាច្រើនជំនាន់មកហើយ រហូតមកដល់បច្ចុប្បន្នកំពុងស្ថិតនៅក្រោមភាពតានតឹងកាន់តែខ្លាំងឡើង។ ជាពិសេសចាប់តាំងពីសហរដ្ឋអាមេរិកបានកាត់ផ្តាច់ការផ្គត់ផ្គង់ថាមពល ក្រោយពីការចាប់ខ្លួនអតីតប្រធានាធិបតីវ៉េណេស៊ុយអេឡា ជាសម្ព័ន្ធមិត្តរបស់គុយបាកាលពីខែមករា៕

សម្រួល៖ ណឺ មិនា